Read Tase Naga 1 KORINHTU 5 Bible Online

1 KORINHTU 5 - Tase Naga bible

1 KORINHTU 5

¹Majuiuc, kvmluimx muq miqsaz rueq doc muinz rvwuez muq rvhtok pawx lvmx nuimshiq nuex httax yaq lvmz ngaz rueq tay vshaungx. Miq washiz kuex vwaz taungnyuiuz, vsuiy rulc httax yaq lvmx ngaz rueq tay tauk!

²Kvkhoc rvtueq nuimshiq kuex yvmx khoc lac kvsomc parc lot tuinx? Nuimshiq kuex thuinbac juing rvhumc aungx yaq, kvkhoc yaq jix waz kuex nuimshiq phungc kvwawc tvdungc yurc gay aungx yaq.

³Ngaz kuex nuimshiq kox nuex ngvy shauk pumz httuiuc kaz mauk yuq muinz siyac thuinz kuex nuimshiq rulc vdvmz httax yaq. Ngvy shauk pumz kuex nuimshiq kox nuex vhttuiuc kaz ikhoc, kvkhoc vshuy vshac shuimc jix kuex naungshiq Taungjix Yesu muingc maq ngaz rueq majuiuc doc muinz phox kuq vshaungx. Nuimshiq rvtuimx vtuinx kvyuq ngvy siyac muinz httuiuc kaz yaq, naungshiq Taungjix Yesu luimc vkawc maq nuimshiq rulc vdvmz nuex httax taungx.

⁵Khac phox shuex Taungjix Raungnuiyq nuex kvruex waz siyac palc daungc wvnc rvhumc tvkoc piq shauk vgvnz tvbac gay juing ningkhvnc nuex nuimshiq rueq piq kuex Satan yauk nuex lekuq gay shuinx.

⁶Nuimshiq ngamc ngax kuex vyaq rvtueq, “Wisiz raungluingx saz rueq wanx wv-phux tuimx tvwuiz gay yaq,” ngoz tueq kvjaz kuex nuimshiq rueq tuiuz vshuinx.

⁷Nuimshiq vsawc yaungc tvkoc wisiz vkez ngoz yaq mvrax kuex dawc tuip gay shuinx. Kvkaq jix nuimshiq kuex wisiz lomx muq wanx phux vnyalx ikhoc yaungx wuez tuinx, kvkhoc nuimshiq rvkhauk laz yaungx tuinx kuex ngaz rueq tuiuz vshaungx. Yvmx khoc lac ngoz ruiux lec Tvlvy Wvnc khelbuenx ngoz yaq Christu maq shomc nawk kuq wvnc tiq shex ningkhvnc nuex naungshiq Tvlvy Wvnc Moalx tvkoc tvyoalc yoalx shex.

⁸Kvkhoc rvtueq mvrax nuiyc layx bac ngoz yaq wisiz vkez lomx yaq wanx phux maq rvmuq maq, vsawc thuinz nuiyc tsuingrux ngoz yaq wisiz lomx muq wanx phux maq Tvlvy Wvnc Moalx moalx wuez ix.

⁹Kungkhux nuex wuiyq tvwvnc kuq phaungx luik iyuq sahtok sapawx jix rulc nauk rvkung taungc naungx kaz ngoz tueq ngaz rueq tvtay kuq phaungx.

¹⁰Kvkhoc tvtay jungx phaungx nuex mungkawx nuex sahtok sapawx yaungc jix htenc, khelric bac jix, vguiuq jix, yac yuimx nawk jix htenc rulc rvkung taungc mvy muq ngoz tueq ngoc rvmuq. Tsuingshiq kuex koayc gay laz juing ngoz ruiux kuex nuimshiq vruex mungkawx vwawc dungc wvnc juing shex rvtuex.

¹¹Ngaz rueq jungc roc kuex miqmac pumz kuex Christan phuz vnox waz ngoz tueq kv-ngoc ruiux sahtok sapawx yaungc jix, khelric bac jix, yac yuimx nawk jix, miq muingc jungc tvbac jix, joaljuk tsvmpawc jix, vguiuq jix kvruex ngoc rvtueq, kvkhoc jix miq rulc vdvmz nuex ngaungc vtueq nauk phauk saq kaz.

¹²Phungc miqsaz rvmuq jix muex phoc kuy tvkoc kuex ngvy yauk shuimc rvmuq, tsuingshiq muex Tishox rueq jix phox kuq shuex. Yuq muinz nuimshiq rueq miqmac phungc wawc miqsaz muex phoc kuy kuex aungx yaq rvmuq haz? Rumvrc luik nuex jungx shec tueq rulc rv-ngvlc, “Nuimshiq phungc wawc vshuy vshac jix miq kuex tvdux yurc gay shuinx,” ngoz tueq.