Read Tase Naga 1 KORINHTU 2 Bible Online

1 KORINHTU 2 - Tase Naga bible

1 KORINHTU 2

¹Kvkhoc rvtueq phunox bix lex, ngaz nuimshiq kox nuex kaz vtueq Tishox bomjungc thuiuz sungx yaq lvmx jungphvnx wvnc tauk nuex, vtuiuz muex gvrc hvlc kvjaz nuiyc taksux kvjaz maq jungphvnx wvnc tauk rvmuq.

²Yvmx khoc lac ngoz ruiux lec ngaz nuimshiq rulc vdvmz nuex httax tauk jauz, Yesu Christu lvmx nuiyc yauk juinc bulx nuex vpiq vthueyc khvmc tueq lvmx, kvruex htauk nuex lvy vtueq vganc phvnx htenc kuex rvwvl mauk tvkoc ngaz rueq htvp htaz tauk.

³Kvkhoc rvtueq ngaz nuimshiq kox nuex kaz raungx ikaq hungc vlaungc vnulx nuiyc hisungx kvkhuirc yaq lvmx maq,

⁴ngaz rueq tvluing kuq wvnc tauk nuiyc jungphvnx wvnc tauk bomjungc htenc kuex miqsaz taksux tharc kvjaz htenc maq kvjak mauk maq, Tishox Siyac luimc vkawc lomx yaq kvjaz htenc dvyx kvjak wvnc tauk.

⁵Kvkhoc rvtueq nuimshiq kvmluimx thuinz kuex, miqsaz taksux tharc htauk nuex rvwak muit maq, Tishox luimc vkawc htauk nuex dvyx rvwak aungx yaq.

⁶Yuq muinz ngaz rueq taksux tharc bomjungc kuex siyac nuex rullungx nyuiuz waz yaungx yaq jix htenc muex dvyx jungphvnx tauk, kvruex taksux tharc kuex mungkawx nuex seng muq, mungkawx wawc vyungx vlaungx bix muex muinz seng muq, mungkawx wawc vyungx vlaungx bix luimc vkawc kuex vmoz vmaq wvnc ngoz tueq dvyx httax yaq.

⁷Ngaz rueq jungphvnx wvnc tauk taksux tharc kuex miqsaz rueq khiz muq tay muq juing vhttuiyq vpuiuc vruez shec thuiuz sungx hvlc Tishox taksux tharc lvmz rvtueq. Kvruex kuex mungkawx max tvdung jauz nuex phuex naungshiq ngauz vngax lvp wvnc tvkoc Tishox rueq vtaq kvmungx rvtueq.

⁸Mungkawx vwawc vyungx vlaungx yaungc jix ukhaq rueq muinz taksux tharc vruex tuiuz lot muq. Mkhoc shoc maq tsuingshiq rueq tuiuz ruiux yuq kuex vphez vlez ngauz vngax vhttax Taungjix kuex tsuingshiq rueq yauk juinc bulx nuex but gay muq rvkhvmz tueq.

⁹Yuq muinz Rumvrc luik nuex: “Uraq muinz khiz muq tay muq lvmz yaungx wvnc tuex ngoz tueq uraq muinz rvwvl wvnc muq lvmz kuex, Tishox rueq vpiq muex lungwawc jix htenc tvkoc tvhungx shec tueq,” ngoz tueq wuiyq shec tueq.

¹⁰Yuq muinz Tishox vpiq rueq vhttuiyq vpuiuc vruez kuex Siyac maq naungshiq muex tvkhic kuq yaq. Siyac rueq httax yaq lotlaz dvyx muinz rvmuq, Tishox rueq vhttuiyq vruez thuiuz sungx hvlc kvmungx thuinz htenc muinz thuiyx lot yaq.

¹¹Miq vshiz lvmz httax yaq lotlaz kuex kvruex waz mungx nuex httax yaq piq siyac rueq jix tuiuz yaq, kvrulc rv-ngvlc Tishox Siyac rueq dvyx Tishox lvmz tuiuz lot yaq.

¹²Naungshiq rueq vruex mungkawx nuex seng yaq siyac kuex lvp wvnc tiq rvmuq; Tishox rueq naungshiq muex vkuq kejux lotlaz kuex mlvp wvnc shueq ngoz tueq, Tishox rueq vtvkaz Siyac kuex lvp wvnc tiq.

¹³Kvkhoc rvtueq Siyac lvp wvnc jix htenc muex Siyac nuex seng yaq tsuingrux lvmz htenc kuex jalc jungx shix nuex, naungshiq rueq miqsaz taksux tharc kvjaz kuex kvjak miq, Siyac rueq tvjungc phvnc yaq kvjaz dvyx kvjak vtix.

¹⁴Siyac lvp wvnc muq waz kuex, Siyac rueq vkuq yauk noalc kuex lvp lot muq, Siyac nuex vjungx tvjvp ruiux yuq jix, kvruex phvnx vhtawz vrawz kuex tv-phvlc tuiuz lot yaq ningkhvnc nuex, Siyac lvp wvnc muq waz kuex Siyac yauk noalc kejux muinz tuiuz lot muq, piq tvkoc kvruex phvnx htenc kuex khuec guez muex yaungx yaq.

¹⁵Siyac httax yaq waz rueq kuex phvnx ruip saz htawz vrawz tv-phvlc htvp htaz lot yaq, yuq muinz vpiq kuex miq uraq muinz htvp htaz lot muq.

¹⁶Rumvrc luik nuex: “Uraq lac Taungjix thuinz kuex tuiuz lot yaq nguinx? Uraq lac vpiq muex tharc jungx kuq lot shvnx?” ngoz tueq wuiyq shec tueq. Naungshiq rueq Christu thuinz kuex lvp wvnc wuez tiq.