Read Tayta Diosninchi Isquirbichishan Salmos 10 Bible Online

Salmos 10 - Tayta Diosninchi Isquirbichishan bible

Salmos 10

¹TAYTA DIOS ¿imanirtaj carullacho cacunqui? ¿Imanirtaj pacacunqui llaquicuycuna cashan öra?

²Fiyu runacunaga alli-tucushpanmi umildicunata achäquita ashipan. Chaypis fiyucunaga quiquincunami rurashan togllallacho watacäconga.

³Fiyu runacunaga quiquincuna alli cashanta yarparmi alabacun. Yargajcunaga TAYTA DIOSTA manacajman churarmi disprisyan.

⁴Chay runacunaga alli-tucur nin: «Diosga manami canchu. Piräshi nogata jusgamanman imata rurashätapis» nir. Chayllatami imay örapis yarparaycan.

⁵Imata rurashanchöpis allimi llojshipacun. Paycunaga jusgacänanpaj cashanta manami yarpanchu. Chiquinacushantaga manacajmanmi churan.

⁶Paycunaga yarpaycan pipis mana alliman mana chayachinantami, imaypis inrïduman mana chayaytami.

⁷Paycunaga manacajcunatami llullacun, engañacunmi, ashllicunmi. Shimi puncullanchömi caycan pitapis imatapis ninanpaj.

⁸Marca llojshinacho, yaycunacho pacacuycur shuyarpan. Nircur juchaynajcunataga wañuchin. Pipis washänanpaj mana cajcunataga watgarcaycan.

⁹Liyun machaypita ricchacojnörämi, pacarashanpita pobritaga watgarcaycan. Chariycärerga garchacarcärir apacun.

¹⁰Umpurcur, ñuquircur, shuyarpaycaptillannami pipis washänanpaj mana cajcunaga maquinman chayan.

¹¹Fiyucunaga yarpan «Diosga pobricunata gongaycushami. Cäranta chapacurcur imaypis mana ricanchu» nir.

¹²¡TAYTA DIOS apuray ari! ¡Ama wiyaräcuychu! ¡Pobricunataga ama gongaychu!

¹³¿Imanirtaj fiyucunaga manacajman churashunqui Tayta Dios? Paycunaga yarpan «imaypis Diosga manami jusgamangachu» nir.

¹⁴Gamga quiquiquimi ricashcanqui fiyupa mana allita rurashanta. ¡Ricasha carmi, castiganquipaj imano rurashanpitapis! Gammanmi yäracamun pïninpis mana cajcunaga. Gamllami wacchacunata yanapanqui.

¹⁵¡Fiyucunataga maquintapis paquirgäriy! ¡Llapan mana allita rurashancunapita jusgay!

¹⁶Cay pachachöga TAYTA DIOSLLAMI imaycamapis ray. ¡Payta mana rispitajcunataga gargongami!

¹⁷TAYTA DIOS, umildicuna mañacamushushayquitaga wiyashcanquimi. Chaymi shacyächir yanapanqui.

¹⁸Wacchacunata, ñacaycajcunataga washar yanapaycuy ari. Chaura fiyu runacunaga manacaj caycar mananami paycunata mancharachenganachu.