Read Tase Naga 1 KORINHTU 1 Bible Online

1 KORINHTU 1 - Tase Naga bible

1 KORINHTU 1

¹Tishox thuinroc rulc rv-ngvlc Christu Yesu kamx waz muex tvyaungc rvhumc tauk ngaz Polu nuiyc naungshiq phunox waz Sosthene kox maq,

²Korinhtu ghaq wawc Tishox phungc nuex lomx yaq jix htenc, baung ruip saz wawc naungshiq nuiyc tsuingshiq Taungjix rvtueq Yesu Christu muex nawk palx jix Christu Yesu nuex Tishox miqsaz vsawc yaungc tvkoc vgvlc rvhumc jix lotlaz kox nuex tvtay vphix.

³Naungshiq Waz Tishox nuiyc Taungjix Yesu Christu kox wawc kejux nuiyc nomic kuex nuimshiq nuex mhttax wvnc kueq.

⁴Ngaz rueq nuimshiq muex Christu Yesu maq raz tueq Tishox rueq nuimshiq muex vkuq kejux tvkoc nuex Tishox muex kejux vyungx ngoz vshaungx.

⁵Nuimshiq kuex Christu nuex vshiz dvyx yaungx vtuinx ningkhvnc nuex vjungc vphvnc lvmz nuex muinz, phaqjic lvmz nuex muinz phvnx ruip saz htauk nuex hunghtaungx wvnc vtuinx.

⁶Nuiyshiq rueq jungphvnx kuq vphix Christu lvmz bomjungc kuex nuimshiq htauk nuex phaungx duing vruingx waungc yaq.

⁷Kvkhoc rvtueq Taungjix Yesu Christu httuiuc kaz yaq kuex tvluimc bvmc vtueq httax ruiux yuq, nuimshiq rueq lvp wvnc lot muit phvnx ruimrix kejux httax muq laz juing lotlaz lvp wvnc wuez shuinx.

⁸Naungshiq Taungjix Yesu Christu httuiuc kaz yek vtueq khac phox shuex Raungnuiyq nuex, mvrax tvgurc vguez laz juing vpiq rueq nuimshiq tv-phaungx kuq shuex.

⁹Tishox kuex vtvluimc juing waz rvtueq, vpiq rueq nuimshiq kuex Vsaz Yesu Christu rulc lux rvyaungc tvkoc thvl wvnc kv-phuinx rvtueq.

¹⁰Phunox bix lex, naungshiq Taungjix Yesu Christu muingc vrangx vpangx maq nuimshiq lotlaz kox wawc ngaz rueq thoz vphaungx, nuimshiq nuex rungx raz muit thuinz httax muit tvkoc nuimshiq rvbomc rv-nyamc lvmz nuex vrungx vraz maq httax wuez kuinz. Nuimshiq tvmaung thuinz vshiz, kvmungx lvmz vshiz maq rungx raz httax wuez kuinz.

¹¹Yvmx khoc lac ngoz ruiux lec iphuz inox bix lex, nuimshiq vdvmz dvmz rvthoz thvy vtuinx lvmz kuex Kloe yuimx jix rueq ngaz muex tvtay jungx kuq kaz phuex.

¹²Nuimshiq vshiz maq vshiz rueq jungx vshuinx kvjaz kuex rv-ngvlc muq, “Ngaz kuex Polu kungjix rvtauk, ngaz kuex Apollo kungjix rvtauk, ngaz kuex Peter kungjix rvtauk, ngaz kuex Christu kungjix rvtauk,” ngoz tueq ngoz vshuinx.

¹³Christu kuex rv-phvlc wvnc vtuex haz? Polu kuex nuimshiq tvkoc yauk juinc bulx nuex but gay haz rvhumc tvnx? Polu sangac rvtueq haz nuimshiq rueq yuix luip lvmz tuinx?

¹⁴Krispu nuiyc Gaiu maq lvy vtueq nuimshiq ukhaq muex muinz ngaz rueq yuix luip kuq mauk doc ningkhvnc nuex Tishox kejux tvtsvmc vshaungx.

¹⁵Kvkhoc rvtueq nuimshiq rueq ngvy sangac ningkhvnc nuex yuix luip lvmz wvnc tiq ngoz tueq uraq muinz jungx lot muit.

¹⁶(O rvtueq, Stephana nuiyc piq yuimx wuinz muex rac dvyx ngaz rueq yuix luip kuq tauk, kvruex htauk nuex lvy vtueq yuix luip kuy lvmx ngaz rueq tvtsuingc mauk.)

¹⁷Christu rueq ngaz tvkaz phuex kuex yuix luip kuy tvkoc rvmuq. Thuix Thaungx Vhvlx jungphvnc kuy tvkoc juex Christu rueq ngaz kuex tvkaz phuex, Christu yauk juinc bulx nuex thueyc tueq lvmz luimc vkawc kuex khuec guez yaungx kaz muq mruez kueq, miqsaz nuix taksux tharc kuex shuimx mauk maq jungphvnx wvnc tauk.

