Read Tayta Diosninchi Isquirbichishan 2 Samuel 22 Bible Online

2 Samuel 22 - Tayta Diosninchi Isquirbichishan bible

2 Samuel 22

¹Davidtaga TAYTA DIOS salbaran Saúl wañuchinanpaj caycaptin, waquin chiquinacushancunapis wañuchinanpaj caycaptin.

²Chaymi Davidga cantar niran: «TAYTA DIOS, gammi gagano chapämajnë canqui. Gammi pacamaj, salbamaj canqui.

³Tayta Diosnëmi washäcoj gaga, chapacuna escüdö, munayniyoj salbamaj, altunnin pacacunä, altunnin gueshpinä, salbamajnë. ¡Pillyacho salbamashcanqui!

⁴TAYTA DIOS, alabasha canayquimi camacan. Mañacamuptë, chiquimajcunapita salbamanquimi.

⁵«Wañuyga yacu-jinami ñiticarcamaran. Juchu-jina janächöna captin fiyupa mancharirä.

⁶Wañuyga wascanömi pitucarcamaran. Wañunäpämi togllacunata churapämaran.

⁷Fiyupa llaquicur TAYTA DIOSTA mañacurä. Mañacurä yanapämänanpaj. Payga Templunpita wiyamaran. ¡Gaparayparaj mañacushäta wiyamaran!

⁸«Chauraga intërucho fiyupa timlur caran. Syëluta tucnarajcunapis sicsicyaran. Tayta Dios rabyacurcuptinmi llapanpis cuyuriran.

⁹Senganpita goshtay llojshiycaran, shiminpitana ushacoj nina. Shiminpaga ajtuycämuran ratataycaj shanshata.

¹⁰Syëluta garirir urämuran. ¡Chaquin rurinpana caycaran fiyupa yana pucutay!

¹¹Querubín anjilta muntacurcur buylaran. Wayrachömi aywacuran.

¹²Paypa toldonga yanauyaycaj pucutaymi. Paypa chucllanga yana chicnu chacaymi.

¹³Fiyupa achicyaycaj illguymi ñaupanpita llojshiran. Ratataycaj shanshami tamyamuran.

¹⁴«Janajcho caycaj TAYTA DIOSGA syëlupita-pachami parlamuran räyuno busninwan.

¹⁵Lëchancunatami jitamuran. Illguynincunatami achicyächiran. Chiquimajcunatapis machiypa-machir gueshpichiran.

¹⁶TAYTA DIOS ollgöpaptin, sinchipa pücariptin, lamar rurin alayri ricacäcuran. Munduta tucnarajcunapis alayri ricacaran.

¹⁷«Tayta Diosga janajpita-pachami ayparcamusha. Maquinwan jorgamasha may-may lamarpita.

¹⁸Fiyupa munayniyoj chiquimajcunawan pillyacho captëpis salbamasha. Paycunaga caran nogapita mas callpayojmi.

¹⁹Ñacaycho caycaptëmi paycunaga magamaran. Chaypis TAYTA DIOSGA yanapämaran.

²⁰Paymi alliman jorgamaran. Cuyamashpanmi salbamaran.

²¹Allillata rurashäpitami TAYTA DIOSGA salbamasha.

²²Nogaga TAYTA DIOS munashannöllami goyaycä. Juchata mana ruraypami imaypis gatirashcä.

²³Mandamintuncunataga llapantami musyaycä. Laynincunataga imaypis cumlishcämi.

²⁴Payga musyanmi munashanno cawashäta. Manami imatapis llutancunata rurashcächu.

²⁵Allillata rurashäpitami TAYTA DIOSGA premyuta gomasha.

²⁶«Tayta Dios, cuyapäcoj cajtaga yanapanquimi. Alli cajcunatapis yanapanquimi.

²⁷Juchaynajcunatapis yanapanquimi. Fiyu cajcunatami ichanga castiganqui.

²⁸Umildicunataga salbanquimi. Alli-tucojcunatami ichanga manacajman churanqui.

²⁹TAYTA DIOS, gammi achicyaj pachata ricaycächimanqui. Chacaj pachacho ricacunätapis gammi cawaycächimanqui.

³⁰Gam yanapämaptiquimi chiquimajcunata magaj yaycushaj. Siudänincunata curalaraycaj jananpapis yaycurishaj.

³¹«TAYTA DIOS nishanga llapanpis allimi. Tayta Diosga aunishanta llapantapis cumlinmi. Diosga yäracojcunata washanmi.

³²TAYTA DIOSPITA mas jucga manami canchu. Paynöga manami pipis washämashwanchu.

³³Tayta Diosmi fiyupa munayniyoj pacacunäga. Ima rurashäcunatapis alli llojshichin.

³⁴Paymi chaquëtapis apurä japachin lluychupatanöraj. Paymi altu jircacunachöpis mana manchacuypa cachiman.

³⁵Paymi pillyapäpis yachachiman. Paymi callpata goman runsipita lëcha illapacunata chutanäpäpis.

³⁶Gammi chapämanqui, salbamanqui. Cuyapäcoj cayniquiwanmi alliman churamashcanqui.

³⁷Gammi alli purichimashcanqui. Chaymi mana lluchcacashcächu.

³⁸«Chiquimajcunatapis gaticachashcä, illgächishcä. Llapanta ushaycur-rämi cutimushcäpis.

³⁹Ushajpämi ushashcä. Binsiptë ñaupämanmi tuniran. Nircur manami jatarishanachu.

⁴⁰Gammi guërracho pillyanäpaj callpata gomashcanqui. Gammi conträcunata binsinäpaj munaynëman churamushcanqui.

⁴¹Binsinäpaj yanapämaptiquimi cuncapita lluchcashcä. Chaynöpami chiquimajcunata llapanta ushacächishcä.

⁴²‹Yanapämay› niptinpis manami pipis yanapashachu. TAYTA DIOSTA mañacuptinpis manami yanapashachu.

⁴³Ñuchu allpatanömi rurarirä. Cällicunacho mitu caycajtanömi lluchcar-ushashcäpis.

⁴⁴Runacuna conträ jatariptinpis salbamashcanqui. Nasyuncunapa mandajnin canäpämi churamashcanqui. Cananga jäpa runacunami sirbimanpis.

⁴⁵Chay runacunaga nishäta llapantami wiyacun. Jäpa runacunami rispitaman.

⁴⁶Juc-lä nasyun runacunaga manchacamanmi. Pacacunanpitapis sicsicyaycarmi llojshimun.

⁴⁷«¡Alabasha cachun TAYTA DIOS! ¡Alabasha cachun chapämajnëga! ¡Fiyupa rispitasha cachun salbamaj Tayta Diosnëga!

⁴⁸Mana allita ruramashanpita Tayta Diosmi ayñita cutichisha. Llapan runacunatapis munaynilläman churasha.

⁴⁹Chiquimajcuna fiyupa rabyasha caycaptinpis, mana wiyacojcuna nogapa conträ jatariptinpis Paymi salbaman. ¡Tayta Dios gammi salbamanqui fiyu runacunapita!

⁵⁰Chaymi llapan nasyuncunapa läduncho alabashayqui. Cantaypapis alabashayquimi TAYTA DIOS.

⁵¹Sumaj allicho cananpämi yanapanqui acrashayqui raytaga. Imaypis allimi ricanqui Davidta, paypita mirar aywajcunata.»