Read Tayta Diosninchi Isquirbichishan Job 24 Bible Online

Job 24 - Tayta Diosninchi Isquirbichishan bible

Job 24

¹«Munayniyoj Tayta Diosga ¿imanirtaj mana willacunchu fiyu runacunata imay jusgananpaj cashantapis? Diospa amïgun cajcunaga ¿imanirtaj mana musyanchu imay jusgananpaj cashantapis?

²Fiyu runacunaga chacrapa lindancunatapis witichin. Uywancuna mas achca cananpaj uyshacunatapis suwacun.

³Wacchapa bürruntapis guechun. Biyüdapa buyintapis rinda charicurcun.

⁴Pobricunataga nänicunapitapis gargun. Chaymi umildicunaga pacacun.

⁵Pobricunaga chunyaj chaqui jircacho cacoj chucaru uywanöpis fiyupa ñacar-rämi micuytapis tarin. Wamrancunapäpis fiyupa ñacar-rämi micuyta tarin.

⁶Paycunaga aywan runapa chacrancunacho quëdaj rïguta shuntacoj. Man'chäga aywan fiyu runacunapa chacranmanpis übas ashicoj.

⁷Chacaycunaga puñurpis waran imawanpis mana pitucuyllapami, imawanpis mana gatacuyllapa.

⁸Tamyarga jircacunacho pasaypa jutuycajtami ruran. Chaura llantucunanpaj machayta ashir gagacunaman lagaycachan.

⁹«Fiyucunaga pobricunapa chuchuycaj wamrancunatapis guechun. Chay guechushantana rinda chararan.

¹⁰Pobricunaga galallanömi purinpis. Rïguta ashtarcaycan yargaypita wañuycarmi.

¹¹Asëtita gapchinanpaj jatusaj agacuna rumicunata tangan. Übasta bïnupaj lluchcaycarpis yacunaypitaga wañurcaycanmi.

¹²Siudächöga wañuyta ñacaycajcuna gaparpaycan. Nanaywan wagarcaycan. Mañacuptinpis Tayta Diosga manami yanapanchu.

¹³«Waquin runaga manami munanchu achicyaj pachata. Chacajllacho cawacuytami munan. Cawashancamapis manami ruranchu alli cajcunataga.

¹⁴Runata wañuchejcunaga chaca-chacallami purin pobricunata wañuchinanpaj. Pacha chacarcuptinna suwaman ticran.

¹⁵Majayoj caycar jucpa majanwan cacojcunaga pacha chacarcunallantami shuyaraycan. Pacha chacarcuptenga cäranta sumaj chapacun ‹Caynötaga pipis manami rejsimangachu› nir yarpashpan.

¹⁶Chacaypa suwaga wasicunaman yagacuycun. Junajpaga jircacho pacarpäcun. Manami munanchu achicyajta.

¹⁷Paycunapäga junaj caycan fiyupa yanauyaycaj chacaymi. Paycunaga munarcaycan chacaycho manchacuypaj cajcunallatami.

¹⁸«Chay fiyu runacunaga yacu cörrejnömi illgacäcun. Chacrancunapis maldisyunädumi ricacun. Übas chacrancunachöpis pipis mananami arunnachu.

¹⁹Fiyupa usyawanga rashtapis chullucäcunmi. Chaynömi jucha rurajcunapis ushacan.

²⁰Paycunataga mamanpis gongayconganami. Curucunanami micur ushacurconga. Pipis mananami yarpanganachu chay runataga. Gueruta wayra sajtarishannömi ushacanga.

²¹Chay runacunaga amatar fiyumi casha wawata mana tarej warmicunapaj, biyüdacunapäpis. Manami imaypis yanapashachu.

²²Tayta Diosmi ichanga munayniyojcunatapis mana alliman chayarachin. Chaynöpami paycunaga imaycama cawanantapis mana musyanchu.

²³Shongun yarpashanno runa goyäcunanpämi Tayta Diosga camacächin. Chaypis ricapaycanmi imata rurashallantapis.

²⁴Fiyucuna rätullaga alli cawaymanmi chayan. Chaypita ichanga illaraycannami. Chaycunaga ruracäcun jachata achurisha wañutacäcojnömi. Rïgupa ispïjan paquicäcojnömi ruracäcun.

²⁵¿Chaynöchu, manachu? ¿Piraj ‹llullacuycanquimi› nir nishäcunata mana bälichengachu?»