Read Tase Naga 2 KORINHTU 11 Bible Online

2 KORINHTU 11 - Tase Naga bible

2 KORINHTU 11

¹Ngaz phuinz shiz ngauk ngaz itauk kuex nuimshiq rueq nanx kuq kuit ngaz rueq roc vshaungx. Kejux maq nanx kuq wuez kuit!

²Tishox rueq nuimshiq muex khelric sac yaq kvkhoc ngaz muinz nuimshiq muex khelric sac yaq; nuimshiq rueq Christu kuex vtaungx waz washiz dvyx ikhoc rvlvmc tvkoc ngvy bomkhvmc kuy yoalx yalxtux nyuiuz rulc rv-ngvlc vtuinx.

³Ewa kuex puiuc tharc vkoarx vrot vkaq maq lauc rvhumc tueq ikhoc, nuimshiq muinz thuinz kvlayc wvnc vtueq Christu muex lungwawx raungc raq vshuinx kuex httvr gay liq luez ngoz tueq rvwvl vtaungx.

⁴Yvmx khoc lac ngoz ruiux lec miq washiz shiz kuex nuimshiq kox nuex httuiuc kaz vtueq, nuiyshiq rueq jungphvnx kuq phix waz Yesu lvmx kuex rvmuq maq, vganc washiz lvmx kuex jungphvnx kuq ruiux yuq nuimshiq rueq kokez thuinz maq lvp wvnc wuez tuit; nuimshiq rueq nuiyshiq kox wawc tay wvnc tuit shuenruenc bomjungc kvrulc rv-ngvlc muq bomjungc muinz, kungkhux nuex lvp wvnc tuit Siyac rulc raungluingx muinz rv-ngvlc muq siyac kvruex muinz lvp wvnc tuit!

⁵Ngaz kuex nuimshiq muex vyungx pinhtumc “kamx waz” hez ngoz tueq tvtsvmc vshuinx kamx waz hez mac raungluingx saz doc muinz yomx mauk ngoz tueq tvmaung vshaungx!

⁶Ngaz kuex vjungc vphvnc kuy thenc mauk ngoz ruiux muinz phaqjic lvmx nuex kuex kvkhoc rvmauk; ngaz rueq mrvkaq yuq muinz phvnx ruip saz nuex vlvmx vruex nuimshiq muex vhvlx waq tvtuiuz kuq phaungx.

⁷Ngaz rueq nuimshiq muingc jungc tvdungc tvkoc miqmac shauk vgvnz kuex tvyomz gay ruiux, Tishox Thuix Thaungx Vhvlx kuex vhtawz vrawz thoz mauk maq jungc tvtay kuq vphaungx kuex vyaq haz?

⁸Ngaz rueq nuimshiq kox nuex phungc yauk shuimx tauk baunglaung vshuimx lvmx svy kuex phungc vganc jix muex tvkuq tauk, ngaz rueq nuimshiq romc kuy tvkoc phungc vbez htenc wawc yauk laungc maq nyvlc wvnc ikhoc yaungx tueq.

⁹Kvruex dvyx muinz rvmuq, ngaz nuimshiq kox nuex httax tauk baunglaung kuimphox sawxnoz rax ruiux muinz nuimshiq tvtsux tsaungx mauk doc. Makedonia mungx maq vkaz phunox bix rueq dvyx ngaz muex rax yaq kuex lvmz kuq laq phuex, ngvy tvkoc nuex nuimshiq muex tvtsux tsaungx mauk doc, yix maq muinz tvtsux tsaungx phaungx rvmuq.

¹⁰Vkhoc ngaz kvsomc parc vtaungx kuex Akaia mungx jix lotlaz rueq muinz tuingshaung kuq lot phuex rvmuq lvmx kuex, ngaz nuex httax yaq Christu tsuingrux lvmx nuex rvwak vtueq khvmc kuq vphaungx.

¹¹Ngaz rueq vkhoc jungx vshaungx kuex ngaz rueq nuimshiq muex lungwawx mauk rvtueq haz? Ngaz rueq lungwawx phaungx lvmx kuex Tishox rueq tuiuz yaq!

¹²Nuiyshiq rueq shuimx vshix kvkhoc shuimx vshix ngoz tueq kvsomc parc vkhangx kuex kvruex “kamx waz hez” rueq lvp muq tvkoc ngaz rueq majuiuc shuimx shaungx vkhoc dvyx shuimx wvnc shaungx.

¹³Kvruex hez kuex tsuingrux kamx waz hez rvmuq, tsuinghez kuex Christu kamx waz ikhoc kvyaungx shaungx vtueq laulawc shuimc kay jix hez rvtueq.

¹⁴Tsuingshiq rueq kvkhoc shuimx yaq kuex vwangc juing rvmuq! Satan doc muinz raungwuic kamx waz ikhoc kvguirc guenc lot yaq.

¹⁵Kvkhoc rvtueq piq nvrc waz hez kuex tsuingrux lvmz jungphvnc kuy jix nvrc waz hez ikhoc kvyaungx shaungx yaq kuex vwangc juing rvmuq. Vtvsuip nuex tsuingshiq rueq shuimx wvnc tueq yauk shuimc rulc rv-ngvlc lvp aungx yaq vhtawz vrawz kuex lvp wvnc shuex.

