Read Tase Naga 1 YOHAN 3 Bible Online

1 YOHAN 3 - Tase Naga bible

1 YOHAN 3

¹Lawc shuinz mtanc lac Vwaz rueq naungshiq lungwawx yaq! Vpiq lungwawc thuinz yunghvlc ningkhvnc nuex naungshiq kuex Tishox sahez ngoz tueq muingc phuex rulc rv-ngvlc vsuing naungshiq kuex Tishox sahez rvtiq. Yuq muinz mungkawx rueq Tishox kuex tuiuz muq khuec nuex, naungshiq muinz tuiuz muq.

²Lungwawc kungjix tamx lex, majuiuc naungshiq kuex Tishox sahez yaungx wuez vtix, yuq muinz yix maq yvmx khoc yaungc juing lac rvkhauk laz tuiuz miq shauk doc. Yuq muinz Christu kvkhic kaz tuex yuq naungshiq kuex vpiq ikhoc rvtix, yvmx khoc lac ngoz ruiux lec vsuing shauk rvtueq kuex naungshiq rueq khiz shix.

³Christu nuex thuinz tvluimc juing lvp jix miqpumz tek kuex, Christu vsawc rvtueq ikhoc miqmac shauk vgvnz kuex tvsawc nawc wuez shuinz.

⁴Mvrax shuimc jix waz ukhaq yuq muinz Tishox tvrac yanc gay yauk shuimc shuimx yaq, yvmx khoc lac ngoz ruiux lec mvrax kuex tvrac muex yanc gay yauk shuimc rvtueq.

⁵Christu kuex miqsaz mvrax dawc kuy tvkoc httuiuc kaz tueq lvmx kuex nuimshiq rueq tuiuz vshuinx, vpiq kuex mvrax yvmx muinz vguez waz rvtueq.

⁶Kvkhoc rvtueq Christu nuex httax muq waz ukhaq yuq muinz tvhttoarc vtueq mvrax shuimx yaq; mvrax shuimx hvt dvyx shuimc jix ukhaq yuq muinz vpiq kuex khiz muq tuiuz muq jix rvtueq.

⁷Isuiuz isaz tamx lex, uraq muinz nuimshiq muex lvmx tvmawc muq mrvshueq! Christu kuex tsuingrux rvtueq rulc rv-ngvlc vlvmx yauk shuimc jix ukhaq yuq muinz tsuingrux waz rvtueq.

⁸Mvrax shuimx hvt jix waz ukhaq yuq muinz Htaungc rulc seng yaq waz rvtueq, yvmx khoc lac ngoz ruiux lec Htaungc kuex vphaungc vyaungc maq phuex mvrax shuimc jix rvtueq. Kvkhoc rvtueq Htaungc yauk shuimc kuex tvbac gay tvkoc Tishox Saz dung kvkhic kaz tueq.

⁹Tishox saz muex yaungx tueq shex waz kuex tvhttoarc vtueq mvrax shuimx muq, yvmx khoc lac ngoz ruiux lec kvruex waz nuex Tishox pukdungc ngoz yaq rullungx kuy lot juing hungc httax yaq; piq kuex Tishox saz rvtueq ningkhvnc nuex mvrax shuimx kaz muq.

¹⁰Kvruex kuex Tishox sahez nuiyc Htaungc sahez rv-ngvlc muq lvmx rvtueq: ukhaq yuq muinz vlvmx yauk shuimc shuimx muq maq, piq phuz vnox waz muex lungwawc muq waz kuex Tishox saz rvmuq.

¹¹Vphaungc vyaungc maq phuex nuimshiq rueq tay wvnc tuit bomjungc kuex: nuimshiq vdvmz dvmz rvlungwawc wuez kuinz, ngoz tueq.

¹²Naungshiq kuex Kain ikhoc yaungc mvy muq; piq kuex Htaungc kox wawc miq yaungx vtueq vnox Abel kuex thvt gay tueq. Kain rueq vnox kuex yvmx ngoz tueq lac thvt gay tvnx? Piq rueq shuimx yaq yauk shuimc kuex vyaq, vnox rueq shuimx yaq kuex vlvmx khuec nuex rvtueq.

