Read Tayta Diosninchi Isquirbichishan Job 37 Bible Online

Job 37 - Tayta Diosninchi Isquirbichishan bible

Job 37

¹«¡Chaypitami nogapa shongöpis fiyupa tic-ticyaycan! ¡Pëchöpitapis llojshicuriytarämi munan!

²Masqui wiyay Tayta Diospa busnin sinchipa wiyacämushanta, Paypa shimin junruruycämojta.

³Paymi illguywan achicyächin allpapa juc cuchunpita juc cuchuncama. Syëlupitapis räyuchimun.

⁴Chayno wiyacan sinchipa junrurumushan fiyupa manchariypaj busninta wiyacächimuptin. Janraraycämojta wiyashanchïcamaga illguypis manami chawanchu.

⁵Dios busninta junruruchimuptenga fiyupa almiraypämi ruracan. Payga tantiyayta mana atipashanchïcunatami ruran.

⁶Paymi nin rashta cay pachaman shicwamunanpaj. Chayno camacächin tamya fiyupa tamyananpäpis.

⁷Chaynöpami camacächin runacuna wasinpita mana llojshinanpaj. Llapan runata tantiyachin paylla llapanta camacaycächishanta.

⁸Animalcunapis machaycunaman yaycur chaychömi pacarpäcun.

⁹Ura caj-läpitami löcu wayra shamun. Jana caj-läpitanami gasay chayamun.

¹⁰Dios pücaptinmi gasapapis ruracan. May-may aypalla yacucuna jananpapis tintin.

¹¹Paymi camacächin yacuta pucutay jogarinanpäpis. Camacächin chay pucutaypita räyu llojshinanpaj.

¹²Chaura illguynin pillgut-pillgutyar syëlupa aywan. Chaynömi Tayta Diosga munashanta ruran intëru allpa janancho.

¹³Aybësiga chaycunawanmi Tayta Diosga cay pachata castigan. Aybësiga cuyapäcoj cashanta musyachimanchi.

¹⁴«Job, sumaj tantiyacunayquipaj wiyamay. Masqui sumaj yarpay fiyupa almiraypajcunata Tayta Dios rurashanta.

¹⁵¿Gam musyanquichu Tayta Dios chaycunata imano camacächishantapis? ¿Musyanquichu illguy achicyänanpaj pucutaycho imano yurishantapis?

¹⁶¿Gam musyanquichu wayrawan pucutay imano puriycashantapis? Chaycunaga musyachimanchi fiyupa yachaj Dios cashantami.

¹⁷Wapuriypa acaptin ¿musyanquichu röpayquiwan cashpayqui imanir südashayquitapis?

¹⁸Gamga Tayta Diosta ¿yanapanquimanchu mana cuyucoj cananpaj syëluta mashtäshiyta?

¹⁹«Nogacunata yachachimay imano Tayta Diosta ruwacunäpäpis. Nogacunaga carcaycä chacaycho caycajno yarpayniynajmi.

²⁰Nogaga manami Diospäga nëmanchu ‹Paywan parlaytami munä› niyllapis. Chayno nerga illgächimänanta munallarmi nëman.

²¹Pucutay yanamaraycashan öraga manami ricanchïchu intitapis. Pucutayta wayra apacuptinmi ichanga syëlupis lliuyacäcun.

²²Punta janancunapa norte caj-läpami garwanchucarcamun. Chayga musyachimanchi Dios almiraypaj munayniyoj cashantami.

²³Munayniyoj Tayta Dios rurashanta manami tantiyanchïchu. Payga caycan fiyupa callpayoj, alli arregluta rurajmi. Payga llapanta cumlej, pitapis mana ñacachejmi.

²⁴Chaynöpami llapan runacuna manchacun. Yachaj-tucojcunatami ichanga alliga mana ricanchu.»