Read Tayta Diosninchi Isquirbichishan Job 20 Bible Online

Job 20 - Tayta Diosninchi Isquirbichishan bible

Job 20

¹Chaura Naamat parti runa Zofar yapay niran:

²«Gam rimashayquipitaga fiyupami cutichiyta munä. Chaymi upällallaga mana cacushächu.

³Gamga gayapaycämanquimi. Nogaga musyaycänami imano cutichiytapis.

⁴«Runa cay pachacho cashanpita-pacha cayno runacuna cashantaga gam musyaycanquinami:

⁵Mana alli runacunapaga cushicushanpis rätullapämi. Fiyucunapis rätullami cushicun.

⁶Chay runa syëlucama aypajno captinpis, pucutaycama chayashano captinpis

⁷uywacunapa iscannöllami ushacanga. Amïguncunapis ‹¿Maychöraj pay caycan?› nengami.

⁸Chacaypa ricapacushannömi, suyñuynincho ricashannöllami illgangapaj. Chauraga pipis manami tarengapänachu chay runataga.

⁹Iwal goyajcunapis, ricajcunapis manami imaypis ricangapänachu.

¹⁰Wamrancunami wacchata pobricunata cutichipaconga. Paycunami papänincuna pobrita ima-aycanta suwapashantapis cutichenga.

¹¹Timpullanchöraj caycar wañonga.

¹²«Mana allita rurashancuna shimicho mishqui caycaj-japuy captinpis, gallun ruricho caycaj-japuy captinpis,

¹³mishquiptin shimillancho cachej-japuy captinpis, cuncanta mana päsachej-japuy captinpis

¹⁴pachanchöga ismunnami. Ismurnami ticran culebrapa benënunmanno.

¹⁵Chayrämi pipa ima-aycanta ushashantapis rimarenga. Paycunapa pachanpita Tayta Diosmi gumitachimonga.

¹⁶Paycunaga culebrapa benënunta micojnömi micurcaycasha. Culebra ullishpanmi wañuchenga.

¹⁷Mananami cushisha miconganachu Aypalla mishquitapis aypalla lëchitapis manami upongachu.

¹⁸Ima-aycata gänashantapis llapantami cutichipaconga. Chaycunata manami imatapis rurangachu ni rubichangapischu.

¹⁹Paycunaga ima-aycantapis ushaparcurmi pobricunata garguriran. Mana ñacar jatarachishan wasicunatami duyñu-tucarcäriran.

²⁰«Yargaj caytaga manami imaypis yamajchu. Munapashantaga llapantami tariyta tïraj.

²¹Paycunaga tarishantami micoj. Chaypitami llapan gänashancunata unaycamaga mana dürachengachu.

²²Fiyupa rïcu cashpanga mas llaquishami goyanga. Fiyucunami chay runata ima-aycantapis ushapanga.

²³Sacsaj micucurcunanpaj caycaptinmi Tayta Diosga rabyar castiganga. Rabyashpanmi chay runataga löcu tamyawannöraj castiganga.

²⁴Fyërru magacunapita gueshpiptenga runsi lëchawanmi chayaycachenga.

²⁵Lëchaga cuerpunmanmi yayconga. Ñatinninpa päsarmi jucaj-lädunpa llojshiramonga. Chay runaga fiyupami mancharenga.

²⁶Fiyupa yanauyaycaj chacaymi ñiticurconga. Pipis mana waycupashan nina ratarirmi rupar ushacurconga. Wasincho quëdajcunatapis llapantami ushacurconga.

²⁷Janaj syëlumi chay runa juchata rurashancunata cäranga. Cay pachanami ima juchata rurashancunatapis nenga.

²⁸Tayta Dios rabyawan castigashan örami yacu ñitir chay runapa wasinta usharenga.

²⁹Chayno cananpämi mana alli runacunataga Tayta Dios distïnuta gosha. Chaynöman chayananpämi surtin caycan.»