Read Tayta Diosninchi Isquirbichishan Job 21 Bible Online

Job 21 - Tayta Diosninchi Isquirbichishan bible

Job 21

¹Chaura Job cutichishpan niran:

²«Cushicachimayta munashpayquega noga nishäta wiyaycäramay.

³Noga parlamuptë gamcunaga upällalla wiyaray. Usharcuptë ichanga asirpis asicunqui.

⁴«Nogaga manami runawanchu rimanacuycä. Chaymi nogaga upällalla mana cacöchu.

⁵Wiyaycäramay. Wiyaycamarga mancharinquipämi. Imata nimaytapis manami camäpacunquipächu.

⁶Quiquëpis ninäpaj caycashäta yarpashpäga mancharëmi. Cuerpöpis shiririnrämi.

⁷¿Imanirtaj fiyu runacunaga mas unaycamaraj cawan? ¿Imanirtaj auquinyayparaj wañun? ¿Imanirtaj fiyupa rïcu caycashanchöraj wañun?

⁸Ricanrämi wamrancuna, willcancuna wiñajtapis. Mana yarpachacuypa cushisha goyan.

⁹Paycunataga manami ima mana allipis chayanchu. Diospis manami castiganchu.

¹⁰Uywancunapis fiyupami miran. Uywanpa wawancunapis manami wañunchu.

¹¹Wamrancunapis pucllar cörricachan uysha-mallwacunanöraj.

¹²Cushisha gachwan, pinticachan, arpacuna, tamburcuna, pincullucuna wagashan-tupu.

¹³Cushishami goyan wañunancama. Allillami wañuymanpis chayan.

¹⁴Diostanami nin: ‹Nogacunataga ama rimapämaychu. Manami layniquicunata musyaytapis munächu.

¹⁵¿Pitaj Tayta Diosga sirbiycänäpäga? ¿Imatataj gänanchi payta mañacorga?›

¹⁶Chayno nirpis fiyucunaga manami quiquillanpitachu rïcuyan. ¡Chayno cashantaga manami tantiyayta atipächu!

¹⁷«¿Imayllaga mana alli runacunapa achquin upishachuraj? ¿Imayllaga disigrasya päsashachuraj? ¿Imayllaga Tayta Dios paycunapaj rabyacurcur paycunata ñacachishachuraj?

¹⁸¿Imayllaga paycunata shucucuy wayra ogshata apajno machiypa machishachuraj?

¹⁹Rimayga nin: ‹taytancuna juchata rurashanpitaga wamrancunatanami castigan› nir. Chaynöga ama canmanchu. Quiquin jucha ruraj ñacachonga sumaj yachacunanpaj.

²⁰Ima-aycapäpis munayniyoj Tayta Diosga rabyar quiquin jucha rurajta castigachun.

²¹Wañushatanaga manami imapis gocunnachu famillyancunata ima-ayca päsaptinpis.

²²«Ichanga ¿piraj Tayta Diostaga yachachinman, janaj pachacho caycajcunatapis paylla jusgaj caycaptenga?

²³Waquin runacunaga wañucun timpuncho caycällar, imapäpis mana yarpachacuyllapa goyaycashallancho,

²⁴alli caycashallancho, mana gueshyayllapa.

²⁵Waquinnami ichanga cawan fiyupa llaquicullar. Chayno runacuna wañun imaypis manaraj alliman chayar.

²⁶Imano captinpis pantiyunchöga llapanpäpis iwal-llami. Jucninta-jucnintapis curucunallami ushacurcun.

²⁷«Nogaga musyaycämi nogapaj gamcuna imano yarpaycashayquitapis, mana allita nogapaj yarpaycashayquitapis.

²⁸Gamcunaga ninacurcaycanqui: ‹¿Maytaj munayniyoj runapa wasin? ¿Maytaj fiyu runacuna tiyashan?›

²⁹¿Manachu gamcuna parlashcanqui caminanticunawan? ¿Manachu gamcuna wiyashcanqui paycuna willapänacushanta? Paycuna ninacun:

³⁰‹Dios rabyashpan castigaptinpis fiyucunataga manami chayanchu› nir.

³¹Fiyucunataga ¿pitaj tapun mana alli rurashancunata? ¿Pitaj castigan mana allita rurashanpita?

³²Wañuptenga pampaychöpis guepa ñaupami llapan gatin.

³³Pantiyunpis paytaga cushishami chasquicun. Pampacushan uchcutapis täpanrämi.

³⁴«¡Llaquicuycajta shogamashayquipis yangami! ¡Gamcunaga nircaycämanqui manacajta llullacuyllapami!»