Read Tayta Diosninchi Isquirbichishan 2 Samuel 1 Bible Online

2 Samuel 1 - Tayta Diosninchi Isquirbichishan bible

2 Samuel 1

¹Saúl wañushanpita Davidga Amalec runacunata binsiycur cuticuran Siclagman. Chaycho ishcay junaj goyaran.

²Warannin junäga Saulpa suldäruncunapita chayaran juc runa, fiyupa llaquicuywan röpanpis pasaypa rachir-ushasha, umanpis allpalla. David cajman chayaycorga rispitashpan gongurpacuran.

³David tapuran: «¿Maypitataj chayaycämunqui?» nir. Chaura niran: «Ichicllapami gueshpiycamushcä Israel suldärucuna pachacarashanpita.»

⁴Chaura David niran: «¿Imataj casha? ¡Llapanta willamay ari!» Niptin chay runa niran: «Israelcunami pillyapita gueshpir aywacusha. Paycunaga achcami wañusha. ¡Saulpis wamran Jonatanpis wañusha!»

⁵Willajta Davidga tapuran: «¿Imanöpataj musyanqui Saulpis Jonatanpis wañushanta?» nir.

⁶Chay runa niran: «Nogaga puriycashächo mana yarpashapita camacarä Gilboa jircaman. Chaychömi ricashcä Saultaga lansanman tuncacuycajta. Filistea runacunaga carrëtanwan y cawallun muntasha cajcuna jananchöna caycaran.

⁷Chay öra Saulga ticrarcur ricäramar gayamaran. Chaura noga aywashcä.

⁸Nircur ‹¿Pitaj canqui?› nimaran. Chaura noga willarä Amalec runa cashäta.

⁹Payga nimaran ‹Cayman shamuy. Juclla wañurachimay›. Payga wañuycarannami. Yangallanami cawaycaran.

¹⁰Chaymi ñaupanman witiycur wañuycachishcä. Yamajna caycajta ricar manami yarpashcänachu cawanantaga. Nircorga gamman apamunäpämi corönanta, brasalëtata jorgucurishcä tayta.»

¹¹Chauraga Davidpis, yan'guincunapis fiyupa llaquicuypita röpancunatapis rachir-usharan.

¹²Fiyupa wagaran Saúl wañushanpita, Jonatán wañushanpita, Israel suldärucuna pillyacho pirdishanpita. Chaymi goyarpoj ayunaran.

¹³Chaypita Davidga willaj mösuta tapuran: «¿Gamga may runataj canqui?» nir. Chaura chay runa niran: «Nogaga cä Amalec nasyunpitami. Lagacamushcämi» nir.

¹⁴Davidga sinchipa niran: «Gamga ¿imanirtaj wañuchishcanqui TAYTA DIOS acrashan rayta?»

¹⁵Nircur yan'guinta gayarcur niran: «¡Canan öra wañurachiy!» Chaura Amalec runataga wañojpaj tucsiycuran.

¹⁶Davidna niran: «Quiquiquimi juchayöga canqui wañunayquipaj. Quiquiquimi willacushcanqui TAYTA DIOS acrashan rayta wañuchishayquita.»

¹⁷Saúl wamran Jonatanwan wañushanpita Davidga fiyupa llaquicur cantaran.

¹⁸Chay nishanta Judá runacunata yachachinanpaj niran. Llaquicur cantashanga isquirbiraycan Jaser libruchömi. Cantar niran:

¹⁹«¡Ay Israel, jircayquicunachömi alli caycajta ima-aycayquicunatapis illgächisha! ¡Fiyupami binsiycusha pillyay yachajcunataga!

²⁰Filistea warmicuna mana cushicunanpaj, juchasapa warmicuna cushicuypita mana pinticachänanpaj Gat siudächo ama rimacuchunchu. Ascalonpa cällincunachöpis ama willacuychu.

²¹«¡Gilboa jirca, cananpitaga amana gamman imaypis tamyamuchunnachu! ¡Ni shullaypis yurichunchu! Gamga canqui wañushacuna jitaränan pampami. Chaychömi pillyay yachajcuna charashan escüdunpis lluchcar-ushasha casha. Chaychömi Saulpa chapacuna escüdunpis asëtin pishiptin mana chillapyashanachu.

²²Jonatanpa lëchanga yawartarämi jorgurej. Saulpa espädanga aychatarämi rachirej. Paycunaga ollgojcunatami wañurgärachej.

²³«Saultawan Jonatantaga runacuna amatarmi cuyaran. Paycunaga manami raquicashachu cawarpis ni wañurpis. ¡Ancacunapitapis masmi cörrej! ¡Liyuncunapitapis mas sinchimi caj!

²⁴¡Israel warmicuna fiyupa wagay Saulpäga! Payga lïnupita, murädu tëlapita röpata jaticoj. Gorinpawan burdasha cuyayllapajcunata jaticoj.

²⁵«¡Imanöshi pillyashan jircacho binsiycusha pillyay yachajcunataga! ¡Jonatanpis wañusha altu jircachömi!

²⁶¡Jonatán, gampäga fiyupami llaquicuycä. Gamwanga fiyupami yachänacuranchi! ¡Fiyupami cuyamarayqui! Warmicunapa shongunpitaga mas alli shongumi cashcanqui.

²⁷¡Imanöshi binsiycusha pillyay yachajcunataga! ¡Armancunapis ushacashami!»