Read Tase Naga YOSHUA 13 Bible Online

YOSHUA 13 - Tase Naga bible

YOSHUA 13

¹Yoshua kuex rullungx nyuiuz waz shex rvtueq. Yehowa rueq piq muex ngoc, “Mnoz kuex mrullungx nyuiuz waz shex, yuq muinz vkhvt lvp yek juing ghaqphux kuex yunghvlc doc kvjungx yaq;

²Philistin nuiyc Geshur ghaqphux lotlaz,

³ghaqyaz kox wawc Awim ghaqphux lotlaz rvtueq. (Ejip mungx ghaqruiy nuex rvnvp shauk wawc Shihor ruilx maq Kanaan mungx nuex lomx yaq ghaqkhux kox wawc Ekron ghaq nuex httuiuc laz httax yaq, Philistin hokhvmx bix httax yaq Gaza, Ashdod, Ashkelon, Gad nuiyc Ekron ghaq htenc rvtueq.)

⁴Kanaan miqsaz mungx wvmungx tuimx nuiyc (Sidon miqsaz rueq guimz yaq) Meara ghaq nuex httuiuc laz, Amori mungx ghaqruiy Aphek hong nuex httuiuc laz;

⁵Gebali miqsaz ghaqphux, shaldungc kox nuex httax yaq Lebanon ghaqphux lotlaz, Hermon Kanx maq ghaqyaz kox wawc Balgad maq Harmat Kanx hvlwvl nuex httuiuc laz httax yaq doc.

⁶Lebanon Kanx htenc maq Misrephot Maim hvl nuex httax yaq kuz ghaq wawc miq wvyvmc rvtueq, Sidon miqsaz ghaqphux lotlaz lomx yaq. Israel miqsaz kvtenc waung wvnc ruiux yuq, kvruex miq htenc kuex ngaz rueq yurc gay shaungx. Ngaz rueq mnoz muex nvr phaungx rulc rv-ngvlc Israel miqsaz muex ghaqphux htenc kuex phvlc kuy rax.

⁷Kvkhoc rvtueq majuiuc mnoz rueq miqphvnx tvkuiuz nuiyc Manase phvnx kholak rueq kvruex hong htenc kuex guimz wvnc tvkoc phvlx kuq shuiuz,” ngoz tueq jungx tueq.

⁸Yehowa nvrc waz Moshe rueq ghaq phvlx kuq shec tueq rulc rv-ngvlc, Ruben, Gad nuiyc Manase phvnx kholak muex Yodan Ruilx maq shaldungc kox nuex httax yaq ghaqphux kuex tvlvp tueq.

⁹Tsuinghez rueq ghaqphux kuex (Arnon Warc tvnx khux kox nuex httax yaq) Aroer ghaq nuiyc warc tvnx mungx wawc ghaqyungx nuiyc Medeba maq Dibon nuex httuiuc laz kuz hong htenc kuex lomx tueq.

¹⁰Kvmaq Ammon ghaqruiy nuex httuiuc laz guimz yaq Heshbon ghaq nuex httaz jix Amori hokhvmx Sihon ghaqyungx lotlaz lomx yaq.

¹¹Gilead mungx, Geshur nuiyc Maaka hong htenc, Hermon Kanx lotlaz nuiyc Saleka nuex httuiuc laz yungx yaq Bashan mungx wvmungx tuimz lomx tueq.

¹²Ashtarot nuiyc Edrei ghaq guimz jix Rephaim miqsaz wawc vtvsuip hokhvmx yaungc jix Oga mungtan muinz lomx tueq. Kvruex miq htenc kuex Moshe rueq khvt taungx vtueq yurc gay tueq.

¹³Yuq muinz Israel miqsaz rueq Geshur nuiyc Maaka miqsaz htenc kuex yurc gay muq doc ningkhvnc nuex, Israel mungx nuex httax yaq doc.

¹⁴Moshe rueq Lewi phvnx muex ghaqphux phvlx kuq shec muq doc. Yehowa rueq Moshe muex jungx shec tueq rulc rv-ngvlc, tsuingshiq rueq Yehowa Israel Tishox muex shomrawx htauk nuex wvr maq jauk shomc kuq yaq wawc mvnjuz kuex lvp wuez tueq.

¹⁵Moshe rueq Ruben phvnx wawc vtaungx htenc muex tsuingshiq rueq lvp juing ghaqphux kuex phvlx kuq shec tueq.