¹⁸Yvmx khoc lac ngoz ruiux lec yauk juinc bulx nuex Christu vthueyc khvmc tueq ngoz yaq bomjungc kuex, vmoz vmaq wvnc jix bix tvkoc vlvmz vguez muex yaungx yaq; yuq muinz palc daungc wvnc rvhumc jix naungshiq tvkoc kuex Tishox luimc vkawc hungc rvtueq.

¹⁹Yvmx khoc lac ngoz ruiux lec Rumvrc luik nuex: “Taksux tharc vhttax jix waz tharc kuex ngaz rueq tvbac gay shaungx, tuiuz tay lvmz kuex ngaz rueq tvdux gay shaungx,” ngoz tueq wuiyq taq tueq.

²⁰Kvkhoc rvtueq wvtharc jix waz kuex m-yuq lac httax yaq nguinx? Luik wuiyq jix waz kuex m-yuq lac? Vruex mungkawx vyuq bomjungc thenc hvlc jix htenc kuex yvmx khoc lac yaungx vtvnx? Tishox rueq mungkawx taksux tharc kuex vngauk vngaz khuec guez muex tvyaungc gay tueq!

²¹Yvmx khoc lac ngoz ruiux lec miqsaz rueq miqmac taksux tharc maq Tishox kuex tuiuz lot muq tvkoc vpiq taksux maq tvhungx shec tueq, khuec guez tvrac rvtueq ngoz tueq miq rueq tvmaung yaq, naungshiq rueq jungphvnx vshix bomjungc kvmaq Tishox rueq vpiq muex kvmluimx jix htenc kuex palc daungc wvnc tvkoc htvp htaz wvnc tueq.

²²Yuda miqsaz htenc rueq romzyac thoz yaq, Greek miqsaz htenc rueq taksux tharc thuiyx yaq.

²³Nuiyshiq rueq kuex yauk juinc bulx nuex but gay tueq Christu lvmz jungphvnx vshix, kvruex lvmz bomjungc kuex Yuda miqsaz tvkoc thuinz tvkhvy juing dvyx, Pungnuk miqsaz tvkoc kuex vkhuec vlvmz vguez muex yaungx yaq;

²⁴yuq muinz Tishox rueq gvlc rvhumc jix Yuda miqsaz nuiyc Pungnuk miqsaz tvkoc Tishox luimc vkawc nuiyc Tishox taksux tharc kuex Christu bomjungc vruex rvtueq.

²⁵Yvmx khoc lac ngoz ruiux lec Tishox vngauk vngaz lvmz rvtueq ngoz tueq tvmaung yaq lvmz kuex miqsaz taksux tharc htauk nuex jvnc vtueq httax yaq, Tishox hungc vlaungc vnulx ikhoc ngoz tueq tvmaung yaq kuex miqsaz hungc vlaungc htauk nuex hungc hvlc rvtueq.

²⁶Phunox bix lex, nuimshiq kuex Tishox rueq gvlc max rvhumc jauz wawc kuex tvmaung wuez shuinz. Miqsaz kox maq lawc ix ngoz ruiux kuex taksux tharc vhttax jix, luimc vkawc yunghvlc jix, vyungx vlaungx phvnx ngoz tueq paunghvlc nuimshiq nuex lomx vtuinx rvmuq.

²⁷Yuq muinz Tishox rueq tharc vhttax jix htenc kuex tvyvlc sac tvkoc mungkawx nuex vngauk vngaz jix htenc ngoz tueq wvl yaq htenc kuex thvl wvnc tueq, hungc vlaungc vhttax jix htenc kuex tvyvlc sac tvkoc mungkawx nuex hungc vlaungc vguez ngoz tueq tvmaung yaq jix htenc kuex thvl wvnc tueq.

²⁸Mungkawx vyuq vkhek pinhtumc jix ngoz yaq htenc kuex rop tvbac gay tvkoc mungkawx nuex vwvlc mvy muq, shummarc laukkac rvhumc yaq nuiyc yvmx muinz rvmuq phvnx ngoz tueq tvmaung yaq htenc kuex thvl taq tueq.

²⁹Kvruex vlvmz kuex Tishox khaungkac nuex ukhaq muinz laungc jungc juing lvmx vguez.

³⁰Tishox rueq nuimshiq kuex Yesu Christu rulc vshiz dvyx tvyaungc kv-phuinx, Tishox rueq Christu kuex naungshiq taksux tharc muex tvyaungc phuex. Vpiq maq Tishox khaungkac nuex naungshiq kuex tvtsuing tvrux wvnc phuex, naungshiq kuex Tishox miqsaz vsawc muex yaungx vtueq mvrax wawc dawc kuy rvhumc wvnc tiq.

³¹Kvkhoc rvtueq Rumvrc luik nuex jungx shec tueq rulc rv-ngvlc, “Kvsomc parc roc jix waz kuex Taungjix rueq shuimx wvnc tueq yauk shuimc laung nuex mkvsomc parc kueq,” ngoz tueq.