Read Tayta Diosninchi Isquirbichishan Éxodo 31 Bible Online

Éxodo 31 - Tayta Diosninchi Isquirbichishan bible

Éxodo 31

¹Moisesta mastapis TAYTA DIOS niran:

²«Judá trïbupita caj Bezaleeltami noga acrashcä. Payga Uripa wamranmi, Hurpa willcanmi.

³Bezaleeltaga nogami yarpayta goshcä abilösu runa cananpaj. Chaymi payga ima ruraytapis yachan. Imata rurananpäpis yarpaynin caycan.

⁴Goripita, guellaypita, runsipita cuyayllapajcunata rurayta yachan.

⁵Cuyayllapaj rumicunatapis llagllayta yachanmi. Llagllarcur camarajlla cananpaj cañichin. Chaynömi guerupitapis llagllayta yachan. Tucuy-niraj cuyayllapäcunata rurayta yachan.

⁶Payta yanapänanpaj yarpayta goshcä Ahisamacpa wamran Aholiabta. Payga caycan Dan trïbupitami. Llapan musyaj yachajcunatapis chaynömi yanapashcä masta musyananpaj yachananpaj. Chaynöpami paycunaga gamta willashäcunata ruräshenga.

⁷Paycuna ruranga: Tolduta, babulta, babulpa chapananta, Tincuna Tolducho llapan ima cajcunatapis,

⁸mësata llapannintinta, goripita candilëruta llapannintinta, insinsu goshtachicuna altarta,

⁹rupachicuna altarta llapannintinta, paylata jamacunantinta,

¹⁰sirbimar jatiränan röpata, Aarón mandaj cüra cashpan jaticunan rispitädu röpata, wamrancuna cüra car sirbimänanpaj jaticunan caj röpacunatapis,

¹¹acrashä cajta wiñapäna asëtita, rispitädu cajcho goshtachinanpaj alli asyaj insinsutapis. «Paycunaga llapantapis ruranga gamta willashänöllami.»

¹²TAYTA DIOS mastapis Moisesta niran:

¹³«Israel-masiquicunata willapanqui säbadu jamay junaj cananpaj nishächo jamananpaj. Säbadu jamay junäga caycan juc señalmi gamcunata, wamrayquicunata, paycunapita mirajcunatapis acrashäta musyanayquipaj.

¹⁴«Säbadu jamay junajtaga rispitädu captin llapayqui rispitanqui. Chay jamay junajta mana rispitaj cäga wañuchicangami. Chay junajcho ima aruytapis aroj cäga gamcuna tiyaycashayquipita gargushami canga.

¹⁵Sojta junajlla arunquicuna. Warannin junäga jamanqui nogata rispitamashpayqui. Pipis säbadu jamay junajcho aroj cäga wañuchicangami.

¹⁶«Chaynöpami Israelcunaga nishänölla säbadu jamay junajta imaycamapis rispitanga. Chayno rispitarga conträtu rurashanchïtami imaypis cumlenga.

¹⁷«Nogaga syëlutawan allpata sojta junajcho camarcur warannin junajcho jamarä. Chaymi chay junäga imaycamapis juc señal canga.»

¹⁸Sinaí puntacho Moisesta chayno tantiyarcachirmi ishcay läja rumicunaman dëdunwan isquirbishan laynincunata Tayta Dios entregaran.