Read Tayta Diosninchi Isquirbichishan Job 22 Bible Online

Job 22 - Tayta Diosninchi Isquirbichishan bible

Job 22

¹Chaura Temán marca runa Elifaz yapay parlaran:

²«Runaga ¿imapäräshi Tayta Diospäga alli canman? Fiyupa yachaj cashpanpis ¿imachöräshi Tayta Diostaga yanapanman?

³Gam allillata ruraptiqui munayniyoj Tayta Diosga ¿cushicunchuraj? Llapanchöpis alli cashayquipita ¿imallataga chasquinchuraj?

⁴¿Payta rispitar munashanta rurashayquipitachuraj piñacur castigaycäshunqui?

⁵Chaypa ruquenga castigaycäshunqui mana allita rurashayquipitami, mana atipaypaj juchata rurashayquipitami.

⁶«Gamga imatapis mana nistaycashpayquimi marca-masiquita ‹rindataraj churay› nej canqui. Röpancunatapis ‹rinda quëdachun› nir galallata gargurej canqui.

⁷Yacunaycajcunatapis yacuta mana macyajchu canqui. Yargaycajtapis mana garajchu canqui.

⁸¡Munayniyoj rispitädu cashpayquimi cay pachaga munaynillayquicho cashanta yarparayqui!

⁹Biyüdacunata jinayllata gargurej canqui. Wacchacunatana ñacachej canqui.

¹⁰Chaypitami cananga ñacaycunallana tumapaycäshunqui. Chaypitami fiyupa mancharishalla caycanqui.

¹¹Gampäga llapanpis chacajlla captinmi imatapis mana ricanquichu. Aypalla yacu shamur ñitejnömi gueshyaga ñitiycäshunqui.

¹²«Syëluchöga llapanpita mas altuchömi Tayta Dios caycan. Mas janajcho caj goyllarcunapis chaquin ur'gallanchömi caycan.

¹³Chayno caycaptin gamga ninqui: ‹¿Imanöpataj Tayta Dios musyanga? Yanauyaycaj chacajpitaga ¿imanöpataj ricamonga?

¹⁴Janaj syëlu asulyaraycajcho wac-läman cay-läman puriptin paytaga chacaj yana pucutaymi chaparaycan. Chaynöpami mana ricamunchu› nir.

¹⁵«¿Gampis unay caj fiyu runacuna rurashanno mana allita ruraytachu yarpaycanqui?

¹⁶Paycunaga illajpitami wañuriran mayu chayar imatapis apacushanno.

¹⁷Paycunaga Tayta Diosta niran: ‹¡Ama rimapämaychu! ¿Imataraj nogacunapäga gam ruranquiman?› nir.

¹⁸Chauraga ¿Tayta Dioschuraj camacächiran chay runacuna rïcuyänanpaj? ¡Chayno cashantaga manami imanöpapis tantiyayta atipächu!

¹⁹Alli runacunaga fiyu runacuna mana alliman chayajta ricar cushicun. Juchaynajcunaga asipar nin:

²⁰‹Chiquimajninchïcunaga ushacashanami. Ima-aycantapis ninami ushacurcusha.›

²¹«Tayta Diosmanna yapay yäracuy. Chauraga yapaymi ima-aycatapis tarichishunquipaj.

²²Pay yachachishushayquita sumaj wiyacuy. Llapan nishushayquita yarpayniquiman sumaj churacuy.

²³Tayta Diosman yapay yäracuptiqui, mana alli ruraycunata manana ruraptiqui,

²⁴mas cuyayllapaj gori captinpis ñuchu allpatanölla, mayucho caj rumicunatanölla ricaptiquega

²⁵ima-aycapäpis munayniyoj Tayta Diosnami gampäga canga gorino, aypalla guellayniquino.

²⁶Paymi cushicachishunquipaj. Chauraga payllamannami yäracunquipäpis.

²⁷Imata mañacuptiquipis wiyashunquipaj. Imatapis aunishayquita gampis cumlinquipaj.

²⁸Ima ruraychöpis allichömi llojshinquipaj. Llapan mana allicuna cashanpis pacha achicyacäcojnömi ricacongapaj.

²⁹Alli-tucojcunataga Tayta Dios manacajmanmi churan. Umildicunatami ichanga alliman churan.

³⁰Mana allita mana rurasha captiquega juchaynaj captiquega Tayta Dios salbashunquipämi.»