Read Tase Naga HEBRE 9 Bible Online

HEBRE 9 - Tase Naga bible

HEBRE 9

¹Vphaungc wawc bomkhvrc nuex nawk palx lvmx nuex seng vtueq htungx vlayx htenc httax yaq rulc rv-ngvlc miq rueq vtvhungx nawk palx juing baung httaz rax yaq.

²Miq rueq Vsawc Baung ngoz yaq yuzphic kox Tap kuex guirx wuez tueq. Kvruex yuq wvrkok tochuing muinz, Tishox muex shomc kuy juing wanx nuiyc humpanx muinz httax yaq.

³Kvmaq vnueyc ngoc juing khvy phux vjuinx vmungx kox khok kuex Vsawc Pinhtumc Baung ngoz yaq.

⁴Kvruex yuq vhomc phvnx juiuz juing kuimshawx shomrawx nuiyc wvpumz tuimx kuimshawx maq vtvhungx Bomkhvrc Jep httax yaq, kvruex jep mungx kvyuq manna wanx htawc juing kuimshawx tuik muinz, vpuic vsung rvyaq Arun paq muinz, bomkhvrc tvrac vwuiyq shec lung dvmx vnueyc muinz httax yaq.

⁵Kvruex Jep htauk kvyuq kerubim yac yuimx htenc httax yaq, kerubim kvruex kuex Tishox httax yaq lvmx vtv-ngvlc taq rvtueq, tsuingshiq raungx htenc kvmaq mvrax dawc juing daungraungc kuex puingc taq tueq. Yuq muinz kvruex vlvmz kuex majuiuc tvhttoarc tv-phaungx jungc rac muq.

⁶Nawk palx lvmx vruex jungx ix ngoz ruiux yuq, shomc waz bix kuex miqmac rueq shuimc juing yauk shuimc shuimx ruiux yuq yuzphic kox wawc Tap kvyuq wvraungx nuiyq tek nyuip yaq,

⁷yuq muinz Tap vmungx kox kvyuq kuex Shomc Wayungx piq dvyx miqmac tvkoc muinz, nuk miqsaz htenc rueq helc muq vyaq gay mvrax laung muinz, shomc kuy juing tvguiy shuimx vtueq wawc shiz nuex laukshiz nyuip yaq.

⁸Vkhoc htungx vlayx maq yuzphic kox Tap httax yaq wawwawx Vsawc Pinhtumc Baung nuex nyuip juing lvmx kuex max daz shauk doc lvmz Vsawc Siyac rueq vhvlx waq tvluing kuq yaq.

⁹Vruex lvmz kuex vruex pat wawc lvmz tv-ngvlc juing bomc tv-ngvlc vshiz rvtueq. Kvruex vlvmz kuex Tishox muex shomc kuq yaq yauk noalc htenc nuiyc nyvmx saz shomc nawk kuq yaq htenc kuex nawk palx jix thuinz vmungx tvhungx htaungx lot yaq rvmuq.

¹⁰Kvruex htenc kuex phuiuz vsvy, vnuingc juing phvnx nuiyc tvsawc nawc htungx vlayx phvnx ruip saz nuex seng vtueq shuimc lvmc dvyx rvtueq. Kvruex htenc kuex Tishox rueq vnyalx tvhungx shuex pat max httuiuc baunglaung vtaq shec raungkhuix tsax nuex seng yaq phvnc juing tvrac dvyx rvtueq.

¹¹Yuq muinz Christu kuex majuiuc naungshiq rueq lvp wvnc vshix vhvlx phvnx lvmx nuex seng yaq Shomc Wayungx muex yaungx vtueq httuiuc kaz tueq. Vpiq yauk shuimc juing tap kuex yauk maq vtvhungx rvmuq ningkhvnc nuex mungkawx nuex seng muq, pinhtumc yungx vtueq hungx htaungx yaq tap rvtueq.

¹²Christu kuex Vsawc Pinhtumc Baung tap nuex laukshiz lvmz maq dvyx nyuip wvnc tueq nuex, shomc nawk kuy juing shomc kuy muex khelkhix nuiyc mansuiux tvguiy shuimx vtueq nyuip muq, vpiq tvguiy maq nyuip wvnc vtueq naungshiq tvkoc pattup palc daungc wvnc lvmx kuex lvp wvnc tueq.

¹³Khelkhix tvguiy, mansuiux tvguiy, mansuiux kuiux saz labuinx maq vshuy vshac jix htauk nuex buit kuq vtueq, vshuy vshac hoal kuq gay ruiux miqsaz muex tvsawc kuq lot yaq ngoz ruiux kuex,

¹⁴Christu tvguiy kuex kvruex htauk nuex jvnc vtueq mtanc khvnc lac tvsawc lot khvmz tvnx! Christu kuex pattup Siyac maq vpiq shauk pumz kuex hungx htaungx yaq shomc nawk kuy juing ikhoc maq Tishox muex shomc kuq tueq. Tvraungx Tishox muex naungshiq rueq shuimx lvmz kuq lvp laz Christu tvguiy rueq naungshiq thuinz vmungx kuex khuec guez nawk palx htungx vlayx phvnx yaq wawc tvsawc nawc wvnc phuex.

