Read Tase Naga 2 TIMOTHY 4 Bible Online

2 TIMOTHY 4 - Tase Naga bible

2 TIMOTHY 4

¹Tishox khaungkac nuex muinz, vthueyc jix nuiyc vtvraungx jix muex phox kuy jix Christu Yesu khaungkac nuex muinz, vpiq kuex guimz lawc tvkoc Hokhvmx ikhoc maq httuiuc kaz tuex ningkhvnc nuex ngaz rueq mnoz muex daungdaungx jungx kuq vphaungx.

²Bomjungc jungphvnc kuy tvkoc, tvtuiuz tvtay kuy tvkoc, mvrax tvkhic vtueq tvtharc tvkoc, thuinz vluz maq tvluingc kuy tvkoc (Vkhing aungx ruiux muinz, aungx muq ngoz ruiux muinz) hunglaungx hvt rvkuiuz, ngoz tueq ngaz rueq mnoz muex nvr vphaungx.

³Miq htenc rueq vlvmx tvluing jungphvnx kuq yaq kuex tay muq maq, miqmac thuinroc lvmx phvnx vtueq tsuingshiq thuinz tay roc shuex lvmz htenc kuex tvluingc kuy jix tvluingc waz htenc tsuingshiq tvkoc pinhtumc paungc wvnc tvkoc thuiyx wuez shuex.

⁴Tsuingshiq kuex tsuingrux lvmx kuex tay phvnx muq maq kvroz wvnc vtueq, miqsaz mvnphvnc kvjaz htenc kuex tay phvnx wvnc wuez shuex.

⁵Mnoz kuex yvmx khoc yaungc wvnc juing lvmx htenc rvhumc ruiux muinz mshauk pumz maq khvmc vtueq vkuilc vdaz kuex nanx shuiuz; Thuix Thaungx Vhvlx jungphvnc kuy yauk shuimc kuex shuimx shuiuz, Tishox nvrc waz vshiz ikhoc mnoz rueq gurc pic juing httax yaq lotlaz kuex shuimx kaz shuiuz.

⁶Ngvy tvkoc kuex ngvy rullungx shomc nawk kuy gay vkhing httuiuc wvnc yaq; vruex yuq dvyx mungkawx rullungx kuex gay shec vkhing httuiuc wvnc yaq.

⁷Ngaz kuex vyuz rvlongx lvmx nuex hungc lotlaz maq yuz tauk, vyuz juing htaz shec tueq kvyuq tvsuip laz yuz tauk, kvmluimx lvmx kuex ngaz rueq phvnx wvnc tauk.

⁸Majuiuc kuex Tishox rulc vtsuing vrux maq httaz jix muex kuq yaq lotlaungc khushec kuex ngvy tvkoc tvyoalc yoalx shex, vlvmx rvkhauk phoc jix waz phoc waz ngoz yaq Taungjix rueq kvruex khushec kuex khac phox shuex Raungnuiyq ngaz muex kuq phuex. Ngaz muex dvyx rvmuq, vpiq httuiuc kaz yek yaq kuex thuinz tvluimc bvmc jix htenc muex muinz kuq shuex rvtueq.

⁹Ngvy kox nuex htat htat kay tvkoc hungc lotlaz maq hung kuiuz.

¹⁰Dema kuex mungkawx vruex lungwawc ningkhvnc nuex ngaz kuex gay shec ruiux Thesaloni ghaq nuex kaz wvnc vtuex. Kresen kuex Galatia mungx nuex, Titu kuex Dalmatia mungx nuex kaz wvnc vtuex.

¹¹Luka dvyx shex ngaz rulc httax yaq, Marku kuex thuiyx vtueq mnoz rulc vdvmz nuex gvl wvnc loq, piq kuex ngvy yauk shuimc romc kuy lot jix rvtueq.

¹²Ngaz rueq Tichiku kuex Ephesu ghaq nuex tvkaz tauk.

¹³Mnoz kaz ruiux nuex Troa ghaq wawc Karpu yauk nuex ngaz rueq vtaq shec hungyungx hungluz nuiyc luik htenc, vkhek kuex ngvmx khuix luik tul htenc lvmz laq loq.

¹⁴Yanx jek jix jek waz Alesander rueq ngaz muex pinhtumc tvgvrc tsvrc kuq phuex, piq rueq shuimx wvnc tueq rulc rv-ngvlc Taungjix rueq piq muex yez kuq shuex rvtueq.

¹⁵Mnoz muinz piq muex honc lvmx shuiuz, yvmx khoc lac ngoz ruiux lec piq kuex naungshiq rueq tvluing kuq vshix bomjungc kuex pinhtumc khawc lvlc ngoc ngac jix waz rvtueq.

¹⁶Vphaungc lauk ngvy khuec vkhac kuex wisoz phuex nuex ngvy shauk pumz kvguing tauk nuex ngvy kox nuex jvp vtueq uraq muinz htuiz daungx lomx muq; miq lotlaz rueq ngaz kuex gay shec wuez phuex. Tsuingshiq rueq kvkhoc rvkuq phuex ningkhvnc nuex Tishox rueq mvrax tvtsuingc kuq muq mruex shueq!

¹⁷Yuq muinz Taungjix kuex ngaz rulc vdvmz httax vtueq ngaz muex hungc vlaungc kuy ningkhvnc nuex, ngaz rueq Pungnuk miqsaz lotlaz rueq tay lvp laz juing bomjungc kuex hungx laz htaungx laz mjungx phvnx kuq shueq; vthvy gay muex htvp htaz rvhumc tauk wawc palc rvhumc tauk.

¹⁸Taungjix rueq ngaz kuex honc vbac lvmz lotlaz wawc palc tvdung wvnc vtueq, vpiq raungmungx Mungtan nuex tvkhup wungx tvhttuiuc kuq phuex. Vpiq nuex pattup pat-sac ngauz vngax mhttax wvnc kueq! Amen.

¹⁹Priskila nuiyc Agula maq phaungc vtueq Onesiphoru yuimx wuinz muex ngaz rueq gvnhttuingc ngoz kuq vphaungx.

²⁰Erastu kuex Korinhtu nuex kvjungx kaz vtuex, Trophimu kuex vthuiuz vsac ningkhvnc nuex Miletu ghaq nuex tvy ishec tauk.

²¹Lawdungc max httuiuc baunglaung ngaz kox nuex kay lvp tvkoc hunglaungx kuiuz. Eubulu, Puden, Linu nuiyc Klaudia maq phaungc vtueq, Christan miqsaz lotlaz rueq gvnhttuingc ngoz kuq yaq.

²²Taungjix kuex msiyac rulc vdvmz nuex mhttax kueq. Tishox kejux kuex nuimshiq lotlaz rulc vdvmz nuex mhttax kueq.