Read Tayta Diosninchi Isquirbichishan Job 6 Bible Online

Job 6 - Tayta Diosninchi Isquirbichishan bible

Job 6

¹Chaura Job niran:

²«Llaquicuynëta, disigrasya chayamashancunata shuntarcur balansawan pësaptenga

³lamar cantuncho agushpitapis masmi lasanman. Chaymi ushaypa ushar rimashcäpis.

⁴Tayta Diospa lëchanmi nogacho jaticasha caycan. Benënunmi intëru cuerpöman mashtacasha. Tayta Dios ñacachimashpanmi fiyupa manchaycächiman.

⁵Guewan captenga bürrupis manami gaparanchu. Törupis micunanpaj caycaptenga manami büyanchu.

⁶Gam nimashayquega cachiynaj micuynömi, runtupa yurajnin gamyajnömi.

⁷Chaypis cananga mana yachashämi micuynë.

⁸«¡Ima alliraj canman mañacushäta Tayta Dios auniycamaptin! ¡Ima alliraj canman munashäta Tayta Dios cumlimaptin!

⁹¡Ima alliraj canman Tayta Dios llapiramaptin! Chauraga wañur usharäcömannami.

¹⁰Fiyupa nanaywan wañurpis cushicömanmi imaypis Tayta Diospa laynincunata cumlej cashpä.

¹¹Callpäpis manami cannachu masta awantanäpänaga. ¿Imatanataj shuyäshäpis?

¹²Manami gagano sinchichu cä, ni runsino chucrupischu.

¹³Quiquilläpitaga manami imatapis rurächu. Yanapämänanpäpis manami pipis canchu.

¹⁴«Ñacaycaj amïgunchïtaga cuyapanchïmi, Tayta Dios nishancunata mana cumliptinpis.

¹⁵Gamcunami ichanga amïgö caycarpis mana yanapämanquichu. Gamcunaga ragrapa yacu päsarejnömi caycanqui.

¹⁶Yacuga putca aywan gasapawan, rashtawan tacushami.

¹⁷Mana rashtaptinnaga ragrapa yacu uraj chaquicäcunmi. Fiyupa shanaptinna ushajpaj chaquicäcun.

¹⁸Yacuta ashir caminanticunapis juc-läpana purin. Chaynöpami chunyajpa aywashpan wañun.

¹⁹Temapita Sabäpita aypalla nigusyanticuna shamöga chay yacu-mallwa aywajta tariyta yarpashpan ashin.

²⁰Ashir aywashanman chayarga fiyupa llaquicun. ‹Yacuta tarishun› nishanpis yangallami.

²¹Chaynömi gamcunapis nogapäga carcaycanqui: Fiyupa melanaypaj caycashäta ricaycäramar mancharircaycanqui.

²²Noga manami gamcunata imatapis mañacöchu. Manami ‹salbamänayquipaj guellayta pägay› nëchu.

²³Manami ‹chiquimajcunapita salbamay› nëchu. Manami ‹suwacunapa maquinpita jorgamay› nëchu.

²⁴«Yachachimay-llapa, chauraga mana rimacuypami chasquicushaj. Tantiyachimay ima mana allita rurashätapis.

²⁵Rasun cajpitaga pipis manami ‹mana› ninchu. Gamcunami ichanga manacajta jitapaycämanqui.

²⁶Gamcunaga jamurpämanqui rimashäpitami. Chay rimashäcunataga manacajmanmi churarcaycanqui.

²⁷Chayno car gamcunaga wacchata wañuchinanpaj nirpis ninquimanmi. Cuyanacushayqui amïguyquitapis ranticuycunquimanmi.

²⁸Masqui ricäramay. Rasun cajtami niycä. Manami llullacöchu.

²⁹Sumaj yarpachacuy. Ama fiyuga caychu. Rasun cajta niycashätaga sumaj tantiyacuy.

³⁰Gamcunaga capas yarpanqui llullacuycashäta. Capas ‹imata parlaycashantapis tagäga mana musyanchu› nircaycämanqui.