Read Tayta Diosninchi Isquirbichishan Job 12 Bible Online

Job 12 - Tayta Diosninchi Isquirbichishan bible

Job 12

¹Chayno niptin Job niran:

²«¡Achyä gamcunaga llapan runacunapa ruquinchari niycämanqui! ¡Gamcuna wañuptiquega yachajcuna ushacanganachari!

³Nogapis gamcunanöllaga tantiyämi. Gamcunanöllami cä. ¿Pitaj mana musyanchu rimaycashayquitaga?

⁴«Noga alli runa juchaynaj captë ñaupatacunaga Tayta Dios wiyajmi mañacushäcunata. Canan ichanga amïgöcuna asipämanna.

⁵Chaynömi alli goyaycajcunaga ñacaycajta manacajman churan. Alliraj caycajtapis cutiparachinmi.

⁶Suwacunami ichanga cushisha goyan. Tayta Diosta rabyachejcunapis jaucami goyan. Paycunaga Tayta Diospa munaynincho caycashanta yarpashpanmi mana yarpachacuypa cawan.

⁷«Mä tapucuy jirca animalcunatawan äbicunata. Paycunami willashunquipaj chaycunata pï rurashantapis.

⁸Cay pachatawan lamarcho caycaj pescäducunatapis tapucuy. Paycunami willashunquipaj chaycunata pï rurashantapis.

⁹¿Pillaga caycanrächuraj TAYTA DIOSLLA llapantapis munayninwan rurashanta manaraj musyaj?

¹⁰Cawajcunaga Paypa maquinchömi llapanpis caycan.

¹¹¿Manachu rinrinchïwan imatapis wiyanchi? ¿Manachu gallunchïpis ima micuy cashantapis mayan?

¹²Mayurcunaga sumaj musyaj yachajmi. Achca watayojna cashpanmi paycunaga tantiyan.

¹³«Tayta Diosmi ichanga yachaj, munayniyoj. Payga imata rurananpäpis sumajmi camacächin.

¹⁴Dios juchuchishan cajtaga manami pipis yapay allchannachu. Pitapis Dios wichgaycushan cajtaga manami pipis jorgunnachu.

¹⁵Pay mana tamyachiptenga usyawan llapanmi chaquicäcun. Fiyupa tamyachimuptenga intëru jircacunatami juchu apacun.

¹⁶Payga munayniyojmi sumaj yachajmi. Tayta Diospa munayninchömi caycan engañacojcunapis engañasha cajcunapis.

¹⁷Paymi camacächin yachajcunapis mana tantiyananpaj. Juezcunatapis upatacäcachin.

¹⁸Paymi raycunatapis ray cashanpita jorgurin. Nircurmi camacächin galallata prësu apananpaj.

¹⁹Cüracunatapis cüra caycashanpita jorgun. Autoridäcunatanami jitarin.

²⁰Alli tantiyachicojcunatapis yarpashanta gongaycachinmi. Mayurcunapa yarpaynintapis gongaycachinmi.

²¹Paymi camacächin rispitäducuna manana rispitasha cananpaj; callpayojcuna callpaynajna ricacunanpäpis.

²²Pipis mana musyashantami musyacächin; pacaraycajno caycajcunatapis ricacächin.

²³Paymi nasyuncunatapis jatunyächin, nircur illgächin. Runacunatapis shuntan; nircur mashtaypa mashtar gargurin.

²⁴Mandajcunapa yarpaynincunatapis gongaycachin. Nircur chaqui jirca chunyajcho näni mana cashancunacho pantacächin.

²⁵Chaychönami chacaychöno yatayllapa, machasha runacunano tapraypa-taprar purin.