Read Tase Naga PHOC WAZ 20 Bible Online

PHOC WAZ 20 - Tase Naga bible

PHOC WAZ 20

¹Ghaqkhux kox Dan ghaq maq ghaqyaz kox Bersheba nuex httuiuc laz httax yaq Israel miqsaz lotlaz nuiyc, shaldungc kox Gilead mungx wawc muinz gvl koq tueq tvralc tueq. Tsuinghez kuex shauk pumz vshiz maq raz tueq Mezpa ghaq nuex Yehowa khaungkac nuex rvtuimx kaz tueq.

²Israel phvnx lotlaz wawc vyungx vlaungx bix kuex Tishox miqsaz htenc rulc vdvmz nuex rvtuimx vtueq, yaz lvmx maq khvt jix nolaungx bix kuex 400,000 rvtueq.

³Kvruex baunglaung vganc Israel miqsaz lotlaz Mezpa nuex rvtuimx yaq lvmz Benjamin miqsaz rueq tay tueq. Israel miqsaz rueq, “Vbac yauk shuimc kuex yvmx ngoz tueq lac yaq tuinx? Nuiyshiq muex jungx kuq kuit,” ngoz tueq wiz tueq.

⁴Vthvy gay rvhumc tueq nyuiuz taungx waz Lewi miq waz rueq, “Ngaz nuiyc ijuik nyuiuz ruinx kuex Benjamin hong wawc Gibea ghaq nuex wvrx yuip tvkoc httuiuc waung tauk.

⁵Gibea ghaq jix rueq ngaz muex thaungthoz naq tvkoc yuimx kuex raungwvrx nuex tuimx kaz ruex. Tsuingshiq rueq ngvy thvy tvkoc dvnc tueq; yuq muinz ijuik nyuiuz ruinx kuex tvthueyc laz guirguenz tueq.

⁶Ngaz rueq piq maungx kuex lvmz wvnc vtueq tvhtaq tvruk jumz ruiux, Israel miqsaz phvnx rokshiz rac vnueyc muex pvl phuq phok tvgurc kuq phaungx. Kvruex hez kuex layx vbac nuiyc vshuy vshac yauk shuimc kuex naungshiq muex yaq vphuex.

⁷Vruex yuq httax yaq lotlaz kuex Israel miqsaz jvnc rvtuit. Vruex lvmz nuex seng vtueq yvmx khoc ruec juing lac?” ngoz tueq wiz tueq.

⁸Miq htenc lotlaz kvtenc ruingx raz tueq jungx tueq kuex, “Naunghez kuex washiz muinz miqmac tap rvmuq ngoz ruiux miqmac yuimx nuex yek waung miq lawx shex.

⁹Naunghez rueq yvmx khoc shuimc juing lac ngoz ruiux lec: hangchac maq raz tueq Gibea kuex khvt muex miq wvyvmc httauk ix.

¹⁰Israel waz rulx rokshiz wawc washiz rueq ralx khvt jix nolaungx bix tvkoc lvmx svy gurc kuq ruiux, vganc htenc kuex Israel nuex tsuingshiq rueq yaq gay tueq vshuy vshac honc vlayx shuimc gay jix Gibea ghaq wuinz muex murx tvgurc kay rax,” ngoz tueq jungx tueq.

¹¹Kvkhoc rvtueq Israel miqsaz lotlaz rueq miqghaq kuex khvt kay tvkoc kvmungx vshiz maq rvtuimx wuez tueq.

¹²Israel miqsaz rueq Benjamin phvnx ghaq hong htenc nuex miq htenc kuex tvkaz vtueq, “Nuimshiq yaq gay tuit vbac yauk shuimc kuex yvmx khoc lac?

¹³Vkhoc layx vbac kuex Israel miqsaz wawc lvmc gay tvkoc kvruex hez kuex nuiyshiq rueq thvy gay muex, Gibea ghaq wawc kvkhoc yaq jix miq htenc kuex majuiuc nuiyshiq yauk nuex kuq kuit,” ngoz tueq jungx tueq. Yuq muinz Benjamin miqsaz kuex vganc Israel miqsaz rueq jungx tueq kvjaz kuex bvlvmx lawx muq rvtueq.

¹⁴Benjamin ghaq vraungx nuex httaz yaq ghaqyungx lotlaz wawc miq htenc rueq vganc Israel miqsaz htenc kuex khvt gay muex ngoz tueq Gibea ghaq nuex kaz wuez tueq.

¹⁵Tsuingshiq rueq kvruex raungnuiyq tsuingshiq ghaqyungx htenc wawc nolaungx bix 26,000 kuex gvl laq tueq. Kvmaq hulawx yauk phvrx maq raz tueq khux mul loshiz muinz tv-phvyx muq lung builc tuip thenc jix miq 700 kvmuinz Gibea miqsaz rulc tvtuimx taq tueq.

¹⁶

¹⁷Israel phvnx htenc nuex kuex Benjamin phvnx lomx muq maq ralx khvt tvluingc yoalx nolaungx bix 400,000 rvtuimx yaq.