¹⁶Ngaz rueq kvhtvp jungx yek ix: ngaz ngoc vngaz ngoz tueq uraq muinz nauk tvmaung kaz. Yuq muinz nuimshiq rueq tvmaung ruiux kuex vngaz waz ikhoc tvyaungc vtueq lvp wvnc kuit, kvkhoc ngoz ruiux jix ngaz kvsomc parc juing raungluingx lvp shaungx.

¹⁷Majuiuc kvsomc parc jungphvnx vshaungx kuex Taungjix thuinroc lvmx rvmuq; vngauk vngaz ikhoc ngaz kvsomc parc jungx vshaungx rvtueq.

¹⁸Yuq muinz miq vpaung kox kuex gvnngvmx lvmx nuex kvtsvmc kvmc yaq ningkhvnc nuex ngaz muinz tsuingshiq kvkhoc kvtsvmc kvmc taungx.

¹⁹Nuimshiq kuex taksux tharc httax vtueq vngauk vngaz htenc muex vkoz vkez maq nanx kuq vshuinx!

²⁰Nuimshiq kuex nuimshiq muex nvrc phuiuz svy jix, vnyvlc phuiuz svy jix, vlap tvdungc jix, miq yomnamc jix nuiyc nuimshiq htvlx phawc nuex wungc jix htenc muex nanx kuq vshuinx.

²¹Nuiyshiq rueq kvkhoc shuimc tvkoc khvmc miq lvmx kuex kvjungc tvkoc doc muinz yvlc sac vtix! Yuq muinz miq washiz shiz kuex phvnx shishiz lvmx nuex kvsomc parc ruiux yuq, ngaz muinz vngauk vngaz waz ikhoc maq jungx khvmc shaungx.

²²Tsuingshiq kuex Hebre miqsaz haz? Ngaz muinz rvtauk. Tsuingshiq kuex Israel miqsaz haz? Ngaz muinz rvtauk. Tsuingshiq kuex Abraham suiuz vsaz haz? Ngaz muinz rvtauk.

²³Tsuingshiq kuex Christu nvrc waz hez haz? Ngaz waz juex vhvlx pinhtumc Christu nvrc waz rvtauk, ngoz tueq vngauk vngaz ikhoc yaungx vtueq jungx ix. Ngaz kuex tsuingshiq htauk nuex vjvnc vhunc vnyec rvhumc vtueq phungc yauk shuimx wvnc tauk, tsuingshiq htauk nuex vjvnc khoktep nuex paunghvlc lauk shuiuz rvhumc tauk, svnthuingx maq wungc muinz pinhtumc rvhumc tauk, vthueyc juing nuex muinz paunghvlc rvhumc tauk.

²⁴Yuda miqsaz rueq ngaz kuex tumc rokthuimx rac tumc tvkuiuz wungc kuex lauk bv-ngac rvhumc tauk.

²⁵Roma miqsaz htenc rueq svnthuingx maq wungc laukthuimx rvhumc tauk; lung maq tuip muinz laukshiz rvhumc tauk, svngpholix bac kay muinz laukthuimx rvhumc tauk, svmuktvrax nuex muinz raungnuiyq shiz rac vwvrx wvrshiz joay tauk.

²⁶Ngaz miq ghaq lvmx khuemx wvnc tauk nuex, yuix rueq luimz muinz, yauk laungc yalawx jix rueq muinz, ngvy phvnx Yuda miqsaz htenc rueq guirguenc, Pungnuk miqsaz htenc rueq ruez phuex, miq ghaqyungx htenc nuex rvhumc tauk kuilc daz, rumz htenc maq rvhumc tauk kuilc daz, svmuktvrax maq rvhumc tauk kuilc daz htenc rvhumc wvnc tauk.

²⁷Yauk shuimc hunnyec hvlc maq shuimx kaz vtueq kvtsoalx muinz lvp mauk, khvmx vrvmc thuiuz muinz, yuix humc nuingx mauk muinz, phuiuz vsvy phoay laz phauk saq mauk muinz, yuimx guez wuik guez, khoguez khvyguez maq kuilc daz muinz rvhumc wvnc tauk.

²⁸Vkhoc kuilc daz jamjaux nuiyc vganc kuilc daz juing maq lvy vtueq phungc tvkoc nuex wvraungx nuiyq rvwvlc tvmaung httax vtaungx.

²⁹Hungc vlaungc nulx jix vshiz shiz httax ruiux yuq, ngaz muinz hungc vlaungc nulx yaq, miq vshiz shiz mvrax nuex rul wvnc ruiux yuq, ngaz thuinbac vtaungx.

³⁰Kvsomc parc ix ngoz ruiux yuq, ngaz mtanc lac hungc vlaungc nulx yaq lvmx nuex kvsomc parc juing rvtueq.

³¹Ngaz rueq vrot vkaq kvjaz jungx mauk lvmx kuex Taungjix Yesu vpiq Waz Tishox rueq tuiuz yaq, vpiq muingc jungc kuex pattup mhttax kueq!

³²Ngaz Damasku ghaq nuex httax tauk baunglaung Hokhvmx Areta yauk khung wawc mungx walaungx waz rueq ngvy lvp tvkoc ghaqyungx palx kaluix htenc nuex vbvmc jix htenc taq tueq.

³³Yuq muinz kungjix bix rueq ngaz kuex boarx nuex htawc vtueq ghaqyungx palx ruk katvnc puc maq tvsvt kuy ningkhvnc nuex hokhvmx waz yauk wawc luenx wvnc tauk.