Read Tase Naga EPHESU 3 Bible Online

EPHESU 3 - Tase Naga bible

EPHESU 3

¹Vruex lvmz ningkhvnc nuex, Christu Yesu khoktep miq ngaz Polu rueq, nuimshiq Pungnuk miqsaz htenc tvkoc Tishox kox wawc vjux thoz vshaungx.

²Tishox rueq vpiq kejux maq nuimshiq vhvlx tvkoc nuex vruex yauk shuimc muex, ngaz muex kuq phuex lvmx kuex nuimshiq rueq vsuing tay wvnc tuit shec rvtueq.

³Tishox rueq vpiq vthuiuz vsungx kvmungx lvmx kuex ngaz muex tvkhic kuq phuex. (Vruex lvmz nuex seng vtueq vtut maq ngaz rueq wuiyq wvnc tauk,

⁴nuimshiq rueq ngaz rueq vwuiyq luik kuex wvllawc ruiux yuq, Christu nuex seng vtueq ngaz rueq tuiuz tay vshaungx vthuiuz vsungx lvmz kuex nuimshiq rueq tvluing wvnc shuinx rvtueq.)

⁵Lvy wvnc tueq vkhing nuex vruex thuiuz sungx hvlc lvmz kuex miqsaz muex jungx muq doc, yuq muinz Tishox rueq majuiuc kuex vpiq vsawc kamx waz hez nuiyc shvmmax bix muex Siyac maq tvkhic kuq wvnc tueq.

⁶Kvruex thuiuz sungx hvlc lvmz kuex shuenruenc bomjungc maq Pungnuk miqsaz htenc rueq Yuda miqsaz htenc rulc vdvmz nuex Tishox ruimrix kejux lvp wvnc vkhangx lvp tueq lvmz rvtueq; tsuingshiq kuex shauk pumz vshiz wawc gvnngvmx htenc rvtueq Christu Yesu maq Tishox rueq vkuq bomkhvmc kuex lvp luz wvnc vkhangx lvp wvnc wuez tueq.

⁷Vpiq luimc vkawc yauk shuimx yaq rulc rv-ngvlc, ngaz muex Tishox rueq vkuq htep yauk noalc maq shuenruenc bomjungc nvrc waz muex ngaz kuex tvyaungc phuex.

⁸Ngaz kuex Tishox miqsaz htenc nuex vruinx pinhtumc htauk nuex muinz yomx hvlc waz rvtauk; yuq muinz Tishox rueq Christu rungwanx lvmx nuex seng yaq Thuix Thaungx Vhvlx kuex Pungnuk miqsaz htenc kox nuex lvmc lvy tvkoc muinz,

⁹Tishox rueq vhttuiyq vpuiuc vruez kvmungx lvmz yvmx khoc maq lac yaungx wvnc tvnx lvmx kuex miq lotlaz muex tvtuiuz tvkhic tvkoc muinz, Tishox rueq kvruex vkhangx kuex ngaz muex kuq phuex. Phvnx ruip saz Tvdungc Sungc jix Tishox rueq vpiq vthuiuz vsungx lvmz kuex patshiz maq patshiz wawc httuiyq taq shec tueq.

¹⁰Kvkhoc shuimx wvnc tueq lvmx kuex raungkamx bix nuex seng yaq guimz lawc jix htenc nuiyc raungmungx mungtan wawc luimc vkawc htenc kuex Taungjix taksux tharc phvnx ruip kuex majuiuc vkhing nuex phungc maq tvtuiuz wvnc tvkoc rvtueq.

¹¹Tishox vpiq rueq pattup kvmungx wvnc tueq rulc rv-ngvlc, naungshiq Taungjix Christu Yesu maq kvruex lvmz kuex vpiq rueq tvyaungx wvnc tueq.

¹²Naungshiq kuex Christu rulc vshiz dvyx yaungx vtix ningkhvnc nuex muinz, vpiq muex kvmluimx wvnc ningkhvnc nuex muinz, Tishox kox nuex nyuip muex khvmc thuinz lvp wvnc wuez tiq.

¹³Kvkhoc rvtueq nuimshiq tvkoc nuex ngaz rvhumc vtaungx kuilc daz vmac nuimshiq thuinz nauk tvbac kaz; kvruex kuex nuimshiq rueq vjux laung nuex ngaz rvhumc vtaungx rvtueq.

¹⁴Vruez lvmz ningkhvnc nuex raungmungx nuex nuiyc ghaq htauk nuex httax yaq yuimx taungx tek muex tsuingrux vjungx rvtueq

¹⁵Iwaz khaungkac nuex ngaz kuix tsvrung maq bumx vtueq vjux thoz vshaungx.

¹⁶Nuimshiq mungx wawc thuinz vmungx hungc vlaungc mtsanz wvnc kueq, Tishox rueq vpiq ngauz vngax nuiyc phungc yungx rungc yungx tsak vnyvmx wawc Siyac maq nuimshiq muex luimc vkawc mkuq kv-phuinx ngoz tueq muinz,

¹⁷kvmluimx ningkhvnc nuex Christu rueq nuimshiq thuinz vmungx htenc nuex vpiq httaz juing muex mtvyaungc shueq nuiyc lungwawc thuinz nuex htungyaz tvjvp tv-phaungx ruiux,

¹⁸nuimshiq kuex Christu lungwawc thuinz vloayc, vyungc, vjoz, vsungx htenc kuex Tishox miqsaz htenc rulc vdvmz nuex tuiuz wvnc lvp tvkoc ngaz rueq vjux thoz vshaungx.

¹⁹Rvtueq, vpiq lungwawc thuinz kuex mkaq muinz tvsawc ric tuiuz wvnc lot shix rvmuq, yuq muinz nuimshiq rueq vpiq lungwawc thuinz kuex tuiuz wvnc vtueq, Tishox kuex wvgvnz pumz nuimshiq nuex mhttax wvnc kueq, ngoz tueq vjux thoz vshaungx.

²⁰Naungshiq thuinz vmungx kuex vpiq luimc vkawc maq yauk shuimx yaq, naungshiq rueq tuiuz vshiz, rvmuq ngoz ruiux thuinz kvmungx nuex doc muinz jvnc vtueq tvlvy laz shuimx tvyaungc kuq lot yaq,

²¹Tishox rueq phungc ningkhvnc nuex muinz, Christu Yesu ningkhvnc nuex muinz pattup pat-sac ngauz vngax shiz maq patshiz ngauz vngax mdung kvkhic wvnc kueq. Amen.