¹⁵Kvkhoc rvtueq Tishox rueq gvlc rvhumc jix htenc kuex vpiq rueq bomkhvmc taq shec tueq pattup ruimrix kejux tsak vnyvmx htenc mlvp wvnc shueq ngoz tueq, Christu rueq bomkhvrc vnyalx tvhungx kuq shec phuex. Kvkhoc lvp wvnc juing vrangx vpangx kuex vphaungc bomkhvrc khung nuex httax tueq baunglaung vyaq gay mvrax htenc wawc tvdungc wvnc muex vthueyc khvmc kuy juing lvmx shiz dungc wvnc ningkhvnc nuex rvtueq.

¹⁶Vthueyc luik rvkhauk laz yaungc lot tvkoc vthueyc luik wuiyq shec jix waz kuex vsuing vthueyc kay wuez lvmx hakhix tvkhic juing rvtueq,

¹⁷yvmx khoc lac ngoz ruiux lec vthueyc luik wuiyq jix waz tvraungx wawwawx piq thueyc luik kuex rvkhauk yaungx lot muq. Kvruex waz thueyc kaz ruiux jix rvkhauk yaungx yaq.

¹⁸Kvkhoc rvtueq vphaungc wawc bomkhvrc doc muinz tvguiy shuimx vtueq jix tvhungx tueq.

¹⁹Vphaungc Moshe rueq tvrac nuex httax yaq bomkhvrc lotlaz kuex miq htenc muex jungc kuy lot yix, khelbuenx mulshawx nuiyc hisop[2] kawz kuex shuimx ruiux manx tvguiy, khelkhix tvguiy htenc rulc yuix kuex shot vtueq luik tul htauk nuex muinz miq lotlaz muex muinz buit kuq tueq.

²⁰Kvruex yimaq piq rueq, “Vruex tvguiy kuex nuimshiq rueq phvnc tvkoc Tishox rueq vnvr shec bomkhvrc kuex tv-phaungx muex rvtueq,” ngoz tueq.

²¹Kvrulc rv-ngvlc Moshe rueq nawk palx juing tap htauk nuex muinz, nawk palx shuex nuex shuimx yaq taungx vwawx lotlaz htauk nuex muinz tvguiy kvmaq buit tueq.

²²Tvrac rulc rv-ngvlc ngoz ruiux, taungx vwawx lotlaz kuex tvguiy maq tvsawc nawc lot yaq khuec nuex, tvguiy dung ruiux yuq jix mvrax dawc lot yaq.

²³Ekvkhoc lvmx maq jix, raungmungx nuex httax hvt phvnx rulc rv-ngvlc yaq htenc kuex tvsawc nawc kuq yaq. Yuq muinz raungmungx nuex httax yaq phvnx kuex vhvlx pinhtumc shomc nawk kuy juing maq jix tvsawc nawc juing rax yaq.

²⁴Yvmx khoc lac ngoz ruiux lec Christu kuex vsuing vsawc baung muik shauk rulc rv-ngvlc yaq miqsaz yauk maq vtvhungx Vsawc Baung nuex nyuip muq maq, raungmungx nuex nyuip vtueq majuiuc naungshiq laung nuex Tishox khaungkac nuex httax yaq.

²⁵Yuda Shomc Wayungx bix kuex nyvmx saz tvguiy lvmz wvnc vtueq wawc tek Vsawc Pinhtumc Baung nuex nyuip yaq. Yuq muinz Christu rueq vpiq shauk pumz kuex paunghvlc lauk shomc nawk kuq tueq rvmuq,

²⁶kvkhoc shomc kuq tueq ngoz ruiux kuex, mungkawx tvdung phaungc tueq maq paunghvlc lauk thueyc khvmc juing rvkhvmz tueq. Kvkhoc tvraung, majuiuc kuex mungkawx htumx wvnc khvmkhvmz nuex laukshiz dvyx httuiuc kaz vtueq, vpiq thuiuzthuic kuex shomc kuq gay ruiux mvrax kuex tvsawc nawc hoal gay tueq.

²⁷Miqsaz kuex laukshiz dvyx thueyc vtueq, kvruex yimaq kuex Tishox rueq phoc kuy rvhumc yaq.

²⁸Kvrulc rv-ngvlc Christu muinz miq paunghvlc mvrax dawc kuy gay rawc nuex vpiq shauk pumz kuex laukshiz dvyx shomc nawk kuy juing muex tvyaungc vtueq shomc kuq gay tueq. Mvrax dawc kuq tueq lvmx nuex rvmuq maq, vpiq muex tvluimc bvmc jix htenc kuex palc daungc wvnc rawc nuex lauknueyc ngoc yaungc httuiuc kaz yek tuex.