Read Tase Naga TVKHIC 21 Bible Online

TVKHIC 21 - Tase Naga bible

TVKHIC 21

¹Kvruex yimaq raungnyalx nuiyc ghaq nyalx kuex ngaz rueq khiz tauk. Vphaungc wawc raungx nuiyc ghaq kuex moz wvnc vtuex shex, svmuktvrax muinz vguez shex.

²Kvkaq Vsawc Ghaqyungx ngoz yaq Yerusalem vnyalx kuex, waz nyalx waz tvkoc vtvsvp rvp shec nyuiuz nyalx nyuiuz ikhoc tvhungx htaungx lot vtueq, Tishox httaz yaq raungmungx wawc svt kaz yaq kuex ngaz rueq khiz tauk.

³Ngaz rueq hoc daungraungc maq jungx yaq kvjaz yunghvlc vshiz tay tauk kuex: “Majuiuc Tishox kuex miqsaz rulc vdvmz nuex httax yaq! Vpiq kuex tsuingshiq rulc vdvmz nuex httax tuex, tsuingshiq kuex vpiq miqsaz muex yaungx wuez tuex. Tishox vpiq shauk pumz kuex tsuingshiq rulc vdvmz nuex httax vtueq vpiq kuex tsuingshiq Tishox muex yaungx tuex.

⁴Vpiq rueq tsuingshiq muikphic httax yaq htenc kuex tuit kuq shuex. Yimaq vthueyc vmvy kuex vguez shex, vyonz vyex, vkhoarc vnyerc nuiyc vthuiuz vsac, vhunc vnyec muinz httax muq shex. Kungkhux nuex yaungx wvnc tueq htenc kuex moz wvnc vtuex shex,” ngoz tueq jungx tueq.

⁵Kvruex yimaq hoc daungraungc htauk nuex ngaungc yaq waz rueq, “Majuiuc httax yaq lotlaz kuex ngaz rueq vnyalx vtvdung shex,” ngoz tueq. Vpiq rueq ngaz muex, “Vruex wuiyq tvtsuingc taq shuiuz, yvmx khoc lac ngoz ruiux lec vruex kvjaz htenc kuex tsuingrux kvjaz, tvluimc juing kvjaz rvtueq,” ngoz tueq jungx phuex.

⁶Kvmaq hulawx vpiq rueq, “Yauk shuimc lot tauk shex! Ngaz kuex Alpha nuiyc Omega, vphaungc vyaungc muinz, vtvsuip muinz rvtauk. Khvmsvy jix ukhaq yuq muinz rullungx yuix kuiuq wawc yuix kuex vhtawz vrawz kuy rac muq maq nuingc lvp vkhangx ngaz rueq kuq shaungx.

⁷Taungx wvnc lvp jix waz rueq vruex bomkhvmc rulc rv-ngvlc lvp wvnc vtueq, ngaz kuex piq Tishox muex yaungx taungx, nuiyc piq kuex Isaz muex yaungx tuex.

⁸Yuq muinz vhiz thuinz httaz jix, kvmluimx muq maq tvmtuing vguez jix, layx vbac miqsuirc vsac jix, miq thvy jix, htokpawx yauk shuimc jix, mantan htaqpix shuimc jix, yac yuimx nawk palx jix, vrot vkaq kvjaz jungc jix lotlaz kuex wvr nuiyc kanz luic yaq jumx nuex httuiuc wuez tuex, vruex kuex lauknueyc thueyc rvtueq,” ngoz tueq jungx phuex.

⁹Kvkaq vtvsuip thuimkux mvrc yaq kok shuimc jix raungkamx waz mvshix phungc kvwawc washiz kuex ngvy kox nuex kaz vtueq, “Kaz loq, Khelbuenx Saz taungnyuiuz, nyuiuz nyalx nyuiuz kuex mnoz muex tvkhic kuq ix,” ngoz tueq jungx kuq phuex.

¹⁰Kvmaq Siyac rueq ngaz kuex romz wvnc vtueq raungkamx waz rueq ngaz kuex johvlc kankhux nuex shvlx wvnc ruiux, Tishox httax yaq raungmungx wawc svt kaz yaq Vsawc Yerusalem Ghaqyungx kuex ngaz muex tvkhic kuq phuex.

¹¹Kvruex ghaqyungx kuex Tishox ngauz vngax phelez yaq. Kvruex ghaqyungx phelez yaq kuex pvtlung ikhoc wuix guilguil hvlc raz tueq lungmenx lung ikhoc phez yaq.

¹²Kvruex ghaqyungx kuex wvyungc wvloayc raz tueq johvlc palx ruk nuiyc kaluix puc 12 daz shec vtueq kvruex kaluix kvyuq raungkamx bix 12 rueq bvmc yaq. Kvruex kaluix htauk kvyuq Israel phvnx waruiuz 12 muingc kuex wuiyq taq tueq.

