Read Tayta Diosninchi Isquirbichishan Job 15 Bible Online

Job 15 - Tayta Diosninchi Isquirbichishan bible

Job 15

¹«Chayno niptin Temán parti runa Elifaz yapay niran:

²«¿Yachaj runaga manacajcunata parlashpanchuraj cutichinman? ¿Wayrata cacnejnölla llutancunallata rimanmanchuraj?

³¿Yachaj runaga shimin tarishallanpitapis rimanmanchuraj? ¿Manacajcunatapis parlanmanchuraj?

⁴Tayta Diosta manchacuna cashantapis gamga manami tantiyanquinachu. ¡Llapan shongunpa Tayta Diosta adurana cashantapis chapatami ruraycanqui!

⁵Llutan yarpayniquimi mana allita rimachishunqui. Chaymi yachaj-tucoj runano gampis rimaycanqui.

⁶Quiquiquipa shimillayquimi jitarpushunqui, manami nogachu. Quiquiquipa shimillayquimi ticrapaycäshunqui.

⁷«¿Gamga yarpanquichu gampita mas unayga cay pachapis mana cashanta? ¿Yarpanquichu gampita mas unayga puntacunapis ni jircacunapis mana cashanta?

⁸¿Diosta pacayllapa tantiyachejchu canqui? ¿Gamllachu cay munduchöga llapantapis mas yachanqui?

⁹¿Imatataj musyanqui nogacuna musyashäpita mastaga? ¿Imatataj gamga mas yachanqui nogacuna mana tantiyashä cajta?

¹⁰¡Nogacunachöga caycanmi chacha auquin runacunapis! ¡Caycanmi papäniquipita mas unayta cawajcuna, llapanta musyajcunapis!

¹¹¿Gampäga manachu alli caycan quiquin Tayta Dios shogashushallayqui, alli shimillanpa willapäshushayqui?

¹²¿Imanirtaj shonguyqui munashanta ruraycanqui? ¿Imanirtaj ñawiquipis saltanaypa saltanaycan?

¹³¿Imanirtaj Tayta Diospaj rabyaycanqui? ¿Imanirtaj shimiqui tarishanta rimanqui?

¹⁴«¿Runaga ‹limyumi cä› ninmanchuraj? ¿Runaga juchaynaj canmanchuraj?

¹⁵Diosga anjilnincunatapis manami llapan shongunpaga yäracunchu. Pay ricaptenga syëlupis manami limyunöchu.

¹⁶Chayno caycaptenga runaga piyur-rächari, mana alli melanaypaj caycarga, yacunaycajnöraj jucha rurayta ashiycarga.

¹⁷«Masqui sumaj wiyamay. Noga nishayqui cawashä watacunacho imano yachacushätapis,

¹⁸yachajcuna imallatapis yachachimashanchïta. Paycunaga yachacuran unay caj awiluncunapitami.

¹⁹Paycunatami chacrataga goycuran. Paycunachöga manami jäpa runacunaga talluraranchu.

²⁰Mana allita ruraj fiyu runacuna manami alläpaga cawanchu. Paycunaga rabyar ñacallarmi goyan.

²¹Paycunaga imapis gaparämojta wiyar fiyupa mancharin. Pipis mana yaycunancho caycaptinpis suwacunaga suwapanmi.

²²Paycuna manami yarpanchu chacajman chayananpita gueshpiyta. ¡Espädawan wañunallanpänami acrasha caycan!

²³Paycunaga micuyta ashirmi purin. Musyannami paycunapäga pacha chacacäcunanpaj cashanta.

²⁴Llaquicuycunallami pasaypa manchariycächin. Juc ray pillyapita chapacunanpaj shuyaraycajnömi caycan.

²⁵Chaynöga canga Tayta Diospa contran ricacojcunapämi; Ima-aycapäpis munayniyojta manacajman churar parlajcunapämi;

²⁶chapacuna escüdunwan chapacushpan callpanman yäracushpan Tayta Diospa contran aywajpämi.

²⁷«Chay runacunapaga cäranpis werami caycan. Wera cayllawanmi pachanpis liwaraycan.

²⁸Chayno captinpis paycuna tiyashan siudäcunaga ragällanmi quëdanga. Wasincunapis chunyaj jaguirishami canga. Chaycunaga ganra goturaycajllami ricaconga.

²⁹Rïcuga manami unaycamaga rïculla cangapächu. Charashancunapis manami aypallamanga miranganachu.

³⁰Yanauyaycaj chacaypitaga manami imanöpis gueshpengapächu. Chay runaga ricacongapaj jachapa rämancunata nina wapcharishannömi. Tayta Dios pücariptin ushajpämi ushacanga.

³¹Yanga manacajcunallaman ama yäracuchunchu. Chayman yäracorga yanga manacajcunallatami tarenga.

³²Manaräpis timpun chayamuptinmi rämancuna wañutacäconga. Chaycunaga mananami yapayga berdiranganapischu.

³³Chaycunaga canga übas yörapa wayuynin mana pogojnömi, olivo yörapa waytancuna marpur shicwacojnömi.

³⁴Diosman mana yäracojcunapaga wamrancunapis manami canganachu. Saynita chasquishan ima-aycanpis ninachömi rupanga.

³⁵Chay runacunaga juchallatami gueshyaj caycan. Pachanchöga engañacuyllami caycan. Wachangapis llullacuyllatami.»