Read Tayta Diosninchi Isquirbichishan Job 33 Bible Online

Job 33 - Tayta Diosninchi Isquirbichishan bible

Job 33

¹«Chaymi Job, cananga imata nishäcunatapis sumaj wiyamay. Imata nishätapis sumaj tantiyacuy.

²Gamta cutichinäpäga shimi puncullächönami caycan.

³Rasun cajtami parlamushaj. Mana pacaypami yarpaycashätaga nishayqui.

⁴Chayno canäpämi munayniyoj Tayta Dios ruramasha. Nircur cawayta gomasha.

⁵Puydishpayquega nishäta mä cutichimanqui. Tapunäpaj sumaj camaricuy.

⁶Gampis nogapis Diospa ñaupanchöga iwalmi caycanchi. Nogapis mitullapitami caycä.

⁷Chayno caycaptëga ama manchacamaychu. Nishäcunaga manami lasäshunquipächu.

⁸«Gamga manacajcunatami rimashcanqui. Niprësi caynöpis nishcanqui:

⁹‹Nogaga juchaynaj limyu runami cä. Ima mana allitapis ni juchatapis manami rurashcächu.

¹⁰Diosga mayacachaycanmi imapita castigamänanpäpis. Nogataga ricaycäman contran runatanömi.

¹¹Chaquëcunapitapis cadinawanmi watarcamasha. Nircur imallata rurashätapis ricapaycäman› nir.

¹²«Gam chayno rimashayquega manami rasunpachu. Diosga llapan runacunapitapis mas munayniyojmi.

¹³¿Imanirtaj Tayta Dioswan churacayta munanqui? Diosga imata rurashancunatapis manami pitapis willapanchu.

¹⁴Diosga tucuynöpami willapämanchi. Ichanga noganchi mana cuentata gocunchïchu.

¹⁵Aybësiga willapämanchi suyñuyninchïcho cämacho puñucasha caycashanchi öra. Chacaypapis ricapacachimanchi.

¹⁶Diosga runacunapa rinrillanchömi willapan. Piñacun. Mancharachin.

¹⁷Chaynöga ruran mana allita ruraycashanta cachaycunanpaj, manana alli-tucoj cananpaj.

¹⁸Chaynöpami timpullancho caycällar wañunanpita salban. Mala-muertipa wañunanpitapis salban.

¹⁹Aybësi Diosga runacunata piñacun gueshyacunawan gueshyachir, intëru cuerpuncunata nanächir.

²⁰Chauraga mas allinnin mishquej micuycunapis mana micuypänönami ricacun.

²¹Gueshyaptin aychancunapis ismur shicwan. Chaura tulluncunapis alayrina ricacan.

²²Quiquinpis sepultüramanna watgaraycan; wañuypis jananchöna caycan.

²³«Ichanga chay runapa ñaupancho juc anjil caycashpan, warangapita jucnayllapis paypa faburnin car alli ruraj cashanta rimarcuptin,

²⁴chay anjil cuyapashpan ‹Wañunanpita salbaycuy. Ruquintami noga tarishcä› niptin ichanga

²⁵chay runaga gueshyaycashanpita allchacangami. Mösu cashannömi cangapaj.

²⁶Chauraga mañacuptin Tayta Diospis yanapangami. Cushicushpanmi Dioswan ricanaconga. Diosga runata alli cashanmanmi cutichenga.

²⁷Chayrämi runa nenga: ‹Juchatami rurashcä, mana allicunatami rurashcä. Chaypis Tayta Diosga manami castigamashachu.

²⁸Chaypa ruquenga wañunäpitami salbamasha. Chaymi achicyaj pachataraj ricaycä› nir.

²⁹«Diosga chaynömi runata yaparir-yaparir ruran.

³⁰Wañunanpita salban. Nircur camacächin achicyaj pachata ricaycänanpaj.

³¹Wiyamashpayqui sumaj tantiyacuy ari Job. Noga rimamushäcamaga upällalla cacuy.

³²Cutichimayta munashpayquega rimamuy ari. Rasun cajta nimaptiquega noga allimi wiyashayqui.

³³Imapis cutichimänayquipaj mana captenga upällalla wiyamay. Nogami yachachishayqui imano yachaj caytapis.»