¹³Kvkhoc rvtueq phunox tamx lex, mungkawx miqsaz rueq nuimshiq muex shuiuc pac ruiux yuq nauk kawc yawc kaz.

¹⁴Naungshiq rueq phuz vnox htenc muex lungwawc vshiz khuec nuex, naungshiq vthueyc wawc rullungx tvraungx juing nuex rvp wvnc vshix kuex naungshiq rueq tuiuz vshix, phuz vnox waz muex lungwawc muq waz kuex thueyc luimc vkawc mungx nuex httax jix waz yaq.

¹⁵Piq phuz vnox waz muex shuiuc pac jix waz ukhaq yuq muinz miq thvy gay jix waz rvtueq; miq thvy gay jix waz rueq pattup rullungx thuiuzthuic lvp muq lvmx kuex nuimshiq rueq tuiuz vshuinx.

¹⁶Christu rueq naungshiq rawc nuex vpiq thuiuzthuic tvshuk lekuq gay tueq khuec nuex, lungwawc thuinz vmuik shauk kuex yvmx lac rvtvnx lvmx naungshiq rueq tuiuz vshix. Kvkhoc rvtueq naungshiq rueq muinz miqmac phuz vnox tvkoc naungshiq thuiuzthuic lekuy gay aungx yaq.

¹⁷Tsak vnyvmx rungwanx jix waz rvhvt maq piq phuz vnox waz htemrvmc hvlc kuex khiz yaq rvhvt maq, piq menjenc thuinz vmungx kuex tuing gay ruiux yuq, piq rueq Tishox muex lungwawc vshaungx ngoz tueq yvmx khoc lac jungx lot shvnx.

¹⁸Isuiuz isaz tamx lex, naungshiq lungwawc kuex bomc vnyamc nuiyc vjungc vphvnc maq dvyx rvmuq maq, vshuimc vkay maq tvkhic yaq tsuingrux lungwawc thuinz yaungc rax tuex.

¹⁹Kvkhoc rvtueq vkhoc maq naungshiq kuex tsuingrux nuex seng yaq jix htenc rvtiq kuex tuiuz lvp vshix; Tishox khaungkac nuex thuinz suing juing vkhangx kuex lvp wvnc wuez shix.

²⁰Naungshiq vyaq vlvmx htvp htaz thuinz rueq naungshiq muex yomnamc rvhumc ruiux kuex, Tishox kuex naungshiq vyaq vlvmx htvp htaz thuinz htauk nuex muinz yunghvlc httax yaq kuex naungshiq rueq tuiuz vshix kvdvyx muinz rvmuq, vpiq rueq phvnx ruip saz tuiuz yaq kuex naungshiq rueq tuiuz vshix.

²¹Kvkhoc rvtueq lungwawc kungjix bix lex, naungshiq vyaq vlvmx htvp htaz thuinz rueq naungshiq muex mvrax tvgurc yomnamc muq ngoz ruiux kuex Tishox khaungkac nuex khvmc thuinz maq nyuip lvp tix.

²²Naungshiq kuex vpiq nvrc bomc htenc kuex phvnx tvhungx vtueq vpiq rueq raungc raq yaq yauk shuimc kuex shuimx vshix ningkhvnc nuex, naungshiq rueq thoz shix kuex naungshiq rueq lvp wvnc tiq.

²³Vpiq rueq naungshiq muex nvr phuex kuex naungshiq rueq vpiq Saz Yesu Christu muex kvmluimx juing vtueq, Christu rueq naungshiq muex nvr phuex rulc rv-ngvlc vdvmz dvmz rvlungwawc lvmx rvtueq.

²⁴Tishox rueq nvrc bomc kuex phvnc tvhungx jix waz ukhaq yuq muinz Tishox rulc vshiz dvyx yaungx wvnc ruiux, Tishox muinz piq rulc vshiz dvyx raz tueq httax tuex. Kvkhoc yaungx yaq lvmx kuex Tishox rueq vkuq Siyac maq naungshiq rueq tuiuz vshix.