Read Tayta Diosninchi Isquirbichishan Job 27 Bible Online

Job 27 - Tayta Diosninchi Isquirbichishan bible

Job 27

¹Jobga mastapis niran:

²«Alli arriglamayta mana munasha captinpis, fiyupa ñacachimasha captinpis Munayniyoj Tayta Diospa jutinchömi jurä:

³Cawaycänäpaj pay callpata gomashancamaga

⁴imaypis manami llullacushächu. Manacajcunatapis manami nishächu.

⁵Cawaycashäcamaga juchaynaj cashallätami rimaycäshaj. Nogaga manami aunishayquichu manacajta rimachiyta munaycämashayquitaga.

⁶Juchaynaj cashätaga imaypis rimaycäshämi. Nogaga manami imapitapis pengacushächu.

⁷«¡Pipis nogapa conträ ricacoj cajtaga chayachun fiyu runacunata chayashanno, mana allita rurajcunata chayashanno!

⁸Tayta Dios wañurachiptenga ¿imanaräshi canman fiyu runacunapäga?

⁹Ima ñacaymanpis chayashpan mañacuptin Payga manami wiyanganachu.

¹⁰Fiyucunaga Tayta Dios munashanno ruraypaj manami imapis gocunchu. Tayta Diostaga imaypis manami mañacunpischu.

¹¹«Cananmi noga musyachishayqui Tayta Dios fiyupa munayniyoj cashanta, Munayniyoj Tayta Dios imata yarpaycashantapis.

¹²Llapayquipis ricashana caycashpayquega ¿imanirtaj manacajcunata rimarcaycanqui?»

¹³«Munayniyoj Tayta Diosga mana cuyapäcojcunatawan fiyu runacunata caynömi castigangapaj:

¹⁴Wamrancuna aypalla cashpanpis llapanmi wañonga guërracho, man'chäga micunanpaj imatapis mana tarishpan.

¹⁵Cawaycar quëdajcunapis wañonga fiyu gueshyawanmi. Biyüdancunapis manami wagangachu.

¹⁶Fiyu runacuna guellayta allpatano aypallata shuntashantapis, aypalla röpacunata charashantapis,

¹⁷alli runami chay röpancunata jaticonga. Chay guellay shuntashantapis limyu runami rubichanga.

¹⁸Fiyu runapa wasenga äbipa gueshtanno alayrillami, chacracho täpana chucllanöllami.

¹⁹Fiyu runa rïcu caycashpan puñucuyconga. Riccharcamuptenga manami imanpis canganachu.

²⁰Junajpaga fiyupa mancharengapaj. Chacaypaga fiyu löcu wayrami apacongapaj.

²¹Inti yagamunan cajpita fiyu löcu wayra chayamushpanmi wasinpita jorgurir apaconga.

²²Imanöpa pacacuyta munaycaptinpis mana cuyapaypami chay runaman wayra chayanga.

²³Chay wayraga fiyupa gaparashpan shucar-rämi gaticachanga.»