Read Tase Naga YOSHUA 17 Bible Online

YOSHUA 17 - Tase Naga bible

YOSHUA 17

¹Yosep saz pekhux waz Manase suiuz vsaz taungx hez wvyvmc muex ruiy kuq tueq ghaqphux kuex Yodan ruilx maq shalx nyuip kox nuex httax yaq ghaq baungshiz rvtueq. Manase saz pekhux, Gilead waz Makhir kuex shvrvyx rvtueq, kvkhoc rvtueq piq rueq Yodan ruilx maq shaldungc kox wawc Gilead nuiyc Bashan kuex piq muex phvlx kuq tueq.

²Manase nuiyc kvjungx yaq taungx hez htenc kuex: Abiezer, Helek, Asriel, Shekhem, Hepher nuiyc Shemida rvtueq. Kvruex hez kuex Yosep saz Manase kox wawc miqwaz saz phvnx ningkhvnc nuex vtaungx htenc muex vkhux yaungc jix hez rvtueq.

³Manase saz Makhir, Makhir saz Gilead, Gilead saz Hepher, Hepher saz Zelophehad rueq vsaz miqwaz lvp muq doc, yalxjuik sahez dvyx httax tueq. Kvruex hez muingc kuex Mala, Noa, Hogla, Milka nuiyc Tirza rvtueq.

⁴Tsuinghez kuex shomc waz Eleazar, Nun saz Yoshua nuiyc walaungx bix kox nuex kaz vtueq, “Nuiyshiq muex muinz nuiyshiq taungnyuing sanox miqwaz rulx muex muinz ghaqphux kuy rax ngoz tueq Yehowa rueq Moshe muex nvr shec tueq,” ngoz tueq jungx tueq. Kvkhoc rvtueq Yehowa rueq nvr tueq rulc rv-ngvlc tsuinghez muex taungnyuing sanox miqwaz rulx rueq lvp tueq kvkhoc tsuinghez rueq muinz lvp wuez tueq.

⁵Kvkhoc rvtueq Yodan ruilx maq shaldungc kox wawc Gilead nuiyc Bashan maq lvy vtueq, ghaq phvlc rokshiz muinz Manase rueq lvp tueq,

⁶piq saz yalxjuik saz suiuz vsaz hez tvkoc muinz ghaqphux phvlc kuy rvhumc wuez tueq. Gilead rueq kvjungx yaq Manase suiuz vsaz hez tvkoc phvlx kuq tueq.

⁷Manase ghaqruiy kuex Asher maq Shekhem ghaq shaldungc kox nuex httax yaq, Mikmethat nuex httuiuc laz rvtueq. Kvruex maq ghaqyaz kox nuex tvyanz laq vtueq Entappua miqsaz httax yaq nuex httuiuc laz rvtueq.

⁸Tappua hong kuex Manase rueq guimz yaq, yuq muinz ghaqruiy htauk wawc Tappua ghaq kuex Ephraim suiuz vsaz rueq guimz yaq.

⁹Kvruex ghaqruiy kuex Kana ruilx kox nuex svt kaz tueq. Kvruex ruilx yaz kox wawc miqghaq htenc kuex Manase ghaq nuex httax yaq, yuq muinz Ephraim rueq guimz yaq. Manase ghaqruiy kuex Kana ruilx khux tv-phvnc kaz wvnc vtueq Svmuktvrax Mediteranean nuex suip tueq.

¹⁰Ephraim kuex ghaqyaz kox nuex rvtueq, Manase kuex ghaqkhux kox nuex rvtueq, Svmuktvrax Mediteranean kuex nuk nueyc vtaungx muex shalx nyuip kox ghaqruiy rvtueq. Shalx nyuip ghaqkhux kox nuex Asher ghaq rvtueq, shaldungc kox nuex Issakar ghaq rvtueq.

¹¹Manase kuex Issakar nuiyc Asher ghaq hong nuex httax yaq Bet Shan, Ebleam nuiyc kvruex tvroz wawc miqghaq htenc, Dor (taungkawx htauk wawc ghaqshiz), Endor, Taanak, Megiddo nuiyc tvroz wawc miqghaq htenc kuex guimz yaq.

¹²Manase miqsaz rueq kvruex ghaq htenc nuex httax yaq miq htenc kuex yurc gay muq ningkhvnc nuex, kvruex baung htenc kvyuq Kanaan miqsaz httax ruq dvyx doc.

¹³Israel miqsaz yungx luz wvnc tueq, yuq muinz Kanaan miqsaz lotlaz kuex yurc gay muq maq miqmac yauk tvshuimc muex nvr wuez tueq.

¹⁴Yosep suiuz vsaz hez rueq Yoshua muex ngoc, “Yehowa rueq nuiyshiq muex ruimrix kejux kuy ningkhvnc nuex nuiyshiq paunghvlc shex paung vtix. Mnoz rueq yvmx ngoz tueq lac nuiyshiq muex ghaqphux phvlc shiz dvyx kuq phux?” ngoz tueq wiz tueq.

¹⁵Yoshua rueq, “Nuimshiq miq paunghvlc ningkhvnc nuex Ephraim muex vkuq kuz ghaq hong kuex vruinx yuq lec Perizi nuiyc Rephaim miqsaz httax yaq luingx htenc kuex shamc vtueq httax kuinz,” ngoz tueq jungx tueq.

¹⁶Tsuingshiq rueq, “Kuz ghaq hong kuex nuiyshiq tvkoc ruinc hvlc, yuq muinz Bet Shan nuiyc tvroz wawc miqghaq htenc nuiyc Jezreel Warc tvnx nuex httax yaq Kanaan miqsaz kuex yanx renc lvp tvy jix nuk rvtueq,” ngoz tueq tvralc tueq.

¹⁷Yoshua rueq Ephraim nuiyc shalx nyuip Manase phvnx muex ngoc, “Nuimshiq kuex miq paunghvlc nuiyc luimc vkawc httaz hvlc rvtuit. Kvkhoc rvtueq nuimhez rueq ghaqphux phvlc shiz htauk nuex jvnc vtueq lvp shuinx.

¹⁸Kuz ghaq hong kuex nuimshiq muex mruez kueq. Kvruex hong kuex luingx rvtueq, yuq muinz nuimshiq rueq rumz htenc kuex shamc gay ruiux shuk kox maq shuk kox nuex httuiuc laz httax kuinz. Kanaan miqsaz kox nuex yanx renc htenc nuiyc miq hungc vlaungc httaz hvlc ngoz ruiux muinz, nuimshiq rueq tsuingshiq kuex yurc gay lot shuinx,” ngoz tueq jungx tueq.