Read Tase Naga 1 SAMUEL 1 Bible Online

1 SAMUEL 1 - Tase Naga bible

1 SAMUEL 1

¹Ephraim phvnx wawc Elkana muingc yaq washiz kuex Ephraim hong wawc Rama ghaq nuex httax yaq. Piq kuex Zupha waruiuz wawc Tohu yuimx wuinz nuex seng yaq Elihu suiuz Jeroham saz rvtueq.

²Elkana kuex vjuik nyuiuz nueyc httax yaq, Hanna nuiyc Peninna rvtueq. Peninna kuex vsaz vhttax, Hanna kuex saz guez.

³Elkana kuex Tvphaungc Tvsuip Yehowa muex nawk palx kay shomc nawk juing shomc kuy muex ngoz tueq Rama ghaq maq Yehowa shomc waz bix Eli saz miqwaz saz nueyc rvtueq Hophani nuiyc Phineha httax yaq Shilo ghaq nuex wawc tek kaz ruiux tuex.

⁴Elkana kuex piq rueq shomc nawk juing shomc kuq shuex ruip rawx Peninna muex tsuingnueyc tsak phvlc shiz, piq sahez muex tsak phvlc phuq phok phvlx kuq tueq.

⁵Yehowa rueq Hanna kuex saz guez tvyaungc ningkhvnc nuex Elkana rueq piq kuex lungwawc hvlc rvtueq yuq muinz tsak phvlc shiz dvyx piq muex kuq tueq.

⁶Yehowa rueq piq kuex saz guez tvyaungc ningkhvnc nuex piq rulc rvlongx jix Peninna rueq piq thuinz tvbac laz guirguenz vtueq yomnamc yaq.

⁷Ekvkhoc wawc tek yaungx yaq ningkhvnc nuex; Yehowa yuimx nuex kaz ruiux tuex nuex Peninna rueq Hanna kuex pinhtumc yomnamc ningkhvnc nuex piq kuex khoar vtueq phuiuz vsvy yvmx muinz phauk saq ruiux muq.

⁸Vtaungx waz Elkana rueq piq muex, “Hanna lex, mnoz kuex yvmx ngoz tueq lac khoar kaz tuiux? Yvmx rvtueq lac phauk saq muq rvlaq shuiux? Mnoz kuex mkaq muinz yvmx ngoz tueq lac mthuinz bac yaq nguinx? Mnoz rueq msaz waz rokshiz lvp shuiux htauk nuex muinz mtvkoc ngaz kuex pinhtumc vjux httax yaq rvmuq haz?” ngoz tueq wiz tueq.

⁹Shilo ghaq wawc Yehowa yuimx kvmaq tsuinghez rueq phuiuz vsvy lot yix, raungnuiyq shiz Hanna kuex kvtenc kaz wvnc tueq. Piq kuex vthuinz bac hvlc maq guyc sez khoar vtueq Yehowa kox wawc vjux thoz tueq. Kvkaq shomc waz Eli kuex kaluix hep wawc piq ngaungc chuing nuex ngaungc yaq.

¹¹Hanna rueq kvtuemc bomkhvmc kuex vkhoc taq tueq: “Tvphaungc Tvsuip Yehowa lex, mnvrc nyuiuz ngaz vruex lawc koq! Ngaz kuilc daz jamjaux vtaungx vruex khiz kuq vtueq ngaz kuex tvmaung rvwvl koq! Ngaz nauk lauk gay vkueq! Mnoz rueq ngaz muex miqwaz saz vshiz kuq ruiux yuq, piq khux mul kuex mkaq muinz sulx mauk[1] maq piq rullungx wvlex mnoz muex lekuq phaungx, ngoz tueq ngaz rueq khvmc kuq vphaungx.”

¹²Hanna rueq Yehowa kox wawc vluz waq vjux thoz yaq nuex, Eli rueq vnuix bar kvmoay kuex lawc tueq.

¹³Piq rueq kuiyqshuik maq vjux thoz tueq; vnuix bar kuex kvmoay yaq, yuq muinz kvjaz dung muq. Kvkhoc rvtueq Eli rueq joal pawx kaz ngoz tueq tvmaung vtueq,

¹⁴piq muex ngoc, “Joal pawc jix waz ikhoc mshauk pumz kuex nauk tvkhic vkueq! Joal kuex mamc gay ruiux koayc shuiuz!” ngoz tueq ngoz kuq tueq.

¹⁵Piq rueq, “Rvmuq, jiyungx waz lex, ngaz kuex joal pawc jix rvmauk, ngaz rueq joal kuex nuingx ruiux mauk! Ngvy thuinz htumx yaq ningkhvnc nuex Yehowa kox nuex ngaz kuilc daz jamjaux vtaungx kuex jungc tvtay muex ngoz tueq vjux thoz vshaungx.

