Read Tayta Diosninchi Isquirbichishan 1 Crónicas 14 Bible Online

1 Crónicas 14 - Tayta Diosninchi Isquirbichishan bible

1 Crónicas 14

¹Tiro nasyunpa raynin Hiram cachamuran ruquincunata Davidwan parlaj. Paycunawan cachamuran albañilcunata, carpintërucunata. Apapämuran sedru guerucunata Davidpa palasyunta arupänanpaj.

²Chaura David tantiyacuriran Israelcunapa raynin cananpaj TAYTA DIOS rasunpa churashanta. Davidga tantiyacuran Israelcunata Tayta Dios cuyashpan payta mas alli yanapaycashanta.

³Jerusalencho David majachacaran mas juc warmicunawan. Paycunacho wamrancuna caran ollgupis warmipis.

⁴Jerusalencho yurej ollgu wamrancuna caran: Samúa, Sobab, Natán, Salomón,

⁵Ibhar, Elisúa, Elpelet,

⁶Noga, Nefeg, Jafía,

⁷Elisama, Eliada, Elifelet.

⁸Davidta Israelcunapa raynin cananpaj churashanta mayaycur Filistea runacunaga ashej aywaran. Chayta mayaycur Davidpis paycunawan pillyaj aywaran.

⁹Aywashpan Filistea runacunaga pachacuran Refaim ragracho.

¹⁰Chaymi Davidga Tayta Diosta mañacur tapucuran: «¿Filistea runacunata magämanchu? Binsinäpaj ¿yanapämanquichu?» nir. Chaura TAYTA DIOSGA niran: «Ayway ari. Yanapäshayquimi binsinayquipaj.»

¹¹Davidpis aywar chayaran Baal-perazimman. Chaychömi binsiran. Nircur niran: «Aypalla yacu imatapis apacojnömi Tayta Diosga chiquimajcunapa chaupinpa päsanäpaj camacächisha.» Chaypitami pillyashan partita jutichaparan «Baal-perazim» nir.

¹²Filistea runacunaga ïduluncunata cachariycur gueshpiran. Chaura Davidnami rupachichiran.

¹³Filistea runacunaga Refaim pampaman yapay yaycuran asaltananpaj.

¹⁴Chaymi Davidga Tayta Diosta yapay tapucuran. Tayta Diosnami niran: «Ñaupanpaga ama yaycuychu. ‹Bálsamo› yöracuna caycashan cajman chayaycur guepanpa yaycuy.

¹⁵Mayanquipämi yöracuna jananpa runa aywaycajtano. Chaura jinan öra pillyaj yaycunqui. Nogaga gamcunapa ñaupayquitami aywashaj Filistea runacunata wañuchinäpaj.»

¹⁶Davidga Tayta Dios nishanno ruraran. Filistea suldärucunata wañuycärachiran Gabaonpita Gezercama.

¹⁷Chayno David rurashanga intëru nasyuncunaman mayacaran. TAYTA DIOSNAMI camacächiran Davidtaga llapan nasyun runacuna manchacunanpaj.