Read Tase Naga KAMX 25 Bible Online

KAMX 25 - Tase Naga bible

KAMX 25

¹Festu kuex kvruex hong nuex httuiuc kaz vtueq, raungnuiyq thuimx ngoc yaungc nuex Kesarea maq Yerusalem nuex kaz wvnc tueq.

²Shomc waz bix nuiyc Yuda miqsaz walaungx bix rueq Polu kuex phvnx ruip saz htauk nuex yaq wvnc tueq lvmz Festu muex jungx tvtay tueq.

³Tsuingshiq rueq Polu kuex lvmx maq bvmc vtueq vyumx maq thvy gay tvkoc dvnc vtueq, tsuingshiq muex kejux maq Polu kuex Yerusalem nuex shvlc kuy lvy tvkoc Festu yauk wawc kvmenc jenc thoz wuez tueq.

⁴Festu rueq, “Polu kuex Kesarea ghaq nuex shauk taq vtueq, ngaz muinz kvruex ghaq kvyuq mtanc httax mauk nuex yek waung taungx.

⁵Nuimshiq walaungx bix muinz ngaz rulc vroc nuex kaz naungx vtueq, Polu htauk nuex mvrax tvgurc juing phvnx shishiz httax ruiux yuq, kvkaq jix ngaz muex mjungx kuq phuex,” ngoz tueq tvralc tueq.

⁶Festu kuex tsuingshiq kox nuex raungx tvjvt, raungx rokshiz tanc httax shec vtueq Kesarea ghaq nuex waung wvnc tueq. Nvp yix raungnuiyq khac phoc juing hoc nuex ngaungc ruiux, Polu kuex shvlc wvnc tvkoc nvr tueq.

⁷Polu httuiuc kaz tueq kvkaq Yerusalem wawc vkaz Yuda miqsaz htenc rueq piq tvroz tumz nuex jvp vtueq mvrax yunghvlc tvgurc kuq tueq, yuq muinz tsuingshiq rueq hakhix kuex tvkhic kuq lot muq.

⁸Polu rueq, “Ngaz kuex Yuda miqsaz Tvrac muex muinz, Shomc Yuimx muex muinz, Kesar honoc waz muex muinz yvmx muinz yaq mauk doc,” ngoz tueq piq pumz kuex kvgawx jungx tueq.

⁹Yuq muinz Festu kuex Yuda miqsaz kox wawc htvlx phawc vhvlx lvp roc ningkhvnc nuex, “Mnoz kuex Yerusalem nuex kaz vtueq, ngvy htumc nuex vruex mvrax tvgurc yaq lvmx nuex seng vtueq vwiz vsoz rvhumc tuiux haz?” ngoz tueq Polu muex wiz tueq.

¹⁰Polu rueq, “Ngaz kuex majuiuc honoc Kesar hoc nuex vphoc rvhumc tvkoc jvp vtaungx, mnoz rueq vsuing tuiuz vshuiux rulc rv-ngvlc ngaz rueq Yuda miqsaz muex yvmx muinz yaq kuq mauk doc rvtueq.

¹¹Mkhoc shoc maq tvrac muex yaq gay vtueq vthueyc juing mvrax phvnx shishiz shuimx wvnc tauk ngoz ruiux yuq, ngvy rullungx tvraungx tvkoc thoz phaungx rvmuq, yuq muinz tsuingshiq rueq tvgurc yaq mvrax kuex vjungx vbaung muinz vguez ngoz ruiux kuex, tsuingshiq yauk nuex ngaz kuex uraq muinz lekuq gay lot phuex rvmuq, ngaz kuex honoc Kesar rueq phoc kuy tvkoc dvyx thoz vphaungx,” ngoz tueq tvralc tueq.

¹²Kvkaq Festu kuex walaungx bix rulc rvjungc phvnc lot vtueq, “Mnoz kuex Kesar rueq phoc kuy tvkoc thoz toq ningkhvnc nuex Kesar kox nuex mnoz kaz tuiux,” ngoz kuq tueq.

¹³Mtanc httax muq nuex Hokhvmx Agripa nuiyc Bernike kuex Kesarea ghaq nuex httuiuc kaz vtueq Festu rulc rvhumc waung tueq.

¹⁴Kvruex ghaq kvyuq raungnuiyq loayc hvlc guilc tueq nuex, Festu rueq Polu lvmz kuex hokhvmx waz muex jungphvnx kuq tueq. Festu rueq, “Vruex hong vyuq Philip rueq khoktep nuex vshauk shec miq washiz httax yaq.

¹⁵Ngaz Yerusalem nuex httuiuc kaz tauk baunglaung shomc waz bix nuiyc Yuda miqsaz walaungx bix rueq ngaz muex kvruex waz kuex mvrax httax yaq rulc rv-ngvlc phox kuq wvnc loq ngoz tueq thoz phuex.

