Read Tase Naga 1 YOHAN 1 Bible Online

1 YOHAN 1 - Tase Naga bible

1 YOHAN 1

¹Vphaungc vyaungc maq phuex vhttax dodoc rullungx tvraungx Bomjungc lvmx nuimshiq kox nuex nuiyshiq rueq wuiyq tvgurc vphix.Thuiuzthuic ngoz yaq bomjungc lvmx kuex luik nuex wuiyq tvwvnc vphaungx, kvruex bomjungc kuex vphaungc vyaungc maq phuex vhttax rvtueq, nuiyshiq rueq vtay muinz tay wvnc tiq, muik maq muinz khiz wvnc tiq, nuiyshiq rueq yauk maq muinz shuimx lawc wvnc tiq.

²Kvruex rullungx kuex dung wvnc tueq nuex nuiyshiq rueq kvruex khiz tiq; kvkhoc rvtueq kvruex lvmz nuiyshiq rueq hakhix khvmc vshix. Vwaz rulc vdvmz httaz wvnc tueq rullungx kuex nuiyshiq muex kvkhic kay khuec nuex, nuiyshiq rueq kvruex rullungx lvmx kuex nuimshiq muex jungx tvtay kuq vphix.

³Nuiyshiq kuex Vwaz rulc muinz Vsaz Yesu Christu rulc muinz lux rvyaungc wvnc tiq khuec nuex, nuimshiq muinz nuiyshiq rulc vroc nuex kungjix yaungc wvnc naungc tvkoc nuiyshiq rueq khiz tay wvnc tiq lvmz htenc kuex nuimshiq muex jungx tvtay kuq vphix.

⁴Nuiyshiq rueq kokez thuinhvlc juing lvmz kuex nuimshiq nuex hunghtaungx mvrc wvnc rawc nuex vruex lvmz luik nuex wuiyq tvwvnc vphix.

⁵Tishox kuex raungwuic rvtueq, vpiq nuex raungnyauk yvmx muinz vguez ngoz tueq bomjungc kuex, nuiyshiq rueq Vsaz kox wawc tay wvnc tiq khuec nuex nuimshiq muex tvtay jungx kuq vphix.

⁶Kvkhoc rvtueq naungshiq kuex vpiq rulc kungjix rvyaungc vtix ngoz ruiux raungnyauk nuex dvyx httax ruiux yuq kuex, nuix maq muinz honc vyaungc maq muinz rot kaq jix miq rvtueq.

⁷Yuq muinz vpiq kuex raungwuic nuex httax yaq rulc rv-ngvlc naungshiq muinz raungwuic nuex httax ruiux yuq kuex, vshiz maq vshiz vdvmz dvmz kungjix rvyaungc lvmz rvtueq, vpiq Saz Yesu tvguiy maq naungshiq mvrax httax yaq htenc kuex hoal kuq gay phuex.

⁸Nuiyshiq kuex mvrax miqsaz rvmuq ngoz tueq kv-ngoc ruiux yuq, miqmac shauk vgvnz kuex laulawc gay rvtueq, naungshiq nuex tsuingrux thuinz vguez.

⁹Yuq muinz mvrax kvjungc ruiux yuq, Tishox kuex bomkhvmc tv-phaungx vtueq tvrac rulc rv-ngvlc shuimc jix waz khuec nuex naungshiq mvrax kuex dawc kuq gay ruiux, naungshiq kuex vshuy vshac htenc wawc tvsawc kuq gay phuex.

¹⁰Mkhoc shoc maq naungshiq rueq mvrax shuimx miq ngoz tueq jungx ruiux yuq naungshiq kuex Tishox muex rot kaq jix waz rvtueq ngoz tueq nyvnc muex yaungx yaq khuec nuex, vpiq bomjungc naungshiq nuex httax muq.