Read Tayta Diosninchi Isquirbichishan Salmos 104 Bible Online

Salmos 104 - Tayta Diosninchi Isquirbichishan bible

Salmos 104

¹Llapan shongöpami TAYTA DIOSTA alabashaj. TAYTA DIOSNILLÄ gamga fiyupa munayniyojmi canqui. Gamga achicyaypa achicyaycaj röpashami caycanqui.

²Gamga achquiwan pitucurcusha carmi ñawitapis pengacachej achquicho caycanqui. Tëlata mashtajnömi syëlutapis mashtarishcanqui.

³Gamga wasiquita tucnaraj pilancuncunatapis camacächishcanqui syëlucho caycaj yacu jananchömi. Pucutaytapis carrëtayquimanmi ticrachinqui. Äbipa älanchönömi wayrapapis aywanqui.

⁴Wayracunami willacojniqui. Ninanami sirbishojniquicuna.

⁵Cay pachatapis tacyachishcanqui jamananpita mana cuyoj cananpaj.

⁶Lamar yacumi cay pachataga ñitiraran runata röpan chaparajno. Puntacunatapis yacuga ñitiraranmi.

⁷Yacuga gam piñacuptiquimi witicuran. Räyuno busniquita wiyar jinan öra aywacuran.

⁸Puntacunata wicharcur, ragracunata urarcur, aywacuran maychöpis cananpaj nishayquiman,

⁹señalapashayquipita mana mas wichämunanpaj, yapayga cay pachata imaypis manana ñitinanpaj.

¹⁰Tayta Dios, Gammi camacächinqui jircacunapita yacu urämunanpaj. Chay yacucunanami mayuman chayan.

¹¹Chay yacutanami upun chucaru animalcunapis. Chay yacuwannami yacunayninta chawächin jirca bürrucunapis.

¹²Mayucunapa cantunchömi äbicunapis gueshtanta ruran. Chaychönami yöracunapa rämancunacho cantan.

¹³Gammi llapan jircacunatapis tamyachimuypa pargunqui syëlucho wasiqui caycashanpita. Gam tamyachimushayquiwanmi allpapis ushman.

¹⁴Uywacuna micunanpaj guewapis wiñamun. Runa murushancunatapis wiñachimunqui allpa wayuchiptin runa micunanpaj.

¹⁵Chay micuywanmi runapaga callpan yurin. Bïnunami runataga cushicachin. Asëti achca captinmi cärancunapis llushwaypa-llushwan.

¹⁶Libanuman sedrucunata TAYTA DIOS lantashan guerucunapäpis yacuga manami pishinchu.

¹⁷Chaycunachöga llapan casta äbicunami gueshtanta ruran. Pino yöracunachönami tiyan cigüeña äbicuna.

¹⁸Altu jircacunachömi tiyan jacha cabracuna. Gagacunachönami tiyan wishcashcuna.

¹⁹Quillatami rurashcanqui cada ushaynin juc quilla cashanta musyanapaj. Intiga musyanmi imay öra yagacunantapis.

²⁰Inti yagacurcuptenga chacacäcunmi. Chauraga munti animalcunapis llojshipäcamunna.

²¹Liyuncunapis yargashpan gaparpan. Tayta Diosta mañacun micuyta tarichinanpaj.

²²Inti ratarcamuptinnami ichanga machaynincunaman cutiycur puñucaycärin.

²³Chauraga runacunanami aroj llojshipäcun. Nircur arun pacha tardiyänancama.

²⁴TAYTA DIOS, llapanta rurashayquega aypallami. Llapantapis allimi rurashcanqui. Cay pachachöga gam rurashallayquimi juntasha caycan.

²⁵Chaychömi caycan may-may jatuncaray lamarpis. Chaychönami caycan yupaytapis mana atipaypaj animalcuna jatunpis tacshapis.

²⁶Chay lamar jananpami purin büquicunapis. Chay lamarchömi caycan pucllanayquipaj rurashayqui Leviatán waräcuypis.

²⁷Llapan chaycuna gamtami shuyaraycäshunqui yargashan öra micuyta garanayquipaj.

²⁸Gam garaptiqui paycunaga chasquishunquimi. Maquiquita quichapaptiqui allinnin cajcunata micucarcärin.

²⁹Ticracurcuptiquega paycuna mancharinmi. Jämayninta shuntacurcuptiquega wañushpan allpamanna ticracurin.

³⁰Espirituyquita cachaptiquina ichanga llapan camashayquicuna yapay cawan. Chaynöpami cay pachachöga yapay cawayta gallaycun.

³¹TAYTA DIOS munayniyoj cashayquega para-simrimi. Llapan rurashayquipis cachun cushicachishunayquipaj.

³²Ricapäriptiqui cay pachaga sicsicyaytami gallaycun. Yataycuptiquega jircacunapis goshtacarcamunmi.

³³Cawashäcamaga TAYTA DIOSNËTAMI alabansacunawan alabaycäshaj.

³⁴Noga yarpaycashäcunaga TAYTA DIOSPAJ alli caycuchun. Chayno captenga cushicushämi.

³⁵Juchasapacunaga cay pachapita illgächun. Mana allita rurajcunaga amana cachunnachu. Llapan shongöpami TAYTA DIOSTA alabashaj. ¡Aleluya! ¡TAYTA DIOSGA alabasha cachun!