Read Tayta Diosninchi Isquirbichishan 1 Crónicas 16 Bible Online

1 Crónicas 16 - Tayta Diosninchi Isquirbichishan bible

1 Crónicas 16

¹Tayta Diospa babulninta apar chayachiran churaränanpaj rurachishan tolduman. Nircorga Tayta Diospa ñaupancho rupachina sacrifisyucunata y alli goyaypita sacrifisyucunata rupachiran.

²Nircur Davidga llapan runacunata TAYTA DIOSPA jutincho bindisyunta goran.

³Israel famillyacunataga llapantami aypuran ollguta warmitapis juc tantata, pedäsu aychata, päsas tantatapis.

⁴Leví famillyacunata David churaran TAYTA DIOSPA babulnin churaraycashan cajcho mañacunanpaj, agradësicunanpaj, y TAYTA DIOSTA alabananpaj.

⁵Paycunapa mandajnin caran Asaf. Guepanman caran Zacarías, chaypita Jeiel, Semiramot, Jehiel, Matatías, Eliab, Benaía, Obed-edom, Jeiel. Paycunaga tucaj arpano salteriocunatawan arpacunata. Asaf tucaj latilluta.

⁶Cüracunana Benaiawan Jahaziel tucaj trompëtacunata. Llapanpis tucaj Tayta Diospa babulnin ñaupanchömi.

⁷Chay junajllami Asaftawan alabäshejcunata Davidga niran TAYTA DIOSTA agradësicur alabananpaj. Caynömi alabaran:

⁸«¡TAYTA DIOSTA agradësicuy-llapa! ¡Paypita willacuy! Imata rurashantapis intëru marcacunaman willacuy.

⁹Alabansacunawan payta alabay. Almiraypajcunata rurashanta willacuy.

¹⁰«Tayta Dios rispitädu cashanpita cushicuy. TAYTA DIOSTA ashejcunaga cushicuy-llapa.

¹¹Munayniyoj TAYTA DIOSNINCHÏMAN guellicuy. Imaypis paywan tincuyta ashiy.

¹²Fiyupa almiraypaj milagrucunata rurashanta yarpay. Mandamintuncunata nishancunatapis yarpay ari

¹³sirbejnin Israelpita mirar aywajcuna, acrashan Jacobpa wamrancuna.

¹⁴«TAYTA DIOSMI noganchïpa Diosninchi. Paypa maquinchömi caycan cay pachaga.

¹⁵Payga aunishanta imaypis yarpashami. Waranga miray aywajcamapis manami gongashachu.

¹⁶Abrahamta aunishanta, Isaacta aunishantapis yarpashami.

¹⁷Jacobpäga camacächiran layno cananpaj; Israelcunapäna parlacushanga imaycamapis mana gongacänanpaj.

¹⁸Chaymi niran: ‹Canaán partitami goycushayquipaj gamcunapa partisyunniqui cananpaj.›

¹⁹«Paycunaga caran wallcajllami. Chaychöga juc ishcay jäpa runacunalla caran.

²⁰Paycunaga nasyunnin nasyunninmi puricoj. Juc raypa juc raypa maquinmanmi chayaj.

²¹Chaypis Tayta Diosga manami munaranchu pï ñacachinantapis. Raycunatapis willaparan:

²²‹Ama yatapaychu acrashä runacunataga. Profëtäcunatapis ama ñacachiychu› nir.

²³«Cay pachacho tiyaj cäga llapayqui TAYTA DIOSTA alabay. Salbacoj cashanta waran-waran willacuy.

²⁴Munayniyoj cashanta nasyuncunaman willacuy. Fiyupa almiraypäta rurashancunatapis marcacunaman willacuy.

²⁵TAYTA DIOSGA munayniyojmi. Fiyupa rispitashpanchi alabashun. Payga dioscunapita mas fiyupa manchacunami.

²⁶Waquin marcacunapa diosnincunaga manacajllami. TAYTA DIOSNINCHÏMI ichanga syëlutapis camasha.

²⁷Pay caycashanchöga fiyupami achicyan. Pay tiyashan cajchöga munayninpis fiyupa cushicuypis caycanmi.

²⁸«Llapan marcacho tiyajcuna TAYTA DIOS munayniyoj cashanta tantiyacuy-llapa. Payta aduray-llapa.

²⁹TAYTA DIOSTA rispitanapaj cashanno rispitay-llapa. Garayniquiwan paypa ñaupanman yaycuy. Cuyayllapaj wasincho aduray.

³⁰¡Paypa ñaupanchöga cay pachacho cajcuna sicsicyachun! Paymi mundutaga sumaj tacyachisha mana cuyucunanpaj.

³¹¡Syëlupis cay pachapis cushicuchun! ¡Intëru nasyuncunapäpis ‹TAYTA DIOSMI Raynenga› nichun!

³²¡Lamar yacupis, chaycho caycajcunapis gaparpächun! ¡Chacracunapis chaycho caycajcunapis cushicuchun!

³³¡Munticho caj yöracunapis cushicuypita gaparpächun cay pachacho mandananpaj shamoj TAYTA DIOSPA ñaupancho!

³⁴«TAYTA DIOSNINCHÏTA agradësicuy amatar alli cashanpita. Payga imaycamapis chaynöllami cuyamanchi.

³⁵Llapayqui niy: ¡Nogacunapa salbacoj Diosnë salbaycamay ari! ¡Nasyuncunacho caycajtapis shuntamashpayqui jorgaycamay gamllata nogacuna agradësicunäpaj, cushishana alabanäcunapaj!

³⁶¡Israelcuna rispitashan TAYTA DIOSGA imay-yajpis alabasha cachun!» Llapan runacunapis «Chayno cachun» niran. Nircorga TAYTA DIOSTA llapan alabaran.

³⁷Chaynömi Davidga numrashan runacunata churaran TAYTA DIOSPA babulnin ñaupancho caycänanpaj Asafta, paywan caycajcunata, paycunana waran-waran ima ruraycunatapis rurananpaj.

³⁸Obed-edomtapis sojta chunca (60) runacunatawan churaran chaycho caycänanpaj. Jedutunpa wamran Obed-edomtawan Hosatana churaran puncuta täpananpaj.

³⁹Sadocta paywan caj cüracunatapis niran TAYTA DIOSPA wasin Gabaoncho caycänanpaj.

⁴⁰Paycunata niran TAYTA DIOSPAJ rupachina caj altarcho tardipa tutapapis rupachina sacrifisyucunata ruparcaycächinanpaj. TAYTA DIOS isquirbichishan laycho niycashanno rurananpämi niran.

⁴¹Paycunawan caycänanpaj churaran Hemanta, Jedutunta. Paycunatawan iwal alabananpaj jutinpa acrashan caj runacunatapis cacharan. Paycunata niran: «TAYTA DIOSTA agradësicunqui. Payga imaycamapis chaynöllami cuyamanchi.»

⁴²Paycunaga tucaj trompëtacunata, latillucunata, waquin tucanacunata Tayta Diospaj cantajcunawan iwal. Jedutunpa wamrancunatana churaran puncu yaycurinata täpananpaj.

⁴³Chaypitanaga llapan runacuna wasinman-cama aywacuran. Davidpis wasinman cuticuran famillyancunata bindisyunta gonanpaj.