Read Tase Naga PHOC WAZ 4 Bible Online

PHOC WAZ 4 - Tase Naga bible

PHOC WAZ 4

¹Ehud thueyc kay yix maq Israel miqsaz kuex Yehowa muex laukshiz mvrax yaq gay yek tueq.

²Kvkhoc rvtueq Yehowa rueq Hazor ghaqyungx nuex httax yaq Kanaan hokhvmx waz Jabin muex tsuingshiq kuex tvkhvt tvtaungx gay tueq. Piq nolaungx phungc wawc miqlaungx kuex pungnuk phvnx httaz juing Haroshet ghaq jix Sisera rvtueq.

³Jabin kox nuex yanx renc 900 httax yaq, piq rueq Israel miqsaz kuex wawc rok nueyc tup tvkuilc tvdaz maq guirguenz vtueq guimz wvnc tueq. Kvkaq Israel miqsaz rueq Yehowa kox wawc romc kuy tvkoc guyc sez thoz wuez tueq.

⁴Lappidot taungnyuiuz Debora kuex shvmmax nyuiuz shiz nuiyc Israel miqsaz tvkoc phoc waz muex yaungx vtueq khuec vkhac phox kuq ruiux yaq.

⁵Piq kuex Ephraim kanx hong Rama nuiyc Bethel hvl wawc pam pulx jungx yaz nuex ngaungc ruiux tuex, Israel miqsaz muinz piq rueq htvp htaz kuq yaq kuex lvmc kay kvyuq kaz ruiux tuex.

⁶Raungnuiyq shiz piq kuex Naphtali ghaq hong, Kedesh maq Abinoam saz Barak kuex gvl vtueq, “Yehowa Israel Tishox rueq vruex nvrc kvjaz kuex mnoz muex kuq kv-phux: ‘Naphtali nuiyc Zebulun phvnx wawc miq 10,000 kuex gvl vtueq, tsuinghez kuex Tabor Kanx nuex shvlx wvnc shuiuz.

⁷Kishon Ruilx nuex nuimhez kuex khvt tvkoc ngaz rueq Jabin nolaungx phungc wawc miqlaungx yungx Sisera kuex gvl laq raungx. Piq nuex nolaungx renc htenc nuiyc nolaungx bix htenc httax yaq, yuq muinz ngaz rueq piq kuex mnoz muex tvtaungx gay phaungx, ngoz tueq mnoz muex jungx yaq,’” ngoz tueq jungx tueq.

⁸Kvkaq Barak rueq, “Mnoz ngaz rulc vdvmz nuex kaz ruiux kuex ngaz kaz taungx, yuq muinz mnoz ngaz rulc vdvmz nuex kaz muq ngoz ruiux kuex ngaz muinz kaz mauk,” ngoz tueq tvralc tueq.

⁹Piq rueq muinz, “Vhvlx nauz, mnoz rulc vdvmz ngaz kaz naungx raungx, yuq muinz Yehowa rueq yalxjuik nyuiuz yauk nuex Sisera kuex lekuq tueq ningkhvnc nuex kvruex taungx wvnc shix kuex mnoz rueq muingc jungc lvp shuiux rvmuq,” ngoz tueq tvralc tueq. Kvkhoc rvtueq Debora kuex Barak rulc vdvmz Kadesh nuex kaz wvnc tueq.

¹⁰Barak rueq Zebulun nuiyc Naphtali phvnx htenc kuex Kedesh nuex gvl koq tueq, miq 10,000 rueq muinz piq yix nuex phvnx laq naungx tueq. Debora muinz piq rulc vdvmz kaz naungx tueq.

¹¹Kvruex baunglaung Keni miqsaz Heber kuex Kadesh hep Zanannim hong wawc khauk rauk jungx yaz nuex piq tap kuex guirx tueq. Piq kuex Moshe nuingx waz Hoba suiuz vsaz wawc Keni miqsaz nuex luiuz kay jix waz rvtueq.

