Read Tayta Diosninchi Isquirbichishan Job 28 Bible Online

Job 28 - Tayta Diosninchi Isquirbichishan bible

Job 28

¹«Rejsisha jircachömi caycan guellay mïnaga. Chayno rejsisha partichömi caycan gorita acranapäpis.

²Allpa rurinpitami fyërrutaga jorgunchi. Rumicunata chulluchishami cubri acracan.

³Runaga pacha rurin chacajmanpis yaycunmi. Chayno yaycurmi pacha rurin may-may rurimanpis chayan. Chaychönami yanauyaycaj chacaycho rumicunata ashin.

⁴Pipis mana purinan jircacho, siudäcunapitaga caruchömi mïnataga uchcun. Chaychönami wac-läman cay-läman caylintaycar wascawan warcuyllapa yaycun uchcunanpaj.

⁵Cay pachachöga chacracuna micuyta wayuchin. Rurinpanami ichanga caycan nina ushashano uchcu-uchcu.

⁶Chay rurichömi tarinchi cuestaj zafiro jutiyoj rumita, goritapis allpawan tacucashata.

⁷Chay uchcucunataga imaypis manami ricashachu wamäshupis ni ima ancacunapis.

⁸Chaymanga manami chayannachu aycha micoj jirca animalcunapis. Ni liyuncunapis chaychöga manami purinnachu.

⁹Runaga gagacunachömi ojtin. Niycällarmi puntacunatapis sapipita juchuchin.

¹⁰Gagacunacho ruran mïna uchcucunata. Chaychöna tarin tucuy-niraj achca casta cuestajcunata.

¹¹Chayno ojtiycällarmi tarin mayu yuriycashantapis. Mana pipis ricashantami jorgamun.

¹²«Ichanga ¿maychötaj tarinchi yachayta? ¿Maychötaj caycan tantiyay?

¹³Runaga manami musyanchu chaycuna alli cashantapis. Cay pachachöga manami tarinpischu.

¹⁴May-may jatun lamarpis ‹caychöga manami canchu› ninmi. Ruri yanauyaycaj lamarpis ‹nogachöga manami canchu› ninmi.

¹⁵Chaytaga goriwanpis manami rucanchïchu. Ni guellaywanpis manami rantinchïchu.

¹⁶Fiyupa mas alli caj goriwanpis manami pägashwanchu. Manami pägashwanchu ni ‹cornalina› ni ‹zafiro› cuyayllapaj rumicunawanpis.

¹⁷Yachayga goripitapis, achicyaj gueshpipitapis masmi cuestan. Chaytaga manami rucashwanchu gori aläjacunawanpis.

¹⁸Yachayga lamarpita jorgushan ‹coral› jutiyojpitapis mas cuyayllapämi. Achicyaj gueshpicunapitapis perlascunapitapis mas cuyayllapämi.

¹⁹Yachaywan tincuchishaga Etiopiacho caj ‹crisólito› cuyayllapaj chanin cuestaj rumipis manami tincunchu. Manami rantishwanchu mas allinnin caj goriwanpis.

²⁰«Chaura ¿maychötaj tarinchi yachayta? ¿Maychötaj caycan tantiyay?

²¹Llapan cawajcuna mana ricananchömi pacaraycan. Päriypa purejcuna mana ricananchömi chaparaycan.

²²Infiernupis wañuypis ninmi: ‹Chaycunapäga wiyayllami wiyashcä parlajta› nir.

²³«Diosmi ichanga musyan yachay maycho caycashantapis. Payllami musyan maycho tariytapis.

²⁴Payga ricaycanmi allpapa cuchuncamapis. Chayno payga ushajpämi ricaycan syëlupita uraman cajtaga.

²⁵Tayta Diosmi wayrapa callpantapis gosha. Yacutapis nisha maycamalla chayananpäpis.

²⁶Paymi nisha imay tamyapa timpun cananpäpis; räyucuna, illguycuna imay wichan cananpäpis.

²⁷Chay örami yachaytapis chaycho ricaran. Imano cashantapis musyaycur ricaycur ‹alli› niran.

²⁸Nircur runacunata Tayta Dios niran: ‹Yachaj runaga Nogallatami rispitaman. Mana allita rurananpitaga manchapacuypami cawan.› »