Read Tase Naga HEBRE 3 Bible Online

HEBRE 3 - Tase Naga bible

HEBRE 3

¹Tishox rueq gvlc wvnc rvhumc jix ngvy Christan phunox bix lex! Naungshiq kvjungc vtix nawk palx htungx kvmluimx lvmx Shomc Wayungx yaungc tvkoc Tishox rueq vtvkaz Yesu kuex tvmaung wuez shuinz.

²Moshe kuex Tishox yuimx wawc vpiq yauk shuimc nuex tvmtuing httax wvnc tueq ikhoc, vruex yauk shuimc laung nuex vthvl taq Tishox htauk nuex tvmtuing httax wvnc tueq.

³Yuimx vshiz guirc jix waz kuex yuimx htauk nuex muinz jvnc vtueq tvtsanc nganc lvp yaq. Yesu muinz Moshe htauk nuex jvnc vtueq tvtsanc nganc vyungx lvp aungx yaq.

⁴Yuimx ngoz yaq kuex miq vshiz shiz rueq guirx taq yaq; phvnx ruip saz guirc jix waz kuex Tishox rvtueq.

⁵Moshe kuex Tishox yuimx nuex nvrc waz ikhoc tvmtuing maq httax vtueq, yix maq Tishox rueq jungx shuex lvmz htenc kuex jungc jix waz rvtueq.

⁶Christu kuex Tishox yuimx guimz jix Vsaz ikhoc maq tvmtuing httax yaq. Naungshiq khvmc thuinz httax vtueq miqmac rueq thuinz tvluimc vshix phvnx muex kvmluimx thuinz httax ruiux yuq kuex kvruex yuimx kuex naungshiq rvtiq.

⁷Kvkhoc rvtueq Vsawc Siyac rueq jungx tueq, “Nuimshiq rueq majuiuc raungnuiyq Tishox tvruingc tay ruiux yuq,

⁸kumtsvy tvnx nuex baunglaung Tishox kuex khawx lvlx vtueq, vpiq taruiyx wvnc tueq nuimshiq jix vwaz tamx rueq ikhoc khux nauk tvtsanz kaz.

⁹Tishox rueq, nuimshiq jix vwaz tamx rueq wawc rok bvlic tup, yaruix rumz tvnx maq ngaz rueq shuimx wvnc tauk yauk shuimc kuex khic ruiux muinz, ngaz kuex khawx lvlx vtueq taruiyx wvnc phuex.

¹⁰Kvkhoc rvtueq ngaz kuex miq htenc muex khaq vtueq, ‘Tsuingshiq kuex mkaq muinz tvmtuing vguez nuiyc ngaz rueq nvrc bomc htenc phvnx muq ngoz tueq ngaz rueq ngoz tauk.’

¹¹Ngaz khaq vtueq tsuingshiq kuex, ‘Ngaz rueq tsuingshiq muex kuq shaungx nyec tvkuiyq juing baung nuex mkaq muinz nyuip lvp muq!’ ngoz tueq tuemc khvmc kuq tauk.”

¹²Kvmluimx jix phunox bix lex, vtvraungx Tishox kox wawc kvwek wvnc nuex httuiuc laz honc vbac kvmluimx vyaq thuinz vmungx httaz jix nuimshiq nuex vshiz muinz httax muq mruez kueq honc lvmz wuez shuinz.

¹³Nuimshiq phungc wawc washiz muinz mvrax rueq laulawc rvhumc vtueq khux tsanz jix miq muex nauk yaungx kaz, Rumvrc luik nuex jungx shec tueq, “Majuiuc raungnuiyq,” ngoz tueq naungshiq laung nuex jungx yaq wawwawx wvraungx nuiyq tek vdvmz dvmz rvromc rvshix wuez kuinz.

¹⁴Yvmx khoc lac ngoz ruiux lec naungshiq vphaungc yaungx wvnc tuit ikhoc kvmluimx thuinz maq vtvsuip nuex httuiuc laz phaungx duingduing httax ruiux yuq, naungshiq lotlaz Christu rulc vdvmz nuex shuimc shiz kayshiz jix rvtiq.

¹⁵Rumvrc luik nuex, “Majuiuc raungnuiyq nuimshiq rueq Tishox tvruingc tay ruiux yuq, Tishox muex nuimshiq jix vwaz tamx rueq khawx lvlx wvnc tueq nuex ikhoc, khux nauk tvtsanz wuez kaz,” ngoz tueq jungx tueq.

¹⁶Tishox tvruingc tay yaq rvhvt maq vpiq muex khawc lvlc jix kuex ukhaq lac rvtvnx? Tsuingshiq kuex Ejip mungx wawc Moshe rueq vshvlx wvnc htenc lotlaz rvtueq.

¹⁷Wawc rok bvlic tup Tishox thuinkhvy rvhumc wvnc jix htenc kuex ukhaq lac rvtvnx? Kvruex hez kuex mvrax yauk shuimc vtueq kumtsvy tvnx nuex thueyc wvnc tueq jix htenc rvtueq.

¹⁸Kvkaq Tishox rueq tuemc vtueq khvmc kuq tueq, “Tsuingshiq kuex ngaz rueq kuq shaungx nyec tvkuiyq juing mungx nuex mkaq muinz nyuip luc muq rvtuex,” ngoz tueq mruez jix muex vngoz kuq lac rvtvnx? Vpiq kvjaz tay muq maq tvgap gawx jix htenc muex vngoz kuq rvmuq haz?

¹⁹Tsuingshiq kvmluimx muq ningkhvnc nuex kvruex mungtan kvyuq nyuip lvp muq kuex naungshiq rueq khiz tuiuz vshix.