Read Tayta Diosninchi Isquirbichishan Éxodo 35 Bible Online

Éxodo 35 - Tayta Diosninchi Isquirbichishan bible

Éxodo 35

¹Llapan Israelcunata shuntarcur Moisés niran: «TAYTA DIOSGA caynömi nimasha:

²Semäna ganchis junaj captinpis gamcunaga sojta junajlla arunqui. Ushanan ganchis caj säbadu jamay junäga jamanqui rispitädu junaj captin. Chay junaj llapayqui TAYTA DIOSTA rispitashpayqui jamanqui. Pipis chay junajcho aroj cäga wañuchicangami.

³Maycho tiyarpis säbadu jamay junajchöga ni ninallatapis ama ratachinquicunachu.»

⁴Moisés llapan Israelcunata willapar, cayno niran: «TAYTA DIOS nogata nimasha cayno ruranapämi:

⁵TAYTA DIOSPAJ ofrendata goycärinayquipaj gamcuna shuntanqui. Shonguyqui shacyashanpita TAYTA DIOSPAJ ofrendata churayta munaj cäga gamcuna apamunqui: gorita, guellayta, runsita,

⁶jïlucunatana muräduta, aurörata, pucata, lïnu tëlata, cabrapa ajchanpita puchcasha jïluta,

⁷uyshacunapa garachanta pucaman tiñishata, fïnu garacunata, acacia gueruta,

⁸lamparin ratananpaj asëtita, chayno perfümicunatapis acrana asëtiman wiñananpaj, insinsuman wiñananpäpis,

⁹ónice rumicunata, chayno cuyayllapaj rumicunatapis mas mandaj cürapa pichëranman lagapänanpaj, efodman churapänanpäpis.

¹⁰«Gamcunacho maygayquipis ima ruraytapis yachajcunaga shamuy TAYTA DIOS nimashancunata imanöpis ruranayquipaj.

¹¹«Tayta Diosta rispitana witichinalla tolduta ruranquicuna: jananta, jananpa gatanancunata, ticpinancunata, marcuncunata, quinraypa chacarajnincunata, tushancunata, chay guerucunapa jamanancunata,

¹²Babulta, chapananta, wintunanpaj gueruncunata, babul churaränan cuartuta raquir chaparänanpaj caj bayëtata,

¹³mësata, wintunanpaj gueruncunata, mësacho cananpaj cajcunata, Diospaj caj tantata,

¹⁴achqui ratananpaj candilëruta, ima-aycanpis chaycho cajcunatawan, tübu-nirajnincunata, achqui ratananpaj asëtita,

¹⁵insinsuta rupachir goshtachina altartapis wintucunantinta, alli asyaj asëtita, alli asyaj insinsuta, tolduman yaycunata chaparaj tëlata,

¹⁶uywacunata pishtarcur rupachinayquipaj caj altarta, uchpa shicwananpaj runsipita uchcuyojnincunata, wintucunanta, chaycho cananpaj cajcunata, runsipita paylata jamanantinta,

¹⁷rispitädu toldu chaupicho captin guenchano intërunpa tumarej chaparänanpaj cajta rurananpäna: tëlacunata, tushancunata, tushacuna jamananpaj cajcunata, guenchano caycajman yaycuna puncupaj tëlata,

¹⁸tolduta ichichinanpaj istägancunata, intëru cantunpa curraltano ichichinanpaj istägancunata, wasquïllacunata,

¹⁹mas rispitädu cajcho Diosta rispitar jaticunanpaj awaypa awasha röpata: cüra Aarón jaticunanpaj rispitädu röpanta, Aaronpa wamrancunapa cüra cay röpancunatapis.»

²⁰Chaura llapan Israelcuna Moiseswan goturpaycashanpita cuticuran imatapis capushanpita apamunanpaj.

²¹Chaymi Tincuna Tolduta jatarachinanpaj ofrendata churayta munajcuna TAYTA DIOSPAJ apamuran. Chaynöpis apamuran Tincuna Tolducho cananpaj caj cösacunata rurananpaj y cüra jaticunan rispitädu röpacunata rurananpäpis.

²²Ollgupis warmipis shongun shacyaptin ofrendata goyta munajcuna apamuran ticpicunata, surtïjacunata, wallgancunata, jatirashan arëticunata, goripita rurashan cajtaga imatapis. Cada ünunmi ima-aycatapis goripita cajta TAYTA DIOSPAJ apamuran.

²³Caupusha jïlucunata muräduta aurörata pucata, mas alli caj lïnu tëlata awananpaj, cabrapa ajchan caupushata, uyshacunapa garachan pucaman tiñishata, lamarcho tiyajpa garachancunatapis apamuran.

²⁴Mayganpis guellayta, runsita goycunanpaj apaj cäga TAYTA DIOSPA ñaupanman apashpan goycoj. Acacia gueruta apamojpis apamuran Diospaj cajcunata imatapis rurananpaj.

²⁵Tucuy-nirajta burdayta yachaj caj warmicunapis, apamuran caupusha jïlucunata muräduta, aurörata, pucata, mas alli caj tëlata rurananpaj «lïnu» jutiyojta.

²⁶Puchcay yachaj warmicunana cabrapa ajchanta puchcaran.

²⁷Mandajcuna apamuran cuyayllapaj ónice rumicunata, waquinta mas mandaj cüra jaticunan pectoralman, efodmanpis adurnar lagananpaj.

²⁸Chayno apamuran alli asyaj jampicunata, achquipaj asëticunata, acrar wiñapänanpaj caj asëtita, goshtachiptin alli asyaj cananpaj insinsupäpis.

²⁹Israel runacuna ollgupis warmipis ofrendata churayta munaj cäga buluntänin cashanpita apapäcamuran TAYTA DIOS Moisesta nishan cajcunata llapanta rurachinanpaj.

³⁰Israelcunata Moisés niran: «Wiyamay-llapa noga nishäta: TAYTA DIOSMI acrasha Judá trïbupita caj Bezaleelta. Payga Hurpa willcanmi, Uripa wamranmi caycan.

³¹Bezaleeltaga abilösu cananpaj Tayta Diosmi yarpayta gosha Tayta Dios yarpaycashanno rurananpaj. Chaymi payga ima ruraytapis yachan, imata rurananpäpis yarpaysapa.

³²Goripita, guellaypita, runsipita cuyayllapajcunata rurayta yachan.

³³Cuyayllapaj rumicunatapis llagllayta yachanmi. Llagllarcur camarajlla cananpaj cañichin. Chaynömi guerupitapis llagllayta yachan. Tucuy-niraj cuyayllapäcunata rurayta yachan.

³⁴Chaynömi Diosga Bezaleeltawan Aholiabta tantiyaytapis gosha waquin cajta imano ruraytapis yachachinanpaj. (Aholiabga Ahisamacpa wamran. Ahisamacga Dan trïbupitami casha.)

³⁵Ishcantami Tayta Dios yanapasha imatapis cuyayllapäta rurananpaj, murädu, auröra, puca chicnu millwa jïluwan llanu caupusha lïnuwan imatapis burdananpaj, cuyayllapaj laburcunata awananpäpis.