Read Tase Naga TVKHIC 9 Bible Online

TVKHIC 9 - Tase Naga bible

TVKHIC 9

¹Kvmaq bv-ngac ngoc yaungc raungkamx waz rueq bolic tuimz koq tueq, raungwawc ghaq nuex ruiysuiyq poshiz dvy kaz yaq kuex ngaz rueq khiz tauk. Kvruex ruiysuiyq muex ghaqkhurx thuiuz hvlc saqpix kuex kuq tueq.

²Piq rueq ghaqkhurx thuiuz hvlc kuex daz koq tueq, wvr khuiuq kuex wvrkez maq dung yaq ikhoc dung wvnc tueq; kvruex wvr khuiuq rueq shalx nuiyc raungwuilx wanc kuex tv-nyauk gay tueq.

³Wvr khuiuq mungx kvwawc kup jawrawx htenc kuex dung vtueq ghaq nuex dvy kaz tueq, tsuingshiq muex phvmx rueq lvp tueq phvnx ikhoc luimc vkawc kuex kuq tueq.

⁴Tsuingshiq rueq httuingx htenc wuiljuit wuiljaungx phvnx htenc, pulx htenc, vganc phvnx kemc htenc kuex heq shuex rvmuq, khaungkuimx nuex Tishox tvsik tvkop muq miqsaz htenc dvyx tvkuilc daz lvp shuex rvtueq.

⁵Kup jawrawx htenc rueq miq htenc kuex yapix lex bv-ngac tvkuilc daz shuex maq lvy vtueq vthvy gay vkhangx kuq muq. Kvruex tvkuilc daz yaq thuiuz vsac kuex phvmx rueq kauk yaq ikhoc thuiuz yaq.

⁶Kvruex yapix lex bv-ngac baunglaung tsuingshiq rueq vthueyc juing lvmx thuiyx shuex, yuq muinz humc muq; tsuingshiq vthueyc roc wuez shuex, yuq muinz vthueyc vmvy kuex tsuingshiq kox wawc yuz wvnc tuex.

⁷Kup jawrawx htenc kuex ralx lungc tvkoc tvyoalc yaq mvre rulc rv-ngvlc yaq; tsuingshiq khux htenc kuex kuimshawx khushec ikhoc kuex buz vtueq tsuingshiq htvlx kuex miq htvlx rulc rv-ngvlc yaq.

⁸Tsuingshiq khux mul kuex yalxjuik rulx khux mul ikhoc httax yaq, tsuingshiq wac htenc kuex hangsic wac rulc rv-ngvlc yaq.

⁹Tsuingshiq khuiuq htenc kuex yanx khuiuq puingc ikhoc maq puingc taq tueq, tsuingshiq raungkungx yvp tvruingc kuex ralx rvkhvt yaq mvre renc paunghvlc tvruingc rulc rv-ngvlc yaq.

¹⁰Tsuingshiq miz htenc kuex phvmx miz rulc rv-ngvlc vtueq vshuiuq httax yaq, tsuingshiq miz nuex miqsaz muex yapix lex bv-ngac tup tvthuiuz sac tvkuilc daz juing luimc vkawc httax yaq.

¹¹Tsuingshiq nuex tsuingshiq hokhvmx washiz httax yaq, piq kuex ghaqkhurx thuiuz hvlc mungx wawc raungkamx waz rvtueq. Piq muingc kuex Hebre kvjaz maq Abdon, Greek kvjaz maq Apolion rvtueq. (Kvruex vlvmz kuex “Tvbac gay jix waz”) ngoc bomc rvtueq.

¹²Vphaungc wawc kawc yawc kvkhuirc juing kuex lvy wvnc tueq shex; kvruex yimaq kawc yawc kvkhuirc juing vnueyc httuiuc wvnc yaq.

¹³Kvruex yimaq tvruk ngoc yaungc raungkamx waz rueq bolic tuimz koq tueq, Tishox khaungkac nuex httax yaq kuimshawx shomrawx shuk bvlic maq dung yaq tvruingc vshiz ngaz rueq tay tauk.

¹⁴Kvruex tvruingc kuex tvruk ngoc yaungc raungkamx waz muex, “Euphrat ruilx hep nuex vkhvrc taq raungkamx waz bvlic kuex dawc gay shuiuz,” ngoz tueq.

¹⁵Kvruex raungkamx waz bvlic kuex vkhvrc vruez wawc tvdungc gay rvhumc tueq; tsuinghez rueq miqsaz kuex mvnthuimx wawc mvnshiz thvy gay muex ngoz tueq vkhing, raungnuiyq, yapix, vwawc laung nuex vtvyoalc taq shec hez rvtueq.

¹⁶Mvre htauk nuex ngaungc jix shvrvyx bix kuex kodic roknueyc httax yaq ngoz tueq ngaz rueq tay tauk. (200,000,000).

¹⁷Kvmaq ngvy tvkhic romzyac nuex mvre htenc nuiyc kvruex htenc htauk nuex ngaungc jix shvrvyx bix kuex ngaz rueq khiz tauk, tsuingshiq kuex wvr ikhoc shawx yaq, khuingc wuil, vmenx, kanz ikhoc lec yaq khuiuq puingc juing maq puingc taq tueq. Mvre khux poz htenc kuex hangsic khux poz rulc rv-ngvlc yaq, tsuingshiq nuix maq wvrluic, wvr khuiuq nuiyc kanz htenc dung yaq.

¹⁸Kvruex mvre htenc nuix wawc dung yaq wvrluic, wvr khuiuq nuiyc kanz ngoz yaq kuilc daz phvnx thuimx ningkhvnc nuex miqsaz mvnthuimx wawc mvnshiz thvt gay tueq.

¹⁹Yvmx khoc lac ngoz ruiux lec mvre htenc hungc vlaungc kuex vnuix nuiyc vmiz nuex httax yaq. Tsuingshiq miz htenc kuex puiuc rulc rv-ngvlc yaq, kvruex vmiz kvyuq vkhux httax yaq, kvruex maq miq htenc kuex kauk yaq.

²⁰Vruex kuilc daz juing wawc luenx wvnc vtueq kvjungx yaq miqsaz htenc kuex tsuingshiq rueq shuimx yaq kvwawc thuinz kvlayc wuez muq. Tsuingshiq rueq htaungc htenc nuiyc muik maq khiz muq, vnac maq tay muq, kvmoay yaz lot muq phvnx kuimshawx, kuimphox, nvyrvyx, lung nuiyc pulx penc htenc maq vguirx yac yuimx htenc nawk palx lvmx kuex httvr wuez muq.

²¹Miq thvy yauk shuimc wawc muinz, ngvmc khic wanc yac maq kuiuz, sahtok sapawx yaungx lvmz nuiyc vguiuq vpawx yauk shuimc wawc muinz tsuingshiq thuinz kvlayc lvp wuez muq.