¹⁶Ngaz rueq mvrax gurc jix waz nuiyc mvrax tvgurc jix nuk kuex roc nuex ngaungc vtueq, mvrax tvgurc kvjaz htenc kuex mvrax gurc jix waz rueq tvralc khawc vkhangx kuq mauk maq phoc kuy kuex Roma miqsaz htungx tvrac rvmuq lvmx tsuingshiq muex jungx kuq tauk.

¹⁷Kvkhoc rvtueq tsuingshiq kuex vruex ghaq vyuq httuiuc kaz tueq nuex ngaz rueq muinz guilc mauk maq nvp yix raungnuiyq dvyx tvrac hoc nuex ngaungc vtueq kvruex waz kuex tvgvl kaz tauk.

¹⁸Piq shawk jix nuk jvp vtueq mvrax tvgurc kvjaz jungx wuez ruiux muinz, ngaz rueq tvmaung wvnc tauk mvrax phvnx kuex rvmuq.

¹⁹Tsuingshiq nawk palx lvmx nuex seng vtueq nuiyc Yesu ngoz yaq waz kvruex ningkhvnc nuex dvyx rvkhawc lvlc yaq kvjaz rvtueq. Yesu kuex vthueyc rvwvnc tueq yuq muinz rullungx vtvraungx httax yaq ngoz tueq Polu rueq jungx yaq.

²⁰Kvruex khuec vlvmz nuex seng vtueq vkhuec vlvmz kuex yvmx khoc maq lvp juing wueq rvkhauk laz kvtuiuz muq ningkhvnc nuex, Polu muex mnoz Yerusalem nuex kaz ruiux vruex mvrax tvgurc yaq vyuq seng vtueq vwiz vsoz rvhumc khvmc tuiux haz? ngoz tueq wiz tauk.

²¹Yuq muinz Polu rueq Kesar hokhvmx waz rueq jix mphox tvsuip kuq phueq ngoc ningkhvnc nuex, piq kuex Kesar hokhvmx waz kox nuex lekuy muex httuiuc laz khoktep nuex shuiuz gay tvkoc nvr tauk,” ngoz tueq jungx tueq.

²²Agripa rueq Festu muex, “Kvruex waz rueq jungx yaq kvjaz kuex ngaz rueq muinz vtay roc doc,” ngoz tueq jungx tueq. Festu rueq, “Kvruex waz rueq jungx yaq kvjaz kuex invp raungnuiyq tay lvp shuiux,” ngoz tueq.

²³Nvp yix raungnuiyq kvkaq Agripa nuiyc Bernike kuex khoz vkhvy kvmarc khak vtueq, nolaungx yungx bix nuiyc ghaqyungx wawc walaungx bix rulc vdvmz nuex kaz vtueq, pang yuimx nuex nyuip wvnc tueq. Kvkaq Festu rueq nvr tueq rulc rv-ngvlc Polu kuex shvlx wvnc tueq.

²⁴Festu rueq, “Hokhvmx Agripa nuiyc vyuq nuiyshiq rulc rvtuimx vtuinx jix lotlaz lex, Yerusalem ghaq jix nuiyc vruex ghaq nuex httaz jix Yuda miqsaz htenc rueq, vruex waz kuex vtvraungx tvhttaz aungx muq, ngoz tueq guyc sez wuez vtueq ngvy kox nuex jungx tvtay kaz wuez ruex. Kvkhoc ngoc rvhumc jix waz kuex vruex waz vruex rvtueq.

²⁵Piq kuex vthueyc aungx yaq mvrax phvnx shiz muinz yaq muq lvmx kuex ngaz rueq tuiuz yaq. Yuq muinz piq rueq hokhvmx waz htumc nuex httuiuc rax ngoz tueq thoz ningkhvnc nuex piq kuex hokhvmx waz kox nuex tvkay tvkoc ngaz rueq muinz htvp htaz kuq tauk.

²⁶Yuq muinz piq nuex seng vtueq hokhvmx waz muex rvkhauk laz vlvmx tvkhic kuy juing phvnx shiz muinz ngaz kox nuex vguez. Kvkhoc ningkhvnc nuex piq kuex nuimshiq htumc nuex shvlx laq vraungx, Agripa hokhvmx waz kox nuex shvlx laq raungx, vkhoc shvlx laq vraungx lvmx kuex piq muex mnoz rueq wisoz ruiux yuq jix, ngaz rueq tvtsuingc tvy juing luik wuiyq ruiux yuq vlvmz phvnx shishiz lvp tvkoc rvtueq.

²⁷Yvmx khoc lac ngoz ruiux lec mvrax tvgurc yaq lvmx kuex phvnx shishiz tvkhic miq maq khoktep wawc miq washiz tvdungc gay kuex aungx muq rvtuex ngoz tueq ngaz rueq tvmaung vshaungx,” ngoz tueq.