¹²Barak kuex Tabor Kanx nuex duiz woz vtuex kuex Sisera rueq tuiuz vtueq,

¹³piq yanx renc 900 rac piq miq htenc kuex tvtuimx ruiux raz tueq, pungnuk phvnx httaz juing baung Haroshet maq Kishon Ruilx nuex httuiuc laz tvyuz tvkaz tueq.

¹⁴Kvruex yimaq Debora rueq Barak muex ngoc, “Kaz kuiuz! Yehowa rueq mnoz muex lvmx shvlx kuq yaq! Majuiuc raungnuiyq vpiq rueq mnoz muex Sisera kuex tvtaungx gay kv-phux,” ngoz tueq jungx tueq. Kvkhoc rvtueq Barak kuex piq miq 10,000 rulc vdvmz Tabor Kanx maq svt kaz tueq.

¹⁵Barak rueq piq nolaungx daungx rulc vdvmz nuex khvt koq tueq Yehowa rueq Sisera yanx renc htenc nuiyc nolaungx bix htenc lotlaz kuex pungpanc rvpanc tvyaungc gay koq tueq Sisera kuex renc htauk maq svt kaz vtueq yaz sawx maq yuz wvnc tueq.

¹⁶Barak rueq muinz renc htenc nuiyc nolaungx bix htenc kuex pungnuk phvnx httaz juing baung Haroshet ghaq nuex httuiuc laz yurc khvt koq tueq, Sisera nolaungx bix kuex washiz muinz kvjungx muq thueyc tueq.

¹⁷Sisera kuex Keni miqsaz Heber taungnyuiuz Jael tap nuex yuz wvnc tueq, yvmx khoc lac ngoz ruiux lec Hazor hokhvmx Jabin kuex Heber yuimx jix rulc nomic rvyaungc shec ningkhvnc nuex rvtueq.

¹⁸Jael kuex dung kaz vtueq Sisera muex ngoc, “Waung loq, jiyungx waz lex; ngvy tap mungx nuex nyuip waung loq. Nauk hiyaz kaz,” ngoz tueq gvl tueq. Kvkhoc rvtueq piq kuex nyuip waung koq tueq Jael rueq piq kuex vtuk juing vshiz yix kox kvyuq httuiyq tueq.

¹⁹Piq rueq kvruex nyuiuz muex ngoc, “Ngaz khvmx sac hvlc yuix kok shiz tanc kuq koq,” ngoz tueq thoz koq tueq Jael rueq mansuiux puix vhtawc taq ngvmx khuix tsongbumx kuex daz vtueq puix kok shiz kuy yix maq, piq kuex httuiyq yek tueq.

²⁰Kvruex yimaq Sisera rueq kvruex nyuiuz muex ngoc, “Mnoz rueq tap kaluix daungx maq bvmc shuiuz, mkhoc shoc maq miq washiz shiz rueq tap mungx nuex miq vhttax haz ngoz tueq wiz ruiux yuq, vguez ngoz shuiuz,” ngoz tueq jungx tueq.

²¹Sisera kuex nyec hvlc rvtueq kvtsoalx rvkaz tueq. Kvkaq Jael rueq wungc rawc vshiz rac tap wawc zunx kawshiz kuex lvmz ruiux vyumx saz maq piq kox nuex nyuip waung vtueq, zunx kvruex ghaq nuex httuiuc laz vnac sawx nuex but gay tueq.

²²Barak rueq Sisera kuex thuiyc khuemx koq tueq, Jael rueq piq kuex humc kaz vtueq jungx tueq kuex, “Vyuq waung loq! Mnoz rueq thuiyx vshuiux waz kuex ngaz tvkhic kuq ix,” ngoz tueq jungx tueq. Barak kuex Jael rulc tap mungx kvyuq nyuip waung koq tueq, vnac sawx nuex tap wawc zunx kvshungc iruiux thueyc kaz tueq Sisera kuex khiz tueq.

²³Kvruex raungnuiyq Tishox rueq Israel miqsaz muex Kanaan hokhvmx waz Jabin kuex tvtaungx gay tueq.

²⁴Tsuinghez rueq piq kuex tvbac gay nuex httuiuc laz hengx hvlc khvt wvnc tueq.