Read Tayta Diosninchi Isquirbichishan Job 5 Bible Online

Job 5 - Tayta Diosninchi Isquirbichishan bible

Job 5

¹«¡Gaparay Job! Mä pillaga wiyashunquichush. ¿Maygan anjiltataj yäracunqui?

²Musyanchïmi mana tantiyaj upacunaga rabyallawan wañushanta. Yargajcunaga munapaycällarmi wañuymanpis chayan.

³Ricashcämi mana tantiyaj upa runacuna alliman chayajta. Ichanga jinan öra ima-aycanpis ushacäcusha.

⁴Chay runapa wamrancunata pipis manami yanapanchu. Autoridäcunapis alliga mana arriglanchu. Pipis manami faburnin ichircunchu.

⁵Murupacushan pogojcunata pishipacajcunami micucarcärin. Cashayoj jachacunapa rurincho caycaptinpis shuntacarcärin. Ima-ayca charashancunatapis lajwaypa lajwar yargajcunana ushacurcun.

⁶Mana alli rurayga manami allpapitachu llojshimun. Ñacaycunapis manami pachapitachu yurin.

⁷Ninapita chispa pintishanno, quiquin runami ñacananpäpis juchayoj.

⁸«Gamno cashpäga Tayta Diostami ruwacöman. Paypa maquinmanmi dimandöta churäman.

⁹¡Paymi ruran mana ricashanchi fiyupa almiraypajcunata! ¡Chaycunataga pipis manami tantiyanchu!

¹⁰Paymi tamyachimun cay pachaman. Chay tamyami pargun intëru jircata.

¹¹Paymi umildicunataga alliman churan. Llaquicuycajcunatapis cushicachin.

¹²Sabïdu runacuna yarpashancunatapis Tayta Diosmi mana camacächinchu.

¹³Paymi ticrachin sabïducuna yarpaycashanga quiquinman chayananpaj. Mana allita yarpaycashantapis mana camacächinchu.

¹⁴Paycunaga yanauyaycaj chacaycho chacäpacusha caycajnöpis junaj pachapami yatayllapa purircaycan.

¹⁵Tayta Diosga fiyucunapita salbanmi pobricuna ñacaycajcunatapis.

¹⁶Paymi callpaynajcunatapis cushicachin. Fiyucunatapis upällachin.

¹⁷«Cushisha cachun Tayta Dios corrijishan runaga. Ima-aycapäpis munayniyoj Tayta Dios corrijishushayquitaga wiyacuy.

¹⁸Pay garayquita rachishpanga jampipäshunquimi. Castigashushpayquipis allchacächishunquimi.

¹⁹Tayta Diosga ima mana alli chayashunayquipita yapay yapaymi salbashunquipaj. Manami camacächengapächu mana alli chayashunayquitaga.

²⁰Muchuy captinpis mana wañunayquipämi salbashunquipaj. Guërra captinpis sabliwan wañuchishunayquipita salbashunquipämi.

²¹Washayqui rimanantapis manami camacächengachu. Castïgu captinpis manami manchacunquipächu.

²²Muchuy, ni llaquicuy captinpis manami imapis gocushunquipächu. Micucoj jirca animalcunatapis manami manchacunquipächu.

²³Rumicunapis chacrayquicunacho manami quichquirangachu. Jirca animalcunapis cuyashunquipämi.

²⁴Wasiquichöpis alli goyayllami canga. Uywayquicunapis manami jucpis pishengachu.

²⁵Gampitaga aypallami miranga jirca jachacunanöraj.

²⁶Auquinyarpis callpayojllarämi caycanquipaj timpuncho rutusha rïgunöraj.

²⁷Chayno cashantaga ricashpanchïmi musyanchi. Rasunpami chayno. Chaycunata sumaj wiyay. Masqui quiquiquipis yarpachacuriy.»