Read Tayta Diosninchi Isquirbichishan Salmos 102 Bible Online

Salmos 102 - Tayta Diosninchi Isquirbichishan bible

Salmos 102

¹Llaquicoj runa llapan shongunpa Tayta Diosta mañacushan. TAYTA DIOS, mañacamushäta wiyaycamuy. Quijacamushätapis wiyaycamuy ari.

²Llaquicuycaptëga nogapita ama pacacuychu ari. Wiyaycamay ari. Mañacaycämuptëga juclla yanapaycamay ari.

³Goshtay illgajnömi aywacuycä. Tullöcunapis wayllaycan shanshanömi.

⁴Guewa wañuytajnömi shongöpis ushaycan. Manami micunäpischu.

⁵Chay-jina ataycällarnami agrayashcäpis.

⁶Nogaga caycä chunyajcho tucu caycajnömi, gagacunacho pillyaj äbi caycajnömi.

⁷Puñuytapis manami tarëchu. Nogaga caycä wasi janancho wacchayasha pichiusanömi.

⁸Chiquimajcunaga cada rätumi wiyächiparcaycäman. Jutëtapis jogarisha manacajman churamashpanmi.

⁹Tantapa ruquin uchpallatami acuycäpis. Upuycashä yacumanpis weguëmi jutuycan.

¹⁰Fiyupami rabyacurcushcanqui. Chaymi nogataga jogarcur jitaramashcanqui.

¹¹Llantuy päsacojnöllami watäcunapis päsacuycan. Guewa wañuytajnömi wañuycä.

¹²Gam ichanga TAYTA DIOS, imaypis raymi caycanqui. Imaypis manami gongacanquipächu.

¹³Jatarcushpayqui Sionta cuyapaycuyna. Payta cuyapänayquipaj jitashayqui diya chayamushanami.

¹⁴Sirbishojcunaga Sionta ragällata ricarmi fiyupa llaquicurcaycan. Juchusha caycajta ricarpis pasaypami cuyan.

¹⁵Llapan nasyun runacunawan raycunami munayniyoj TAYTA DIOSTA rispitangapaj.

¹⁶Pay Sionta allchananpaj shamushpanmi munayniyoj cashanta musyachiconga.

¹⁷Wacchacuna mañacushanta Tayta Diosga wiyanmi. Paycuna mañacushantaga manami gonganchu.

¹⁸Guepata yurejcuna ricananpaj isquirbicächun. Chaymi guepata yurejcunapis Tayta Diosta alabanga.

¹⁹Cayno isquirbichun: «TAYTA DIOSGA ricarämun janaj pacha tiyashanpita. Chaypitami cay pachataga ricamun.

²⁰Wañuchicänanpaj caycaj prësucuna llaquicuycajta wiyar salbaran.»

²¹Chaynöpami Sioncho TAYTA DIOSPITA willaconga. Jerusalencho Tayta Diosta alabanga.

²²Intëru nasyunpita runacuna, raycuna shuntacarcurmi TAYTA DIOSTA aduranga.

²³Mösullaraj caycaptënami callpätapis ushacächisha. Cawanäpaj caj watacunatapis wallcayächisha.

²⁴Nogaga në: «Tayta Dios, amaraj apacamayrächu. Mösullaraj caycaptëga amaraj pushacamayrächu.» Gamga canqui mana nunca wañojmi.

²⁵Tayta, gallarinanpita-pachami cay pachatapis gamga tacyachishcanqui. Quiquiquimi syëlutapis rurashcanqui.

²⁶Llapanmi chaycunapis illgangapaj. Gammi ichanga jinalla caycanquipaj. Llapan chaycunaga röpanömi ushacanga. Juc runa röpata rucacurejno gam rucachiptiquega rucachishami canga.

²⁷Gammi ichanga cashayquinölla caycanquipaj. Gamga imaypis chaynöllami cawaycanquipaj.

²⁸Sirbishojcunapita mirajcunataga allichömi goyächinquipaj. Quiquiquipa ñaupayquichömi tiyachinquipaj.