Read Tase Naga PHILIPI 4 Bible Online

PHILIPI 4 - Tase Naga bible

PHILIPI 4

¹Kvkhoc rvtueq, phunox bix lex, nuimshiq kuex ngaz rueq pinhtumc lungwawx vtueq pinhtumc rvwvl vphaungx! Nuimshiq kuex ngvy kokez kvsomc parc juing muex yaungx tuit! Lungwawc phunox bix lex, Taungjix nuex vshiz dvyx yaungx vtueq rullungx tvraungx lvmx nuex phaungx duingduing jvp wuez kuinz.

²Eodia nuiyc Sintikhe nuimnueyc kuex Taungjix nuex saqnyaz yaungx tuit rulc rv-ngvlc vrungx vraz httaz tvkoc ngaz rueq jungx tvtay vphaungx.

³Ngvy htuiz daungx kuy jix kungjix waz lex, kvruex nyuiuz nueyc muex romc kuy tvkoc jungx vphaungx; yvmx khoc lac ngoz ruiux lec tsuingshiq kuex shuenruenc bomjungc jungc tvtay kuy lvmx nuex ngaz rulc vdvmz hunglaungx shuimc kay naungc jix rvtueq, kvkhoc shuimc kay naungc jix wawc Klemen rulc vdvmz nuex Tishox vpiq rullungx muingc wvlc luik dvp nuex lomx naungc jix ngvy htuiz daungx jix vganc muinz lomx yaq.

⁴Nuimshiq mkaq muinz Taungjix rulc vdvmz nuex tvtuimx yuimx vtueq kokez wuez kuinz. Ngaz rueq jungx yek nyix: kokez wuez kuinz!

⁵Nuimshiq thuinz vnyenz kuex miq lotlaz muex tvkhic shuinz. Taungjix httuiuc kaz yaq shex.

⁶Yvmx lvmz nuex ngoz ruiux muinz nauk rvwvl japa kaz, yuq muinz lvmx ruip saz nuex vjux thoz vtueq kvjungc ruiux kejux rvwvlc thuinz vmungx maq tvtsvmc vtueq, nuimshiq muex rax yaq lvmx kuex Tishox muex tvtay shuinz.

⁷Kvkaq miqsaz rueq tuiuz tay yaq tharc htauk nuex jvnc vtueq Tishox nomic kuex nuimshiq thuinz vmungx htenc nuiyc thuinz htenc kuex Christu Yesu rulc tvkhup wungx kv-phvnx.

⁸Phunox bix lex, tvsuip jungx ix ngoz ruiux yuq, nuimshiq rueq vtsuing vrux, vraungc vraq, vlvmx, vsawc vric, vlungwawc juing, tvtsanc nganc juing ngoz yaq vhvlx maq tvtsvmc kvmc juing phvnx shishiz ngoz ruiux kuex thuinz nuex rvwvl taq wuez shuinz.

⁹Ngvy kvjaz wawc muinz, ngvy yauk shuimc kay waungc wawc muinz nuimshiq rueq tvluing khiz tay wvnc tuit htenc kvruex phvnx wuez shuinz, kvkhoc shuimx ruiux jix naungshiq muex nomic kuy jix waz Tishox kuex nuimshiq rulc vdvmz nuex httax naungx tuex.

¹⁰Vtanc khvnc vkhing httvmx wvnc tueq yix maq nuimshiq rueq ngaz muex menjenc romc kuy roc thuinz lauk shiz hulawx tvkhic kuy yek ningkhvnc nuex, ngaz Taungjix nuex pinhtumc kokez vtaungx. Kvkhoc ngoz ruiux nuimshiq rueq ngaz muex lawc mawc kuq vphuinx kuex tvthauk gay tuit ngoz tueq ngoc rvmuq, kvruex lungwawc thuinz kuex tvkhic kuy vkhangx lvp wvnc muit kvruex ngoc rvtueq.