¹⁸Israel miqsaz kuex Bethel ghaq wawc nawk palx juing baung kvyuq duiz woz vtueq, “Benjamin miqsaz kuex mruex jix phvnx rueq vphaungc khvt juing lac?” ngoz tueq Tishox muex wiz tueq. Yehowa rueq, “Yuda phvnx rueq,” ngoz tueq tvralc kuq tueq.

¹⁹Kvkhoc rvtueq Israel miqsaz kuex nvp yix raungnvp kaz wvnc vtueq Gibea ghaq hep nuex jerak tec kaz tueq.

²⁰Tsuinghez rueq Benjamin nolaungx daungx kuex khvt tvkoc kaz wvnc vtueq ghaqyungx kox nuex tvmuiz yaq baung nuex jvp juing tvlvmz wuez tueq.

²¹Benjamin nolaungx daungx muinz ghaqyungx maq kaz wvnc vtueq shalx max nyuip nuex dvyx Israel nolaungx bix 22,000 kuex thvt gay tueq.

²²Kvkaq Israel miqsaz kuex nawk palx juing baung nuex kaz vtueq, Yehowa httax yaq nuex raungx tvyac laz khoarnyerx wuez tueq. Tsuinghez rueq vpiq muex ngoc, “Nuiyshiq rueq nuiynox Benjamin miqsaz kuex laukshiz khvt kay mvy yaq haz?” ngoz tueq wiz tueq. Yehowa rueq, “Khvt shuinz,” ngoz tueq tvralc tueq. Kvkhoc rvtueq Israel nolaungx bix kuex hungc vlaungc lvp ruiux kaz wvnc vtueq, kungkhux raungnuiyq tsuinghez rueq khvt tueq baung kvyuq tsuingshiq nolaungx bix kuex taq kaz tueq.

²³

²⁴Tsuinghez kuex lauk nueyc ngoc yaungc Benjamin nolaungx daungx httax yaq kvyuq kaz yek tueq.

²⁵Lauk nueyc ngoc yaungc rv-khvt tueq nuex muinz Benjamin miqsaz htenc kuex Gibea ghaq maq kaz wvnc vtueq, ralx khvt tvluingc yoalx Israel nolaungx bix 18,000 kuex thvt gay tueq.

²⁶Kvruex yimaq Israel miqsaz lotlaz kuex Bethel nuex duiz waung vtueq khoarnyerx wuez tueq. Tsuinghez kuex Yehowa httax yaq nuex ngaungc kaz vtueq raungx tvyac laz phuiuz svy mamc wuez tueq. Tsuinghez rueq Yehowa httax yaq baung kvyuq lux rvyaungc shomc kuy nuiyc wvr maq jauk shomc kuy kuex shomc nawk kuq tueq.

²⁷Kvtanc jauz Bethel ghaq nuex Tishox Bomkhvrc Jep httax yaq ningkhvnc nuex kvruex jep kuex Arun suiuz, Eleazar saz Phineha rueq yauk shuimc gurx pix lawc yaq. Kvkaq tsuinghez rueq Yehowa muex ngoc, “Nuiyshiq rueq nuiynox Benjamin miqsaz kuex laukshiz hulawx khvt gay yek juing shuex, khvt miq shex lac?” ngoz tueq wiz tueq. Yehowa rueq, “Khvt shuinz. Invp raungnuiyq ngaz rueq nuimshiq muex taungx wvnc juing kuq phaungx,” ngoz tueq tvralc tueq.

²⁸

²⁹Kvkhoc rvtueq Israel miqsaz rueq Gibea ghaq tvroz nuex nolaungx bix wvyvmc kuex tvhttuiyq tvbvmc kaz tueq.

³⁰Kvruex yimaq raungnuiyq thuimx vngoz nuex Israel nolaungx bix kuex Benjamin nolaungx bix kox nuex kaz wvnc vtueq, kungkhux nuex tsuinghez rueq ruez tueq ikhoc Gibea ghaq kox nuex tvmuiz yaq baung kvyuq tsuinghez nolaungx muex jvp juing tvlvmz shec tueq.

³¹Benjamin miqsaz rueq tsuinghez kuex khvt kay kaz vtueq ghaqyungx maq loayc hvlc nuex shex httuiuc wvnc tueq. Kvkhoc rvtueq kungkhux raungnuiyq nuex ikhoc Bethel nuex kay juing lvmx nuiyc Gibea nuex kay juing lvmx kvwawc Israel miqsaz wvyvmc kuex thvt phaungc wvnc tueq. Israel miqsaz 30 tanc thvt gay tueq.

³²Benjamin miqsaz rueq, “Naunghez rueq kungkhux nuex ikhoc tsuinghez kuex taungx tiq shex,” ngoz tueq rvjungc wuez tueq. Yuq muinz Israel miqsaz rueq ghaqyungx maq loayc hvlc nuex httuiuc wvnc laz juing lvmx laungx maq tsuinghez kuex naq shvlx laq vtueq, yix nuex rv-nyuik yuz wvnc ikhoc kvyaungx shaungx tueq.

