Read Tayta Diosninchi Isquirbichishan Job 41 Bible Online

Job 41 - Tayta Diosninchi Isquirbichishan bible

Job 41

¹«Waräcuy Leviatantaga ¿pescädutano charinquimanchuraj ansuylallawan? ¿Shiminta watanquimanchuraj llanu wascallawan?

²¿Senganpita charichinquichuraj juc llanu wascallawan? ¿Quijädanpita juc fyërruwan charichinquimanchuraj?

³Cuyapänayquipaj ¿ruwashunquimanchuraj? ¿Alli shimillanpachuraj ruwashunquiman?

⁴¿Gamga jurachinquimanchuraj imaycamapis sirbishunayquipaj?

⁵¿Paywanga pucllanquimanchuraj iti äbiwan juc runa pucllajno? ¿Wamrayquicunapa pucllananpächuraj watanqui?

⁶¿Nigusyanticunaga chayta rantiyta munanmanchuraj? ¿Ranticojcuna ichic-ichiclla cuchunmanchuraj ranticunanpaj?

⁷¿Lëchayquiwan tucsirinquimanchuraj garan rurinyaj päsajpaj? ¿Pescäduta charicunawan umanpa tucsipaycunquimanchuraj?

⁸Payta yatayllapis yataycuptiquega musyanquimanmi imano cashantapis. Chauraga imaypis manami gonganquipächu. Chayno ruraycushuptiquega mananami imaypis rimapanquipänachu.

⁹Leviatanta chariyta yarpashanpis yangami. Ricaycullarnami manchariywan pï-maypis chiyacäcunman.

¹⁰Pipis gallariparcuptenga fiyupami rabyacurcun. Chayno caycaptenga nogapa ñaupächo ¿piraj ichiraycanman?

¹¹¿Pitaj nogata imatapis gomasha cutichinäpäga? ¡Llapanpis nogallapami!

¹²«Leviatanpa chaquincuna, cuerpuncuna imano callpayoj cashanpäpis simrimi rimaycäshaj.

¹³¿Piraj jorgunman intëru jananta chaparaycajta? ¿Piraj janan chapacunan chucru caycajta uchcurinman?

¹⁴¿Piraj shiminta quicharinman? Quiruncunaga caycan fiyupa manchacuypämi.

¹⁵Wajtan lömunpis caycan fïlayllanpa chapacunawan sumaj chapashami. Chaycunaga sumaj chapasha car sinchi ruminömi caycan.

¹⁶Jucnin-jucninman fiyupa chanajmi lagacasha caycan. Chaypaga ni wayrapis manami yaycunchu.

¹⁷Chaycunaga jucnaylla sumaj jiracashami caycan. Chaytaga manami pipis rachicächinchu.

¹⁸Wishgaptenga illguynörämi senganpa llojshimun. Ñawincunapis pacha waraptin inti yagamojnörämi achicyan.

¹⁹Shiminpitapis llojshin nina ratataycajraj. Nina shansharämi shicwarcunpis.

²⁰Senganpitapis llojshin goshtayraj manca timpuptin waputay llojshejnöraj.

²¹Jämaynenga nina upisha caycaj carbuntapis shanshachinmi. Senganpita llojshin nina.

²²Cuncanpis fiyupa chucru callpayojmi. Chaymi payta ricarga llapanpis fiyupa mancharir gueshpin.

²³Cuerpuncho mas caycaj aychanpis caycan fiyupa chucru imapis mana yaycunanpänömi. Chayga caycan jundisha fyërrunöraj.

²⁴Puywayninpis paypaga gagano chucru, tunaynöpis chucru.

²⁵Pay rabyaptenga guërracho binsejcunapis mancharishami ricacun. Chaymi fiyupa mancharisha gueshpir aywacun.

²⁶Sabliwan cuchuptinpis manami mayachinchu. Tucsicunapis ni lëchapis manami yaycunchu.

²⁷Paypäga fyërrupis ogshanöllami caycan. Runsipis ismusha guerunöllami caycan.

²⁸Lëchawan illaparpis manami gueshpichinquichu. Waracaptiquipis rumicunaga ogshanöllami jananman chayan.

²⁹Jatun mäsuwan wiruptinpis cashpiwan wirushannöllami. Lansawan sajmashan wichyar aywajta wiyarpis manami imapis gocunchu.

³⁰Mitunpa garachaypa aywarga wayanchatarämi rurarin. Rurinpaga quëdan callapa gueruta garachasha runa apashanno gashacasharämi. Punshata shuntacuna afilasha aywashannörämi quëdan.

³¹Yacunpa aywarga may-may ruri lamartapis timpurachimun mancacho yacu timpuycajtanörämi. Mancacho caycaj yacuta poshgachejnörämi timpurachimun.

³²Aywashan guepanpaga yacu quëdan yur'garaycar achicyaypa achicyar-raj. Chaura lamar yacuga ricacun soguyacäcushanörämi.

³³Chay-niraj animalga manami canchu cay pachachöga. Leviatanga rurasha caycan imaypis mana manchacunanpämi.

³⁴Mas munayniyojcunatapis manacajmanmi churan. Chayno, llapan jirca animalcunatapis payga manchachinmi.»