¹¹Kvkhoc ngaz rueq jungx vshaungx kuex nuimshiq rueq ngaz muex rax yaq rvhvt maq lawc kuq muit ngoz tueq thuinz nuex rvhumc ningkhvnc nuex jungx vshaungx rvmuq. Yvmx khoc lac ngoz ruiux lec ngaz kuex miqmac rueq lvp luz shix tanc khvnc maq thuinz suing ruiux httaz thenc lvmx tvluing wvnc tueq.

¹²Ngaz htemrvmz ruiux muinz, phoay rungx ruiux muinz, hunghtaungx muq ngoz ruiux muinz, vjvnc vnac ngoz ruiux muinz, yvmx khoc vkhing, yvmx khoc baung nuex httax ruiux muinz, thuinhvlc maq httaz ngaungc tvkoc vtvluingc wuez shex rvtueq.

¹³Ngaz muex luimc vkawc tvhungc kuy jix Christu ningkhvnc nuex lotlaz kuex ngaz rueq shuimx lvp vshaungx.

¹⁴Yuq muinz ngaz kuilc daz rvhumc vtaungx baunglaung nuimshiq rueq ngaz muex romc kuy ningkhvnc nuex nuimshiq rueq shuimx tuit kuex vhvlx pinhtumc rvtueq.

¹⁵Philipi phungc miqsaz htenc lex, Makedonia mungx maq ngaz kvtenc wvnc vtueq Thuix Thaungx Vhvlx jungphvnx wvnc tauk raungnuiyq htenc max nuex nuimshiq phungc shiz wuinz rueq dvyx romc kuq wvnc phuinx, phungc yauk shuimc nuex nuimshiq dvyx ngaz rulc vdvmz nuex tvroc shuimx vtueq vsumx nuiyc vlap lvp khvmc jix htenc rvtuit, shuimx kaz wvnc tuit lvmz kuex nuimshiq rueq vhvlx waq tuiuz vshuinx.

¹⁶Thesaloni nuex ngaz httax tauk baunglaung nuimshiq rueq ngaz muex rax yaq nuex shuimc lvmc tvkoc lauk shiz dvyx rvmuq tvgurc kuq wvnc phuinx.

¹⁷Kvkhoc jungx vphaungx kuex yauk noalc lvp roc vtueq rvmuq, nuimshiq yauk shuimc nuex vlap paungc wvnc tvkoc dvyx ngaz rueq roc vshaungx.

¹⁸Nuimshiq rueq vtvgurc kuq wvnc yauk noalc hup vsvmx phvnx ruip saz lvp tauk kuex vruex yuq tvtsuingc taq shec tauk, kvruex yauk noalc hup vsvmx kuex Epaphoditu rueq lvmc kuy wvnc ningkhvnc nuex ngaz muex rax yaq htenc kuex lvp wvnc tauk. Kvruex kuex Tishox muex shomc kuy vhomc vtumc ikhoc muinz, Tishox rueq raungc raq yaq shomc nawk kuy juing ikhoc muinz rvtueq.

¹⁹Kvkhoc rvtueq ngvy Tishox kuex tsak vnyvmx muex rungwanx yaq rulc rv-ngvlc nuimshiq kuex Christu Yesu ningkhvnc nuex nuimshiq muex rax yaq kuex tvhungx tvmvrc kuq kv-phvnx.

²⁰Naungshiq Waz ngoz yaq Tishox kuex pattup pat-sac rullungx wvlex ngauz vngax mhttax wvnc kueq! Amen.

²¹Tishox miqsaz htenc rvtuit Christu Yesu yix phvnc jix lotlaz muex rvbomc vphaungx. Vyuq ngaz rulc vdvmz nuex httaz yaq phunox bix rueq muinz nuimshiq muex rvbomc kuq wuez yaq.

²²Vruex yuq httax yaq Tishox miqsaz lotlaz rueq nuimshiq muex rvbomc kuq yaq, Kesar honoc hoc nuex httaz jix hez rueq htep maq rvbomc kuq yaq.

²³Taungjix Yesu Christu kejux kuex nuimshiq rulc vdvmz nuex mhttax wvnc kueq.