¹³Shaldungc kox nuex kaluix puc thuimx, shalx nyuip kox nuex kaluix puc thuimx, ghaqkhux kox nuex kaluix puc thuimx, ghaqyaz kox nuex kaluix puc thuimx httax yaq.

¹⁴Kvruex ghaqyungx palx ruk kuex vphaungc vyaungc lung rokshiz rac vnueyc htauk nuex tvjvp vtueq, kvruex htenc htauk kvyuq Khelbuenx Saz vpiq kamx waz hez rokshiz rac vnueyc muingc kuex wuiyq taq tueq.

¹⁵Ngaz rulc kvjak yaq raungkamx waz yauk nuex ghaqyungx muinz, ghaqyungx kaluix muinz, palx ruk muinz htaz juing kuimshawx ruiuz pumz vshiz shuimx yaq.

¹⁶Kvruex ghaqyungx kuex vshuk shuk bvlic vyungc vloayc ngvlc rv-ngvlc rvtueq. Raungkamx waz rueq ghaqyungx kuex ruiuz pumz maq htaz koq tueq vloayc, vyungc, vjoz kuex kilometer 2,400 phok httax yaq.

¹⁷Kvmaq ghaqyungx palx ruk kuex htaz koq tueq, miqsaz rueq htaz shix rulc rv-ngvlc yaq, raungkamx waz htaz tueq kuex vjoz meter 60 rvtueq.

¹⁸Ghaqyungx palx ruk kuex lungmenx maq ruk shec tueq, ghaqyungx kvruex kuex shuirx ikhoc wuix yaq kuimshawx muik shauk maq tvhungx shec tueq.

¹⁹Ghaqyungx palx ruk lung htenc kuex lungsex phvnx ruip saz maq tvhungx shec tueq, vphaungc kuex vwuil, vnueyc ngoc yaungc kuex khuingc wuil, vthuimx ngoc yaungc kuex vgvmx nuiyc vluiz rvshot, bvlic ngoc yaungc kuex vwuil phvnx shiz,

²⁰bv-ngac ngoc yaungc kuex nvm-yaz phvnx ruip lomx yaq, tvruk ngoc yaungc kuex shawx huiux, mvshix ngoc yaungc kuex lungmenx, tvjvt ngoc yaungc kuex khuingc wuil phvnx shiz, tvkuiuz ngoc yaungc kuex topaza, rokshiz ngoc yaungc kuex vwuil shawx huiux, rokshiz rac vshiz ngoc yaungc kuex nvm-yaz gix tsuingx, rokshiz rac vnueyc ngoc yaungc kuex pasic nvm-yaz rvtueq.

²¹Kaluix vshiz nuex pvle vshiz shiz tvhungx guirc tvy ningkhvnc nuex kaluix rokshiz rac vnueyc nuex pvle rokshiz rac vnueyc rvtueq; ghaqyungx lvmx muinz shuir wuix ikhoc kuimshawx muik shauk maq tvhungx shec tueq.

²²Kvruex ghaqyungx kvyuq shomc yuimx kuex ngaz rueq khiz mauk doc, yvmx khoc lac ngoz ruiux lec kvruex ghaqyungx wawc shomc yuimx kuex ngauz vngax httaz hvlc Taungjix Tishox nuiyc Khelbuenx Saz kvruex rvtueq.

²³Kvruex ghaqyungx kuex tv-phez lez tvkoc shalx nuiyc yapix kuex rac muq shex, yvmx khoc lac ngoz ruiux lec Tishox ngauz vngax rueq kvruex ghaqyungx kuex tv-phez lez ruiux, Khelbuenx Saz kuex wvrkok rvtueq.

²⁴Mungkawx miqsaz htenc kuex kvruex ghaqyungx phelez kvyuq khuemshamx wuez tuex, ghaq htauk wawc hokhvmx bix rueq muinz miqmac tsak vnyvmx htenc kuex kvruex ghaqyungx kvyuq lvmz wvnc wuez shuex.

²⁵Ghaqyungx kaluix htenc kuex raungnuiyq nuiyqtuimc daz shec shuex; tsuingshiq kuex mkaq muinz shauk gay muq, yvmx khoc lac ngoz ruiux lec kvruex ghaqyungx kvyuq raungnyauk ngoz tueq vguez.

²⁶Miq phvnx ruip rawx rueq miqmac ngauz vngax nuiyc tsak vnyvmx htenc kuex ghaqyungx kvyuq lvmz wvnc wuez shuex.

²⁷Yuq muinz vshuy vshac phvnx yvmx yuq muinz kvruex ghaqyungx kvyuq nyuip lvp tuex rvmuq, miqsuirc vsac phvnx shuimc jix, vrot vkaq kvjaz jungc jix htenc muinz nyuip lvp muq. Khelbuenx Saz rullungx luik dvp nuex muingc wvlc tvy yoalx jix dvyx kvruex ghaqyungx kvyuq nyuip lvp tuex.