Read Tase Naga 1 KORINHTU 6 Bible Online

1 KORINHTU 6 - Tase Naga bible

1 KORINHTU 6

¹Nuimshiq vdvmz dvmz khuec vkhac dung ruiux yuq, Tishox miqsaz htenc rueq tvraz tsaz kuq yaq kuex lvp wvnc tvraung, yvmx ngoz tueq lac pungmungx jix phoc waz kox nuex kaz khvmc vtuinx?

²Tishox miqsaz htenc rueq mungkawx kuex phox shuex lvmz nuimshiq rueq tuiuz muit haz? Mungkawx phoc gay jix nuimshiq kuex khuec vkhac raungluingx saz kvdoc muinz phox kuq lot muit haz?

³Naungshiq rueq raungkamx waz hez muex doc muinz phoc kuy juing rvtuex lvmz kuex nuimshiq rueq tuiuz muit haz? Kvkhoc rvtueq mungkawx lvmz htenc kuex pinhtumc phoc kuy thenc juing rvtueq!

⁴Kvkhoc khuec vkhac dung ruiux yuq phungc nuex seng muq jix muex haz tv-phoc shuinx?

⁵Nuimshiq tvyvlc sac muex jungx vphaungx! Christan miqsaz vdvmz dvmz khuec vkhac dung ruiux yuq, tsuingshiq nuex khac phoc kuy lot jix wvtharc miq vshiz muinz vguez haz?

⁶Kvkhoc ruec tvraung, Christan phunox washiz rueq vdvmz dvmz rvshawk tvkoc tvrac rungx nuex kaz vtueq kvmluimx muq miqsaz muex khac kuex tv-phox yaq nyix!

⁷Kvkhoc nuimshiq vdvmz dvmz rvshawk vtuinx lvmz vruex kuex nuimshiq sumrumx juing lvmx dvyx rvtueq. Vrvshawk ngoc mvnx tvrac muq maq guirguenz yaq kuex rvhumc ruiux waz vhvlx rvmuq haz? Yauk laungc yalawx rvhumc kuex vhvlx pinhtumc rvmuq haz?

⁸Nuimshiq kuex kvkhoc rvhumc tvraung, nuimshiq phunox nyanox vdvmz dvmz rvmop jap wuez vtuinx!

⁹Layx bac jix htenc kuex Tishox Mungtan guimz lvp wvnc shuex rvmuq, nuimshiq rueq tuiuz vshuinx. Miqmac shauk vgvnz kuex nauk tvrot kaq kaz, sahtok sapawx yaungc jix, yac yuimx nawk jix, miqjuik senc jix, miqwaz vdvmz dvmz, rvmuq ngoz ruiux yalxjuik vdvmz dvmz rvhtok pawx jix htenc,

¹⁰Vguiuq vrot jix, khelric bac jix, joal pawc jix, miq jungc svy jix nuiyc miq yomnamc jix htenc rueq Tishox Mungtan guimz lvp wvnc shuex rvmuq.

¹¹Kungkhux nuex nuimshiq wvyvmc kuex kvkhoc jix htenc rvtuit. Yuq muinz mvrax dawc kuy rvhumc tuit shex; Tishox muex nawk palx jix htenc shex rvtuit; Taungjix Yesu Christu maq muinz, naungshiq Tishox Siyac maq muinz Tishox rulc rvkhauk laz rvhumc hemc vkhangx lvp wvnc tuit.

¹²Nuimshiq wawc vshiz shiz rueq, “Ngaz rueq yvmx yuq muinz shuimc mvy yaq,” ngoz tueq ngoz shuinx. Nuimshiq rueq jungx vshuinx kvkhoc aungx yaq; yuq muinz phvnx ruip saz kuex nuimshiq tvkoc vjux httax yaq rvmuq. Ngaz rueq yvmx yuq muinz shuimc mvy yaq ngoz tueq jungc mvy yaq, yuq muinz ngaz rueq shuimx shaungx yvmx yuq muinz ngaz kuex kvruex dax muex tvyaungc yaq rvmuq.

¹³“Phuiuz vsvy kuex wuk tvkoc rvtueq, wuk kuex phuiuz vsvy tvkoc rvtueq,” ngoz tueq ngoz shuinx. Kvruex kuex rvtueq; yuq muinz Tishox rueq phvnx nueyc rac tvbac gay shuex. Gvnngvmx kuex sahtok sapawx yaungc tvkoc rvmuq, Taungjix shuimc kuy tvkoc rvtueq. Tishox rueq muinz gvnngvmx nuex rax yaq phvnx kuex kuq yaq.

¹⁴Tishox rueq Taungjix kuex vthueyc wawc tvyuing tvtenc wvnc tueq, naungshiq muinz vpiq luimc vkawc maq tvyuing tvtenc wvnc phuex.

¹⁵Nuimshiq shauk vpumz kuex Christu guix vgvnz phux rvtueq kuex nuimshiq rueq tuiuz muit haz? Ngaz rueq Christu guix vgvnz phux kuex lvmz vtueq mephex[1] nyuiuz gvnz muex haz tvyaungc gay shaungx? Kvkhoc kuex mvy muq!

¹⁶Mephex nyuiuz rulc htokpawx jix kuex mephex nyuiuz rulc gvnngvmx pumz shiz dvyx yaungx yaq lvmx nuimshiq rueq tuiuz muit haz? Rumvrc luik nuex, “Tsuingnueyc kuex vshiz dvyx shex rvtueq,” ngoz tueq jungx shec tueq.

¹⁷Yuq muinz Taungjix rulc rvjuy tuc jix waz kuex siyac lvmx maq vpiq rulc gvnngvmx vshiz dvyx rvtueq.

¹⁸Sahtok sapawx lvmx kuex koayc shuinz. Vganc phvnx mvrax rueq miqsaz shauk vgvnz tvbac gay lot muq, sahtok sapawx yaungc jix waz kuex miqmac shauk vgvnz muex yaq gay jix rvtueq.

¹⁹Nuimshiq shauk pumz kuex Tishox rueq vkuq, nuimshiq thuinz vmungx nuex httax yaq Vsawc Siyac shomc yuimx rvtueq kuex nuimshiq rueq tuiuz muit haz? Nuimshiq rueq nuimshiq shauk pumz kuex guimz vshuinx rvmuq, Tishox rueq dvyx guimz yaq.

²⁰Vpiq rueq nuimshiq kuex vhtawz vrawz kuq vtueq vruiyx shec ningkhvnc nuex, nuimshiq shauk pumz kuex Tishox ngauz vngax tvdungc tvkoc shuimx wuez shuinz.