¹⁶Ngaz kuex htawz guez yalxjuik nyuiuz ngoz tueq nauk tvmaung kaz. Ngvy thuinz nuex pinhtumc kvbot nyvnx nyex thuiyc vtaungx ningkhvnc nuex vkhoc vjux thoz vshaungx rvtueq,” ngoz tueq tvralc tueq.

¹⁷Eli rueq, “Nomic maq waung wvnc kuiuz, mnoz rueq vpiq kox wawc thoz shuiux kuex Israel Tishox rueq mkuq kv-phux,” ngoz tueq jungx kuq tueq.

¹⁸Piq rueq muinz, “Ngaz muex mkaq muinz menjenc kuy kuex tvmaung hvt rvkoq,” ngoz tueq tvralc tueq. Kvruex yimaq vthuinz tvbac muq maq phuiuz vsvy raungluingx phauk saq vtueq waung wvnc tueq.

¹⁹Nvp yix raungnuiyq Elkana nuiyc vyuimx wuinz htenc kuex raungnvp saz maq kvtenc vtueq Yehowa muex nawk palx lot yix, Rama ghaq wawc yuimx nuex yek waung tueq. Elkana kuex vjuik nyuiuz Hanna rulc woalc naungx koq tueq, Yehowa rueq piq vjux thoz bomc kuex tay kuq tueq.

²⁰Kvkhoc rvtueq piq kuex wvgvnz yaungx vtueq miqwaz saz jawx tueq. Piq rueq Samuel ngoz tueq muingc tueq, kvruex ngoc, “Piq kuex Yehowa kox wawc ngaz rueq vthoz,” ngoz tueq vlvmz tvkhic tueq.

²¹Vkhing httuiuc wvnc yek koq tueq, piq rueq bomkhvmc taq tueq rulc rv-ngvlc Elkana nuiyc vyuimx wuinz htenc kuex Shilo nuex kaz wvnc vtueq, wawc tek shomc nawk kuq yaq phvnx nuiyc htep shomc nawk kuy juing kuex Tishox muex shomc kuq tueq.

²²Yuq muinz majuiuc lauk kuex Hanna kaz naungx muq doc. Piq rueq vtaungx waz muex ngoc, “Nox rueq puix puinz shuex kvkaq lvmx lvy, piq kuex Yehowa yuimx nuex httaz tvlanc tvhttaz tvkoc ngaz rueq shvlx laq shaungx,” ngoz tueq jungx tueq.

²³Elkana rueq, “Vhvlx nauz, mnoz rueq vhvlx tvmaung shuiux kvkhoc mruez kueq; nox rueq puix puinz shuex nuex httuiuc laz yuimx nuex dvyx httax kuiuz. Yehowa vpiq bomkhvmc kuex mhungx wvnc kueq,” ngoz tueq tvralc tueq. Kvkhoc rvtueq Hanna kuex yuimx nuex dvyx httax vtueq vsaz kuex dungx ghaq tueq.

²⁴Piq kuex vsaz rueq puix puinc gay yix maq wawc thuimx manx roalc pung[2] vshiz, wungwanx kilogram 10, svpiq tix juix shiz kuex lvmz laq vtueq vsaz rulc vdvmz Shilo ghaq nuex kaz tueq. Hanna rueq nox kvruex Shilo ghaq wawc Yehowa yuimx nuex Samuel kuex shvlx laq tueq nuex piq nosaz shauk dvyx doc rvtueq.

²⁵Manx kuex thvy yix maq nox kvruex Eli kox nuex shvlx laq tueq.

²⁶Hanna rueq piq muex ngoc, “Jiyungx waz lex, ngaz muex mvrax nauk tvgurc vkueq, mnoz rueq ngaz kuex rvwvl lvp vphux haz? Yehowa kox wawc vjux thoz ngoz tueq vruex baung vyuq ngaz jvp yaq nuex mnoz rueq khiz toq nyuiuz iruex rvtauk.

²⁷Vruex nox kuex ngaz rueq thoz koq tueq, thoz tauk rulc rv-ngvlc ngaz muex kuq phuex.

²⁸Kvkhoc rvtueq ngaz rueq piq kuex Yehowa muex lekuq vshaungx. Piq vtvraungx wawwawx Yehowa tvkoc mruez kueq,” ngoz tueq jungx tueq. Kvruex yimaq kvruex yuq Yehowa muex tsuinghez rueq nawk palx wuez tueq.