Read Tase Naga YOSHUA 11 Bible Online

YOSHUA 11 - Tase Naga bible

YOSHUA 11

¹Israel miqsaz rueq taungx wvnc tueq thaungc kuex Hazor Hokhvmx waz Jabin rueq tay vtueq, Madon Hokhvmx Jobab, Shimron hokhvmx bix nuiyc Akashapha hokhvmx bix muex muinz,

²ghaqkhux kox kuz hong wawc hokhvmx bix, Galile Jumx maq ghaqyaz kox Yodan Warc tvnx hong jix, kanx yaz hong nuiyc shalx nyuip kox Dor hep taungkawx nuex httax yaq hokhvmx bix kox nuex thaungc tvhttuiuc tueq.

³Piq rueq Yodan ruilx samx wvguip nuex httax yaq Kanaan miqsaz, Amori miqsaz, Hitti miqsaz, Perizi miqsaz nuiyc kuz hong nuex httax yaq Jebusi miqsaz, Mizpa mungx wawc Hermon kanx yaz hong nuex httax yaq Hiwi miqsaz muex thaungc tvtay tueq.

⁴Tsuinghez kuex svmuktvrax phawx wawc kumtsvy ikhoc nolaungx bix paunghvlc maq waung tueq. Tsuinghez nuex mvre nuiyc nolaungx renc htenc paunghvlc httax yaq.

⁵Kvruex hokhvmx bix lotlaz vdvmz nuex rvtuimx ruiux, hungc vlaungc lvmz vtueq Israel miqsaz kuex khvt tvkoc Merom Ruilx kawx nuex jex wuez tueq.

⁶Yehowa rueq Yoshua muex ngoc, “Tsuingshiq muex nauk hiz kaz. Invp raungnuiyq vtanc jauz Israel miqsaz tvkoc tsuingshiq lotlaz kuex ngaz rueq thvt gay shaungx. Mnoz rueq tsuingshiq mvre huk thaq htenc kuex gvnz gay ruiux nolaungx renc htenc kuex wvr maq jauk gay shuiuz,” ngoz tueq jungx tueq.

⁷Kvkaq Yoshua nuiyc piq nolaungx bix rueq Merom Ruilx kawx nuex jex yaq ralx htenc kuex dung phok maq khvt kaz tueq.

⁸Yehowa rueq ralx htenc kuex Israel miqsaz muex tvtaungx gay tueq; Israel miqsaz rueq ghaqkhux kox Sidon ghaq nuiyc Misrephot ghaq nuex httuiuc laz, shaldungc kox Mizpa warc nuex httuiuc laz ralx htenc kuex yurc khvt vtueq washiz muinz tvjungx muq thvt gay tueq.

⁹Yehowa rueq nvr tueq rulc rv-ngvlc Yoshua rueq tsuinghez kuex ruez gay tueq: tsuingshiq mvre huk thaq htenc kuex gvnz gay ruiux, nolaungx renc htenc kuex wvr maq jauk gay tueq.

¹⁰Kvruex yimaq Yoshua kuex yek waung vtueq Hazor ghaq kuex khvt gay ruiux, hokhvmx waz kuex thvt gay tueq. (Kvtanc jauz Hazor ghaq kuex mungtan lotlaz htauk nuex luimc vkawc yunghvlc ghaq rvtueq.)

¹¹Kvyuq httaz jix miq ruip rawx kuex tsuinghez rueq thvt gay ruiux vshiz muinz tvraungx taq muq, ghaqyungx muinz jauk gay tueq.

¹²Yehowa nvrc waz Moshe rueq jungx tueq rulc rv-ngvlc, Yoshua rueq ghaqyungx htenc nuiyc kvruex wawc hokhvmx bix htenc, mungx miqsaz htenc kuex vshiz muinz tvjungx muq thvt gay tueq.

¹³Yuq muinz Yoshua rueq jauk gay tueq Hazor ghaq maq lvy vtueq ghaqluimx poz nuex vtec ghaqyungx htenc kuex Israel miqsaz rueq jauk gay muq doc.

¹⁴Israel miqsaz rueq ghaqyungx htenc kvwawc hup vsvmx httax yaq lotlaz nuiyc suiux vngac htenc kuex miqmac tvkoc lvmz wvnc tueq. Yuq muinz ghaq miqsaz htenc kuex thvt gay ruiux, vshiz muinz tvraungx taq muq.

¹⁵Yehowa rueq vpiq nvrc waz Moshe muex nvr tueq rulc rv-ngvlc, Moshe rueq Yoshua muex tvlvy kuq shec tueq, Yoshua rueq muinz kvrulc rv-ngvlc phvnx tueq. Yehowa rueq Moshe muex nvr tueq phvnx ruip saz kuex piq rueq shuimx tueq.

¹⁶Yoshua rueq mungtan lotlaz kuz hong, tvnx hong, ghaqkhux ghaqyaz htenc, Goshen mungx lotlaz nuiyc kvruex wawc ghaqyaz kox ghaqshanx hong nuiyc Yodan Warc tvnx nuex httuiuc laz khvt taungx gay tueq.

¹⁷Ghaqyaz kox Edom ghaq hep Halak Kanx maq ghaqkhux kox Hermon Kanx maq ghaqyaz kox Lebanon warc tvnx wawc Balgad ghaq nuex httuiuc laz yungx yaq. Yoshua kuex kvruex yuq httaz jix hokhvmx bix rulc loayc hvlc rv-khvt tueq, yuq muinz piq rueq kvruex hez htenc kuex lotlaz lvp vtueq thvt gay tueq.

¹⁹Israel miqsaz rulc nomic rvyaungc jix ghaqyungx kuex Gibeon dvyx rvtueq, kvruex ghaq kvyuq Hiwi miqsaz wvyvmc httax yaq. Vganc lotlaz kuex vkhvt rvgay tueq.

²⁰Israel miqsaz muex khvt khvmc laz juing Yehowa rueq tsuingshiq muex tvhtvp htaz tueq. Kvkaq tsuingshiq kuex tvmaq jup tvbac gay tvkoc htvp htaz rvhumc vtueq, menjenc kuy thuinz vguez maq tsuingshiq lotlaz thvy gay rvhumc tueq. Vruex kuex Yehowa rueq Moshe muex nvr tueq rulc rv-ngvlc yaungx tueq.

²¹Kvtanc jauz Yoshua kuex kaz vtueq Anakim ngoz tueq kvmuingc yaq miq htenc httax yaq kuz hong wawc muinz, Hebron, Debir, Anab ghaqyungx wawc muinz, Yuda nuiyc Israel kuz hong htenc wawc lotlaz muinz tvbac gay tueq. Tsuingshiq nuiyc tsuingshiq ghaqyungx htenc kuex Yoshua rueq tvmaq jup tvbac gay tueq.

²²Anakim miqsaz washiz muinz Israel miqsaz mungtan nuex kvjungx tuex rvmuq, Gaza, Gad nuiyc Ashdod ghaq nuex dvyx raungluingx kvjungx yek yaq.

²³Yoshua kuex Yehowa rueq Moshe muex nvr tueq rulc rv-ngvlc, wvmungx tuimx khvt vtueq Israel miqsaz muex tsuingshiq tsak jungx ghaq muex vpiq rueq kuq vtueq, miqphvnx tek muex phvlx kuq tueq. Kvkhoc rvtueq miq htenc kuex rv-khvt rvlungc yaq wawc nyec tvkuiyq wuez tueq.