Read Tase Naga PHOC WAZ 21 Bible Online

PHOC WAZ 21 - Tase Naga bible

PHOC WAZ 21

¹Israel miqsaz kuex Mizpa ghaq nuex rvtuimx tueq nuex Yehowa muex bomkhvmc kvtuemc taq tueq: “Naungshiq saz yalxjuik vshiz doc muinz Benjamin miqsaz muex tvwaung shix rvmuq.”

²Kvkhoc rvtueq Israel miqsaz htenc kuex Bethel nuex kaz vtueq, Tishox httax yaq nuex raungx tvyac laz ngaungc tueq. Tsuinghez kuex guyc vtueq khuip khaq laz juing yonzyex vtueq:

³“Yehowa Israel Tishox lex, vkhoc yvmx rvtueq lac yaungx kaz tvnx? Israel wawc Benjamin phvnx kuex yvmx ngoz tueq suimz wvnc lac tvnz yaq nguinx?” ngoz tueq ngoz wuez tueq.

⁴Nvp yix raungnuiyq raungnvp saz maq kvruex baung kvyuq shomrawx vshiz tvhungx guirx ruiux, lux rvyaungc shomc nawk kuy nuiyc wvr maq jauk shomc nawk kuy juing kuex shomc kuq tueq.

⁵Tsuingshiq rueq, “Mezpa wawc Yehowa httax yaq nuex rvtuimx kaz naungx muq jix Israel phvnx lotlaz wawc vyuq lomx muq jix httax yaq haz?” ngoz tueq wiz tueq. (Mezpa ghaq nuex kaz muq jix kuex vthueyc rvhumc tuex ngoz tueq tuemc taq tueq.)

⁶Israel miqsaz kuex tsuingc nox Benjamin miqsaz tvkoc thuinbac yonzyex rvhumc wuez vtueq, “Majuiuc raungnuiyq Israel wawc vphvnx vshiz kuex suimz kaz shex.

⁷Kvjungx yaq Benjamin waz rulx laung vtaungx nyuiuz hez lvp lot tvkoc naungshiq rueq yvmx khoc lac rvshix? Naungshiq saz yalxjuik sahez kuex tsuingshiq muex kuq miq ngoz tueq Yehowa nuex naungshiq rueq kvtuemc bomkhvmc taq tiq shex,” ngoz tueq rvjungc wuez tueq.

⁸Tsuinghez rueq Israel phvnx wawc Mezpa nuex kaz muq jix ukhaq lac httax yaq nguinx ngoz tueq wisoz koq tueq, Gilead mungx Jabesh ghaq wawc washiz muinz kaz muq kuex tsuinghez rueq tuiuz tueq.

⁹Nolaungx bix kox maq muingc wvl koq tueq Jabesh ghaq wawc washiz muinz lomx muq.

¹⁰Kvkhoc rvtueq rvtuimx yaq miq htenc rueq, tsuinghez wawc khvmc thuinz httaz hvlc jix miq 12,000 muex ngoc, “Nuimhez kaz vtueq yalxjuik rulx htenc nuiyc nosaz rulx htenc vlomx Jabesh ghaq wawc miq htenc kuex thvt gay kaz kuinz.

¹¹Miqwaz rulx lotlaz nuiyc yalxtux muik shauk rvmuq jix htenc kuex thvy gay rax,” ngoz tueq jungx kuq ruiux nvr tvkaz tueq.

¹²Tsuinghez rueq Jabesh ghaq wawc yalxtux rulx 400 kuex humc vtueq tsuinghez kuex Shilo ghaq wawc nolaungx jerak kvyuq shvlx laq tueq, kvruex ghaq kuex Kanaan mungx nuex rvtueq.

¹³Kvruex yimaq rvtuimx yaq miq htenc rueq Rimmon Lung rauk nuex httax yaq Benjamin miqwaz rulx rulc nomic rvyaungc tvkoc kvjaz tvjungc kaz tueq.

¹⁴Benjamin miqwaz rulx kuex yek waung koq tueq, vganc Israel miqsaz tsuinghez rueq thvt gay muq Jabesh ghaq jix yalxtux rulx kuex kuq tueq. Yuq muinz tsuinghez tvkoc hungx muq.