¹⁶Tsuingshiq ghaqphux kuex (Arnon Warc tvnx htauk wawc) Aroer ghaq nuiyc warc tvnx mungx wawc ghaqyungx maq raz tueq Medeba tvroz wawc kuz tvnx lotlaz lomx tueq.

¹⁷Heshbon nuiyc kuz tvnx htenc wawc ghaqyungx htenc rvtueq: Dibon, Bamot Bala, Bet Balmeon,

¹⁸Jahaza, Kedemot, Mephaat,

¹⁹Kiriathaim, Sibma, warc tvnx wawc kanx htenc rvtueq Zeret Shahar,

²⁰Betpeor, Pisga kanx yuiuc nuiyc Bet Jeshimot htenc lomx tueq.

²¹Kuz tvnx wawc ghaqyungx lotlaz nuiyc Heshbon ghaq guimz jix Amori hokhvmx Sihon mungtan lotlaz lomx tueq. Moshe rueq kvruex hokhvmx waz rulc vdvmz Median hokhvmx bix rvtueq: Ewi, Rekem, Zur, Hur nuiyc Reba hez htenc kuex khvt taungx gay tueq. Kvruex lotlaz kuex Hokhvmx Sihon rueq guimz yaq mungx nuex rvtueq.

²²Israel miqsaz rueq thvt gay tueq hez kvyuq Beor saz luinglawc jix Balam muinz lomx tueq.

²³Yodan ruilx kuex Ruben phvnx maq shalx nyuip kox ghaqruiy rvtueq. Kvruex ghaqyungx htenc nuiyc miqghaq htenc kuex Ruben phvnx wawc vtaungx htenc rueq guimz juing ghaqphux rvtueq.

²⁴Moshe rueq Gad phvnx wawc vtaungx htenc muex muinz ghaqphux phvlx kuq shec tueq.

²⁵Tsuingshiq ghaqphux kuex Jazer ghaq nuiyc Gilead mungx wawc ghaqyungx lotlaz, Rabba ghaq maq shaldungc kox nuex httax yaq Areora ghaq nuex httuiuc laz Ammon mungx kholak lomx tueq;

²⁶tsuingshiq ghaqphux kuex Heshbon ghaq maq Ramat Mizpe ghaq nuiyc Betonim ghaq nuex httuiuc laz, Mahanaim ghaqruiy maq Lodebar nuex httuiuc laz rvtueq.

²⁷Yodan Warc tvnx nuex httax yaq Bet Haram, Bethanimra, Sukkot nuiyc Saphon ghaq htenc nuiyc Heshbon hokhvmx Sihon rueq guimz tueq wawc kvjungx yaq ghaq htenc lomx tueq. Shalx nyuip kox wawc tsuingshiq ghaqruiy kuex Yodan Ruilx tv-phvnc ghaqkhux kox Galile Jumx nuex httuiuc laz rvtueq.

²⁸Kvruex ghaqyungx htenc nuiyc miqghaq htenc kuex Gad phvnx muex vjumz kuq shec ghaqphux rvtueq.

²⁹Moshe rueq Manase phvnx kholak wawc vtaungx htenc muex muinz ghaqphux phvlx kuq tueq.

³⁰Tsuingshiq ghaqphux kuex Mahanaim nuiyc Bashan lotlaz, Bashan hokhvmx waz Oga rueq guimz yaq mungx lotlaz nuiyc Bashan mungx wawc Jair ghaq lotlaz 60 lomx yaq.

³¹Gilead mungx kholak nuiyc Bashan mungx hokhvmx waz Oga mungtan wawc ghaqyungx htenc rvtueq Ashtarot nuiyc Edrei ghaq muinz lomx tueq. Kvruex lotlaz kuex Manase saz Makhir taungx hez kholak muex vphvlx kuq ghaqphux ghaqruiy rvtueq.

³²Moshe kuex Moba tvnx nuex httuiuc kaz tueq nuex Yerikho ghaq nuiyc Yodan ruilx shaldungc kox hong htenc kuex vkhoc phvlx kuq tueq.

³³Moshe rueq Lewi phvnx muex ghaqphux phvlx kuq shec muq doc. Yehowa Israel Tishox muex shomc kuy juing wawc mvnjuz kuex tsuingshiq rueq lvp shuex ngoz tueq jungx tueq.