Read Tase Naga TVKHIC 7 Bible Online

TVKHIC 7 - Tase Naga bible

TVKHIC 7

¹Kvruex yimaq raungkamx waz bvlic kuex ghaq shuk bvlic nuex jvp vtueq, ghaq htauk nuex muinz, svmuktvrax htauk nuex muinz, pulx jungx htenc nuex muinz raungguil muq tvkoc shuk bvlic wawc raungguil htenc kuex tvsuingx shuimx gay tueq.

²Kvmaq vtvraungx httax yaq Tishox tvsik kuex shuimx yaq raungkamx washiz shaldungc kox maq waung yaq kuex ngaz rueq khiz tauk. Tishox rueq ghaq nuiyc svmuktvrax muex vgvrx vtsvrx tvgurc lot juing luimc vkawc kuy rvhumc jix raungkamx waz bvlic muex,

³“Naungshiq Tishox nvrc waz hez khaungkuimx nuex tvsik kuex naungshiq rueq max tvkop kuq wawwawx nuimshiq rueq ghaq, svmuktvrax nuiyc pulx jungx htenc kuex uraq muinz vgvrx vtsvrx nauk tvhttuiuc kaz,” ngoz tueq yunghvlc maq ramc tueq.

⁴Tishox rueq tvsik tvkop yoalx jix miq htenc kuex 144,000 rvtueq lvmz ngaz muex jungx kuq phuex. Kvruex kuex Israel phvnx waruiuz rokshiz rac vnueyc wawc,

⁵Yuda, Ruben, Gad, Asher, Naphtali, Manase, Simon, Lewi, Issakar, Zebulun, Yosep, nuiyc Benjamin waruiuz htenc wawc, waruiuz shiz wawc 12,000 kuex tvsik tvkop kuy rvhumc tueq.

⁹Kvruex yimaq ngaz rueq lawc koq tueq, miq htenc lotlaz kuex uraq muinz wvl lot muq miq vkung daungx vshiz kuex kvyuq ngaz rueq khiz tauk! Tsuingshiq kuex miqphvnx ruip saz wawc muinz, waruiuz ruip rawx wawc muinz, mungtan ruip rawx wawc muinz, kvjaz phvnx ruip wawc muinz vhttuiuc kaz hez rvtueq, tsuingshiq rueq vluiz khoz vkhvy svmx wuez ruiux tsuingshiq yauk htenc nuex pam yauk laungx tuz htenc kuex shuimx vtueq hoc daungraungc nuiyc Khelbuenx Saz khaungkac nuex jvp wuez yaq.

¹⁰Tsuinghez rueq thuic yunghvlc maq, “Palc daungc wvnc lvmx kejux kuex hoc daungraungc htauk nuex ngaungc yaq naungshiq Tishox nuiyc Khelbuenx Saz kox wawc vkaz rvtueq,” ngoz tueq ramc wuez tueq.

¹¹Raungkamx bix lotlaz rueq muinz, walaungx bix htenc nuiyc ngvmx saz bvlic muinz hoc daungraungc kuex tvkomc tuimz jvp yaq. Kvkaq tsuingshiq kuex hoc daungraungc khaungkac nuex bumx vtueq Tishox muex nawk palx wuez ruiux,

¹²“Amen! Tvtsvmc kvmc vshix, ngauz vngax, taksux tharc, kejux vyungx, tvtsanc nganc, luimc vkawc nuiyc hungc vlaungc kuex pattup pat-sac naungshiq Tishox nuex mhttax wvnc kueq! Amen!” ngoz tueq jungx wuez yaq.

¹³Walaungx bix phungc wawc washiz rueq ngaz muex, “Vruex khoz vkhvy vluiz svmc jix hez kuex ukhaq lac, mnuex maq vkaz laz?” ngoz tueq wiz phuex.

¹⁴Ngaz rueq, “Jiyungx lex, ngaz rueq tuiuz mauk, mnoz rueq tuiuz vshuiux,” ngoz tueq tvralc tauk. Piq rueq, “Tsuingshiq kuex vkuilc vdaz mungx wawc vluenx wvnc miqsaz htenc rvtueq. Tsuingshiq rueq miqmac khoz vkhvy htenc kuex Khelbuenx Saz tvguiy maq tvsawc hoal wuez tueq.

¹⁵Kvkhoc rvtueq tsuingshiq kuex Tishox hoc daungraungc khaungkac nuex httax lvp vtueq vpiq shomc yuimx nuex raungnuiyq raungwvrx vpiq muex nawk palx yaq. Hoc daungraungc htauk nuex ngaungc yaq waz rueq muinz tsuingshiq rulc vdvmz httax vtueq tvkhup wungx kuq shuex.

¹⁶Tsuingshiq kuex yix maq laukshiz htemc vrvmc rvhumc muq; raungkawc muinz, pinhtumc kalc muinz tsuingshiq htauk nuex httuiuc muq,

¹⁷yvmx khoc lac ngoz ruiux lec hoc daungraungc vyvmc baung nuex ngaungc jix waz Khelbuenx Saz rueq tsuingshiq kuex tvkhup wungx lawc kuq ruiux, rullungx yuix ruilx lvp juing baung nuex shvlx shuex ningkhvnc nuex rvtueq. Tishox rueq muinz tsuingshiq muikphic htenc lotlaz tuit kuq gay shuex,” ngoz tueq jungx phuex.