¹⁵Yehowa rueq Israel phvnx htenc vrungx vraz rvyaq kuex tvbunx gay ningkhvnc nuex, Benjamin miqsaz tvkoc thuinbac yonzyex rvhumc wuez yaq.

¹⁶Kvkhoc rvtueq rvtuimx yaq kvwawc vyungx vlaungx bix rueq, “Benjamin phvnx wawc yalxjuik rulx kuex vguez shex. Kvkhoc rvtueq kvjungx yaq miqwaz rulx tvkoc vtaungx nyuiuz tamx kuex naunghez rueq yvmx khoc tvhungx htaungx kuy juing lac?

¹⁷Vphvnx rokshiz rac vnueyc wawc phvnx shiz muinz Israel wawc moz tuex rvmuq. Benjamin phvnx tvraungx httaz lvp tvkoc lvmx vshiz shiz kuex naunghez rueq thuiyc juing,

¹⁸yuq muinz naungshiq saz yalxjuik hez wawc vshiz shiz kuex Benjamin miqsaz muex tvwaungc jix ukhaq yuq muinz mvnhttonx mrvhumc kueq ngoz tueq naungshiq rueq ngoz gay tiq shex ningkhvnc nuex, tsuinghez muex naungshiq saz yalxjuik sahez kuex tvlvmz lot miq,” ngoz tueq rvjungc phvnc wuez tueq.

¹⁹Kvruex yimaq tsuingshiq rueq, “Shilo ghaq nuex wawc wvruip tvhungx yaq Yehowa tvkoc moalx kuex mtanc rvmuq nuex httuiuc wvnc yaq shex,” ngoz tueq tvmaung wuez yaq. (Shilo ghaq kuex Bethel maq ghaqkhux kox, Lebona maq ghaqyaz kox, Bethel nuiyc Shekhem hvlwvl wawc lvmx kvmaq shaldungc kox samx nuex httax yaq.)

²⁰Tsuingshiq rueq Benjamin miqsaz muex ngoc, “Nuimhez kuex svpiq roz kvyuq kvhttuiyq kaz vtueq,

²¹bvmc kaz kuinz. Kvruex moalx baunglaung wvnuemc muex ngoz tueq Shilo ghaq wawc yalxtux rulx kaz ruiux yuq, svpiq sunc kvmaq nuimhez kuex dung wuez kuinz. Nuimhez miq pumz tek vtueq yalxjuik rulx kvwawc taungx nyuiuz tvyaungc muex vphuq phok lvp vtueq nuimhez rulc vdvmz Benjamin mungx nuex shvlx wvnc wuez shuinz.

²²Tsuingshiq waz hez rvmuq ngoz ruiux vyungx waz tamx kaz vtueq nuimhez muex tvwanc ruiux yuq, ‘Kejux maq nuiyhez muex tvwoz kuq kuit, yvmx khoc lac ngoz ruiux lec nuiyshiq rueq nuimshiq kuex khvt vtueq tsuinghez kuex shvlx laq tiq rvmuq. Ekvmaq tsuinghez kuex nuiyshiq muex tvwaungc kuy jix muinz nuimshiq rvmuq ningkhvnc nuex nuimshiq miqmac bomkhvmc tvbac gay mvrax kuex lvp shuinx rvmuq,’ ” ngoz tueq jungx wuez shuinz.

²³Benjamin miqsaz rueq kvkhoc ruez wuez tueq; Shilo ghaq nuex wvnuemz yaq yalxjuik rulx wawc miq pumz tek rueq taungx nyuiuz tvyaungc muex httauk wuez vtueq, tsuinghez kuex shvlx laq wuez tueq. Kvruex yimaq tsuinghez kuex miqmac ghaq vraungx nuex yek waung ruiux miqmac ghaqshungc htenc kuex tec vtueq httax wuez tueq.

²⁴Kvruex baunglaung kvjungx yaq Israel miqsaz htenc rueq muinz miqmac phvnx yuimx vwuik httax yaq nuex yek waung wuez tueq.

²⁵Kvtanc jauz kuex Israel miqsaz nuex hokhvmx vguez shauk doc rvtueq. Miq tek vtueq miqmac rueq vroc roc dvyx shuimx kaz wuez tueq.