Read Tayta Diosninchi Isquirbichishan Génesis 49 Bible Online

Génesis 49 - Tayta Diosninchi Isquirbichishan bible

Génesis 49

¹Llapan wamrancunata gayaycur Jacob niran: «Ñaupäman witimuy-llapa shamoj watacunacho ima päsashunayquipaj cashantapis willapänäpaj.

²«Wamräcuna, witimuy-llapa. Nishäta wiyacuy-llapa.

³«Rubén, gamga canqui guechpa wamrämi. Gamga mösullaraj caycaptëmi yurirayqui. Gamga mas rispitäduchari canquiman. Mas munayniyojchari canquiman.

⁴Ichanga gamga märistayquiwan puñucuycushpayquimi pengayman churamarayqui. Chaypitami manana mayurnönachu canquipaj. Gamga chayasha mayunömi cashcanqui.

⁵«Simeonwan Levïga chay shongullami. Paycunaga mana cuyapaypami pitapis wañuchin.

⁶Nogaga manami paycuna parlacushancho cayta munächu. Paycunaga rabyacurcurmi runacunata wañuchiran. Asicunan-cashallami törucunapa ancuncunatapis cuchurgäriran.

⁷Nogaga melanäcömi gamcuna rabyar rurashayquita. Chaypitami gamcunataga mashtaypa-mashtarishayqui. Chaura intëru Israel nasyunchömi tallucasha caycangapaj.

⁸«Judá, gamga chiquishojcunata munayniquichömi chararanquipaj. Quiquiquipa wauguiquicunapis umpuycur-umpuycur rispitashushpayquimi alabashunquipaj.

⁹Judá, gamga canqui juc manta liyun cäsata charircur cutimojno; micunanpaj pampaman lätacuycojno. Chayno caycaptiquega ¿piraj gamta rabyachishunquiman?

¹⁰Judätaga manami pipis guechongapächu munayniyoj cayninta. Manami pipis guechongapächu mandaj car charashan bastunnintapis rasunpa mandaj chayamunancama. Chay mandajtami llapan runacunapis rispitangapaj.

¹¹Chay wichan übas aypalla captinmi bürruncunatapis übas yöracunamanna watanga. Bïnu yacunöraj captinmi bïnuwan röpantapis tagshacunanpänöna canga.

¹²Aypalla übas captinmi ñawincunapis bïnupita mas yanaraj cangapaj. Aypalla lëchi captinmi quiruncunapis lëchipita mas yurajraj cangapaj.

¹³«Zabulón tiyanquipaj lamar cantuncunachömi. Gamga tiyanquipaj büquicuna chayanancho, llojshinanchömi. Lindayquega chayarangapaj Sidoncamami.

¹⁴«Isacar, gamga sinchi bürru curralcho wichgaraycajnömi canquipaj.

¹⁵Tiyanayquipäno alli partita ricar, wajtayquitapis camapanquipaj chaycho guepicunata apanayquipaj. Mana rimacuyllapami rantisha runano ricacunquipaj.

¹⁶«Dan, gamga quiquiqui castallatami alli arriglanquipaj. Gamga canquipis Israel trïbumi.

¹⁷Dan gamga canquipaj culebra näni cantuncho mayaj-mayaj caycajnömi; cawallupa chaquinta cañirir muntasha aywaycajta garpurejno.

¹⁸¡TAYTA DIOS gam salbamänallayquitanami shuyaraycä!

¹⁹«Gad, gamtaga juc-läpita juc-läpitami asaltashunayquipaj yaycamongapaj. Ichanga paycunatapis asaltanquipämi.

²⁰«Aser, gampaga aypallami micuyniqui cangapaj. Ray amatar yachashan micuycunapis cangapämi.

²¹«Neftalí, gamga lluychu-nirajpis munashayquipa puricojmi canquipaj. Cuyayllapaj wawayoj lluychunömi canquipaj.

²²«José, gamga yacu cantuncho lanta wiñar amatar wayojnömi canquipaj. Nircur lantapa rämancunapis tapya jananpa lätajnöraj canquipaj.

²³Fiyu runacuna chiquishushpayquimi lëchancunata gamcunaman jitamongapaj. Chayno rurar rabyachishunquipaj.

²⁴Ichanga gampa ricrayquicuna fiyupa callpami canga. Lëchayquicunatapis sinchimi charinquipaj. Chaynöga canquipaj Jacobpa Tayta Diosnin yanapäshuptiquimi, Israelpa michejnin chapajnin yanapäshuptiquimi,

²⁵yäracushä Dios yanapäshuptiquimi, munayniyoj Dios bindisyunta goshuptiquimi. Syëlupitami payga bindisyunninta churamonga. Bindisyunta goshushpayquimi pacha rurinpitapis yacuta pashtachimonga. Warmicuna achca wawata tarinanpäpis bindisyunta goshunquipaj.

²⁶Noga bindisyunta goshäga unaypita-pacha cacoj jircacuna mana ushacaj cashannömi cangapaj. Bindisyunta goshäcunaga gam Josëchömi caycangapaj. Gamga llapan wauguiquicunapita mas rispitädumi caycanqui.

²⁷«Benjamín, gamga canqui atojnömi. Imatapis charircur tuta tutallami micunqui. Tardipana llapan puchöpacushayquitapis aypurinqui.»

²⁸Chaycunami caran chunca ishcay trïbu Israelcuna. Chaynömi papänenga llapan wamrancunata bindisyunta goran pay wañucuptin cada-ünun imanöpis cananpaj.

²⁹Chaypitana juc junaj Jacobga llapan wamrancunata cayno niran: «Ñaupa wañoj castäcunawan tincoj aywacunäpänami caycä. Pampaycäramanqui Het runa Efronpa chacrancho taytäcuna pamparaycashan machay uchcuman.

³⁰Chayga caycan Canaán particho Mamrepa chimpan Macpelacho machay caycajmi. Chaytaga chacrantinta Abrahammi Efronpita rantiran llapan castancunawan chayman pampacunanpaj.

³¹Chaymanmi pamparan Abrahamtapis warmin Saratawan, Isaactapis warmin Rebecatawan. Nogapis chaymanmi pamparä Leata.

³²Chaycho caycaj chacratawan machaytaga rantiran Het runacunapitami.»

³³Chayno llapan wamrancunata willapayta usharcur Israelga cämanman yapay wegucuycuran. Nircur wañucäcuran.