³³Kvkhoc rvtueq Israel nolaungx daungx yungx kuex yayix nuex yek yuz wvnc ruiux, Balatama ghaq nuex rvtuimx yaq nuex Gibea ghaq tuimc jix hez kuex miqmac kvhttuiyq yaq lung rauk kanx hong maq vhuingc rvhek laz dung kaz wuez tueq.

³⁴Israel miqsaz lotlaz wawc vhttauk taq miq 10,000 rueq Gibea ghaq kuex khvt tueq, ralx khvt kuex songhvlc rv-khvt tueq. Benjamin miqsaz htenc kuex vtvbac gay rvhumc tuex lvmz tuiuz wuez muq rvtueq.

³⁵Yehowa rueq Israel miqsaz muex Benjamin nolaungx bix htenc kuex tvtaungx gay tueq. Kvruex raungnuiyq Israel miqsaz rueq ralx kuex 25,100 waz thvt gay tueq,

³⁶kvkaq Benjamin miqsaz tsuingshiq sumx wvnc vtuex lvmz tuiuz lvp wuez tueq. Israel nolaungx daungx yungx kuex Gibea ghaq tvroz nuex tsuinghez rueq tvhttuiyq tvbvmc shec tueq hez kvmac tvluimc ningkhvnc nuex Benjamin miqsaz kox wawc yuz wvnc wuez tueq.

³⁷Kvruex miq hez kuex Gibea ghaq nuex htat htat yuz wvnc vtueq, kvruex ghaqyungx mungx kvyuq miq kuex rv-phvlc nyanc ruiux miq ruip rawx kuex thvt gay tueq.

³⁸Israel nolaungx daungx yungx nuiyc kvhttuiyq jix daungx kuex httoarc rvlvp juing phvnx shiz tvhungx taq shec tueq. Miq ghaq kvwawc wvr khuiuq daungx htenc kvtenc wvnc yaq kuex tsuinghez khiz vtueq,

³⁹ralx rv-khvt yaq kvmaq kvwek wvnc wuez tueq. Kvruex baunglaung Benjamin miqsaz rueq Israel miqsaz waz 30 kuex thvt gay tueq. Tsuingshiq rueq, “Kungkhux nuex naungshiq rueq khvt taungx gay shix ikhoc naungshiq rueq tsuingshiq kuex taungx gay vshix shex,” ngoz tueq jungx wuez tueq.

⁴⁰Kvruex baunglaung wvr khuiuq daungx shiz kuex miq ghaq kvwawc kvtenc wvnc phaungc koq tueq, httoarc tvhelc tvtsuingc juing shec dung kaz yaq. Benjamin miqsaz rueq yix kox nuex nyez lawc koq tueq wvghaq pumz wawc wvrluic thuiyc yaq kuex khiz vtueq vkawc yawc rvkaz wuez tueq.

⁴¹Kvkaq Israel miqsaz kuex kvwek yek koq tueq, Benjamin miqsaz tsuingshiq tvbac gay rvhumc tuex lvmz kuex tuiuz vtueq hiyaz kvkhuirc wuez tueq.

⁴²Tsuinghez muinz Israel miqsaz kox kvmaq yuz wvnc vtueq, rumz nuex nyuip yuz wvnc wuez tueq, yuq muinz tsuinghez kuex luenx wuez lot muq. Tsuinghez kuex daungx yungx jix nuiyc kvhttuiyq rvtueq daungx kvruex hvlwvl nuex shuing gay vtueq tvbac gay rvhumc tueq.

⁴³Israel miqsaz rueq ralx htenc kuex tsvnc shec vtueq Gibea ghaq shaldungc kox tvsuip nuex httuiuc laz, tsuinghez rueq yurc gay tueq, tsuinghez rueq lauz yaq htenc kuex vthvy rvgay tueq.

⁴⁴Benjamin miqsaz wawc shvrvyx laqkongx bix vthvlc vruex nolaungx bix 18,000 kuex vthvy gay rvhumc tueq.

⁴⁵Vganc jix kuex Rimmon Lung rauk rumz kox nuex kvroz yuz wvnc wuez tueq. Tsuinghez kvwawc miq 5,000 kuex lvmx yungx wvlex nuex thvt gay tueq. Israel miqsaz rueq kvjungx yek yaq hez kuex Gidom ghaq nuex httuiuc laz yurc khvt vtueq, miq 2,000 thvt gay tueq.

⁴⁶Kvruex raungnuiyq thvy gay rvhumc tueq Benjamin miqsaz lotlaz kuex 25,000 rvtueq, kvhtenc kvruex lotlaz kuex shvrvyx laqkongx bix jvnc rvtueq.

⁴⁷Yuq muinz miq 600 kuex Rimmon Lung rauk rumz nuex yuz wvnc vtueq luenx wvnc wuez tueq, kvruex yuq yapix lex bvlic httax tueq.

⁴⁸Israel miqsaz kuex kvjungx yaq Benjamin miqsaz kox kvyuq kvwek yek vtueq miqwaz, yalxjuik, nosaz rulx nuiyc nyvmx saz htenc tauk thvt gay tueq. Tsuinghez rueq kvruex hong nuex httax yaq miqghaq ruip rawx htenc kuex jauk gay tueq.