Read Tayta Diosninchi Isquirbichishan 2 Samuel 23 Bible Online

2 Samuel 23 - Tayta Diosninchi Isquirbichishan bible

2 Samuel 23

¹Ushanantana David rimaran. Isaïpa wamranmi caran Davidga. Paytami Tayta Diosga alliman churar munayniyojyächiran. Paytaga Jacobpa Diosninmi acraran ray cananpaj. Israelcunacho payga caran alli cantajmi:

²«Nogataga TAYTA DIOSPA Espiritunmi rimaycächiman. Pay yarpashancunatami rimä.

³Israelcunapa Diosninmi parlasha. Israelcunata washajmi nimasha: ‹Runacunata mandashpan alli arrigläga, Tayta Diosta manchacuypa mandäga

⁴canga pacha waraptin rama-rama achicyaycajno, tamyariptin guewacunata wiñachinanpaj lliuyaraycaptin tutapa inti ratamojno.›

⁵Nogapita mirar aywajcunataga Tayta Dios manami cachaycongachu. Imaycamapis yanapämänanpämi aunimasha. Sumajmi parlashcäcuna. Manami rucacangachu. Paymi imapitapis alliman jorgaman. Yarpashäcuna alli llojshinanpaj camacächin.

⁶Mana alli rurajcunaga cashacunano jitarisha canallanpämi caycan. Cashacunata jogariptinchi tucshimashanchïnömi paycunapis mana allita ruramanchi.

⁷Chaycunata yatananpäga charin fyërruta u lansatarämi. Nircurmi ninaman gaycupaycun ushajpaj rupananpaj.»

⁸Davidpa mas mijurnin caj suldäruncuna quimsami caran. Rimir cajmi caran Hacmonipa wamran Joseb-basebet. Paymi caran chay quimsa suldärucunapa capitannin. Juc cutichömi Joseb-basebetga lansanwan wañuchiran pusaj pachac (800) suldärucunata.

⁹Paypa guepanmanna caran Ahohi runa Dodupa wamran Eleazar. Paywanga quimsajmi caran jinyu pillyajcuna. Pasdamimchöpis Davidwan iwal caycaran. Filistea runacuna pillyananpaj shuntacaptin Israelcuna gueshpiran.

¹⁰Eleazarmi ichanga mana manchaypa ichiparan. Filistea runacunata wañuchiran asta maquinpis uticänancama. Maquinpis uticayllawanna aptacäcuran. Sablita mana cacharirannachu. Chay junäga TAYTA DIOSMI binsichiran. Chaypitarämi llapan suldärucuna Eleazarpa guepantana aywaran chiquishancunapa ima-aycantapis charicurcunanpaj.

¹¹Eleazarpa guepanmanna caran Arar runa Aguepa wamran Sama. Lehicho Filistea runacuna shuntacaran pushpu mururaycashan chacracho. Chaura Israelcunaga gueshpir aywacuran.

¹²Sama ichanga pullan pampaman ichicuycuran. Filistea runacunata wañuchiran Israelcunata washashpan. Chaynömi TAYTA DIOSGA binsichiran.

¹³Israelcunacho caran quimsa chunca (30) jinyu pillyajcuna. Paycunapitami cosëcha wichan quimsaj aywaran Davidwan tincoj Adulam machayman. Filistea suldärucunaga Refaim pampacho pachacaraycaran.

¹⁴Davidga caycaran pacacunancho. Chay öra juc röpa Filistea suldärucunaga caycaran Belencho.

¹⁵Davidga rimarcuran: «¡Belén marcapa puncun yaycunacho caycaj yacuta pillaraj macyaycamanman upurcunäpaj!» nir.

¹⁶Chaura quimsaj baluryojcunaga Filistea runacuna pachacaraycashanman yaycuran. Belenman yaycunacho caycaj pösupita yacuta jorgurcur Davidta apaparan. Chaura payga upuyta mana munaranchu. Chaypa ruquin TAYTA DIOSPAJ pampaman jicharan

¹⁷«¡Upunätaga TAYTA DIOSPIS ama munachunchu! Uporga cay runacunapa yawarninta upojnöchari caycäman. Paycunaga wañuytapis mana mancharmi aywasha apamunanpaj,» nir. Chayno nirmi upuyta mana munaranchu. Chaytaga ruraran quimsa chuncapita (30) quimsaj baluryojcunami.

¹⁸Joabpa wauguin Abisai Sarviapa wamranga caran quimsa chunca (30) imatapis mana manchaypa pillyajcunapa mandajnin. Paymi juc cuticho quimsa pachac (300) runacunata tucsicuna lansanwan wañuycachiran. Chaynöpami quimsa chunca (30) cajcunapita mas rejsisha caran.

¹⁹Mas rispitasha caran quimsa chunca (30) cajpitaga. Chaynöpami paycunapa mandajnin cananpaj churaran. Ichanga manami ayparanchu quimsaj mas mijurcunamanga.

²⁰Cabseel runa Joiadapa wamran Benaía caran jinyu. Paymi achca cuti pillyacho fiyupa almiraypajcunata ruraran. Moab runa Arielpa ishcan wamrancunatapis wañuycachiran. Juc cutichöpis rashtaycaptin uchcuman yaycuran. Chaycho juc liyunta wañuchiran.

²¹Jatuncaray Egipto runatapis wañuchiran. Egipto runaga tucsicuna lansayoj caran. Benaiaga guerullawanmi ichiparan. Nircorga lansanta guechurcur tucsiycuran.

²²Joiadapa wamran Benaiaga chaynöpami quimsa chuncapita (30) mas rispitasha caran.

²³Waquinpita mas imatapis chasquiran. Chaypis manami ayparanchu quimsaj mas mijurcunamanga. Paytaga David churaran quiquinta täpaj suldärucunapa mandajnin cananpaj.

²⁴Quimsa chunca (30) jinyucunaga caran: Joabpa wauguin Asael, Belén runa Dodupa wamran Elhanán,

²⁵Harod runa Sama, Harod runa Elica,

²⁶Palti runa Heles, Tecoa runa Iquespa wamran Ira,

²⁷Anatot runa Abiezer, Husah runa Sibecai,

²⁸Ahohi runa Salmón, Netofa runa Maharai,

²⁹Netofa runa Baanapa wamran Heled, Benjamín particho caycaj Gabaa runa Ribaipa wamran Itai,

³⁰Piratón runa Benaía, Gaas ragrapa yacu aywajpita Hidai,

³¹Arba runa Abi-albon, Bahurim runa Azmavet,

³²Saalbón runa Eliaba, Jasenpa wamrancuna; Jonatán;

³³Arar runa Samapa wamran Jonatán; Arar runa Sararpa wamran Ahíam;

³⁴Maaca runa Ahasbaipa wamran Elifelet, Gilo runa Ahitofelpa wamran Eliam,

³⁵Carmel runa Hezrai, Arab runa Paarai,

³⁶Soba runa Natanpa wamran Igal, Gat runa Bani,

³⁷Amón runa Selec, Beerot runa Naharai (Payga caran Sarviapa wamran Joabta cuydaj),

³⁸Jatir runa Ira, Jatir runa Gareb,

³⁹Het runa Urías. Llapanga caran quimsa chunca ganchiswan (37).