Read Tase Naga YOSHUA 18 Bible Online

YOSHUA 18 - Tase Naga bible

YOSHUA 18

¹Tsuinghez rueq wvmungx tuimx khvt gay lot tueq yix maq Israel miqsaz kuex Shilo ghaq nuex rvtuimx kaz vtueq Yehowa httax yaq Tap kuex guirx tueq.

²Ghaqphux phvlc kuy max lvp shauk Israel miqsaz wawc phvnx mvshix doc kvjungx yaq.

³Kvkhoc rvtueq Yoshua rueq Israel miqsaz muex ngoc, “Yehowa nuimshiq jix vwaz tamx Tishox rueq nuimshiq muex kuq kv-phuinx ghaq kuex guimz kaz muit maq mtanc nuex httuiuc laz lac bvmc shuinx.

⁴Miq phvnx tek wawc miq waz thuimx phok thvl taq shuinz. Tsuinghez rueq lvp aungx yaq ghaqphux kuex htaz tvtsuingc tvkoc ngaz rueq tsuinghez kuex wvmungx tuimx nuex tvkaz shaungx. Kvruex yimaq tsuinghez kuex ngvy kox nuex yek wuez rax.

⁵Kvruex mungx kuex mvnz mvshix nuex jumc rax; Yuda kuex ghaqyaz kox hong nuex httax ruiux, Yosep kuex ghaqkhux kox hong nuex mhttax kueq.

⁶Ghaq mvnz mvshix nuex vphvlx luik kuex ngvy kox nuex lvmc wvnc rax. Kvruex yimaq ngaz rueq Yehowa naungshiq Tishox thuinroc yaungc tvkoc hangchac maq thvl[4] kuq phaungx.

⁷Yuq muinz Lewi miqsaz kuex ghaqphux phvlc nuimshiq rueq ikhoc lvp shuex rvmuq, yvmx khoc lac ngoz ruiux lec tsuingshiq mvnjuz phvlc kuex Yehowa shomc waz muex yaungx vtueq nawk palx yauk shuimc kuex gurx pix wuez tueq. Yehowa nvrc waz Moshe rueq phvlx kuq shec tueq rulc rv-ngvlc Yodan ruilx maq shaldungc kox mungx kuex Gad, Ruben nuiyc shaldungc Manase phvnx htenc rueq lvp wuez tueq shex,” ngoz tueq jungx tueq.

⁸Yoshua rueq tsuinghez muex vkhoc jungx tvkhic tueq: “Wvmungx tuimx kvyuq khuemx kaz vtueq ghaqphux dvmx (mep) kuex tvhungx ruiux ngaz kox nuex yek waung luit. Kvkaq ngaz rueq vruex Shilo ghaq vmaq hangchac[5] maq thvl ruiux, nuimshiq tvkoc Yehowa rulc ngaz rvjungc phaungx.” Kvkhoc jungc kuy jix tsuinghez muinz ghaqphux dvmx (mep) tvhungx kay kaz wvnc wuez tueq.

⁹Kvkhoc rvtueq tsuinghez kuex wvmungx tuimx nuex khuemx kaz vtueq miqghaq muingc htenc kuex tvhungx ruiux, mvnz mvshix nuex phvlx vtueq luik nuex wuiyq tvtsuingc ruiux, Shilo jerak nuex httax yaq Yoshua kox nuex yek waung tueq.

¹⁰Yoshua rueq tsuingshiq tvkoc Yehowa rulc rvjungc vtueq hangchac[6] maq thvl ruiux kvjungx yaq Israel phvnx htenc vshiz maq vshiz tvkoc ghaq kuex phvlx kuq tueq.

¹¹Benjamin phvnx wawc vtaungx htenc rueq lvp juing ghaqphux kuex kungkhux phvlx kuq tueq. Tsuingshiq ghaq kuex Yuda nuiyc Yosep phvnx hvlwvl nuex rvtueq.

¹²Ghaqkhux kox tsuingshiq ghaqruiy kuex Yodan ruilx maq phaungc vtueq, Yerikho htauk kox maq yanz wvnc vtueq shalx nyuip kox kuz hong maq raz tueq Bethawen yaruix tvnx nuex httuiuc laz rvtueq.

¹³Kvmaq raz tueq ghaqruiy kuex (Bethel muingc yaq), Luza ghaq ghaqyaz kox maq yanz wvnc vtueq, Kaq kox Bet Horon ghaqyaz kox kanx htauk wawc Atarot Addar nuex httuiuc tueq.

¹⁴Kvruex maq ghaqruiy kuex shalx nyuip kox maq kvroz wvnc ruiux ghaqyaz kox nuex nyuip wvnc vtueq, Yuda phvnx rueq guimz yaq Kiriat Bala (rvmuq ngoz ruiux Kiriat Jearim) nuex httuiuc laz rvtueq. Kvruex kuex shalx nyuip kox ghaqruiy rvtueq.

¹⁵Ghaqyaz kox ghaqruiy kuex Kiriat Jearim ghaq tvsuip maq phaungc vtueq, Nephtoa yuix Saz ruilx dungc nuex httuiuc tueq.

¹⁶Kvmaq raz tueq Rephaim Warc tvnx maq ghaqkhux kox tvsuip nuex httax yaq Hinnom Warc tvnx kvkhic yaq kanx yaz maq kvrep kaz wvnc vtueq, ghaqyaz kox Hinnom Warc tvnx maq yanz ruiux Enrogel nuex svt kaz yaq Jebusi miqsaz httax yaq kuz maq ghaqyaz kox nuex httuiuc laz rvtueq.

¹⁷Kvmaq raz tueq ghaqkhux kox Enshemesh kox nuex kvroz duiz wvnc vtueq, Adummim kanx Hvlwvl ral wawc Gelilot nuex httuiuc tueq. Kvmaq raz tueq Bohan Lungshungc (Bohan kuex Ruben saz rvtueq), nuex svt kaz vtueq,

¹⁸Yodan Warc tvnx kvkhic yaq ghaqkhux kox wawc kanx maq yanz wvnc tueq. Kvmaq hulawx warc tvnx kox nuex svt kaz vtueq,

¹⁹Bet Hogla kanx ghaqkhux kox maq yanz wvnc ruiux Yuix Maungx Jumx khux kox shuk Yodan Ruilx dungc nuex suip tueq. Kvruex kuex ghaqyaz kox ghaqruiy rvtueq.

²⁰Yodan ruilx kuex shaldungc kox ghaqruiy rvtueq. Kvruex ghaqruiy kuex Benjamin phvnx wawc vtaungx htenc rueq vlvp ghaqruiy rvtueq.

²¹Benjamin phvnx wawc vtaungx htenc rueq guimz yaq ghaqyungx htenc kuex Yerikho, Bet Hogla, Emek Keziza,

²²Bet Araba, Zemaraim, Bethel,

²³Awim, Para, Ophra,

²⁴Kepharammoni, Ophani nuiyc Geba: ghaqyungx 12 nuiyc kvruex tvroz wawc miqghaq htenc rvtueq.

²⁵Kvmaq lvy vtueq Gibeon, Rama, Berot,

²⁶Mizpa, Kephira, Moza,

²⁷Rekem, Erapeel, Tarala,

²⁸Zela, Haelepha, Jebusi (rvmuq ngoz ruiux Yerusalem), Gibea nuiyc Kiriat Jearim: ghaqyungx 14 nuiyc kvruex tvroz wawc miqghaq htenc muinz lomx tueq. Ghaq vruex kuex Benjamin phvnx wawc vtaungx htenc rueq guimz yaq ghaq rvtueq.