Read Tayta Diosninchi Isquirbichishan Salmos 105 Bible Online

Salmos 105 - Tayta Diosninchi Isquirbichishan bible

Salmos 105

¹¡TAYTA DIOSTA agradësicuy-llapa! ¡Paypaj willacuy! Imata rurashancunatapis intëru marcacunaman willacuy.

²Alabansacunawan payta alabay. Almiraypajcunata rurashanta willacuy.

³Rispitädu cashanpita cushicuy. TAYTA DIOSTA ashejcunaga cushisha cay-llapa.

⁴Munayniyoj TAYTA DIOSNINCHÏMAN guellicuy. Paywan tincunayquipaj ashiy.

⁵Fiyupa almiraypaj milagrucunata rurashanta yarparay. Mandamintuncunata yachachishantapis yarparay.

⁶Sirbejnin Abrahampita mirar aywajcuna yarparay. Tayta Dios acrashan Jacobpita mirar aywajcuna yarparay.

⁷TAYTA DIOSMI noganchïpa Tayta Diosninchëga. Paypa maquinchömi caycan cay pachapis.

⁸Payga aunishanta imaypis yarpashami. Waranga miray aywajcamapis manami gongashachu.

⁹Abrahamta aunishanta, Isaacta aunishantapis yarpashami.

¹⁰Jacobpäga camacächiran juc layno cananpaj; Acrashan runacunapäna parlacushan conträtoga imaycamapis cananpaj.

¹¹Chaymi niran: «Canaán partitami goycushayquipaj gamcunapa partisyunniqui cananpaj.»

¹²Paycunaga caran wallcajllami. Canaanchöga juc ishcay jäpa runacunalla caran.

¹³Paycunaga nasyunnin-nasyunnin puricachaj runacunami caran. Juc rayman juc rayman chayajmi caran.

¹⁴Chaypis Tayta Diosga manami munaranchu paycunata pï ñacachinantapis. Raycunatapis Tayta Diosga willaran:

¹⁵«Ama yatapaychu acrashä runacunataga. Profëtäcunatapis ama ñacachiychu» nir.

¹⁶Cay pachachöga fiyupa muchuymi caran. Ima micuytapis manami wayuchiranchu.

¹⁷Paycunapa ñaupanta Tayta Diosga Josëta cacharan. Josëtaga uyway cananpaj ranticuycuran.

¹⁸Paytaga charararan chaquincunata cadinacunawan watashalla. Carsilcho wichgarächiran.

¹⁹José rimashan cumlinancama carsilcho wichgarächiran. José willashan rasunpa cashanta chay junaj TAYTA DIOS musyachiran.

²⁰Aypalla runacunata mandaycaj raymi niran carsilcho caycaj Josëta cachaycunanpaj.

²¹Chayrämi Josëta churaran wasincho mandaj cananpaj; ima-aycantapis ricananpaj.

²²Churaran musyaj-yachajcunata, mandajcunata, auquincunatapis yachaj cayta yachachinanpaj.

²³Chaypitarämi Egiptuman Jacobga chayaran. Cam nasyunchöga Jacobpita mirajcuna tiyaran jäpa runacunanöllami.

²⁴Chaychöga acrashan runacunata aypallaman Tayta Dios mirachiran. Paycunaga Egipto runacunapita mas callpayojmi caran.

²⁵Chaypis Tayta Diosga camacächiran acrashan runacunata Egipto runacuna chiquicarcärinanpaj, achäquita ashipänanpaj.

²⁶Chaymi Diosga sirbejnin Moisesta, Aaronta cachamuran. Paycunaga caran acrashan runacunami.

²⁷Paycunami chunyajcho milagruta ruraran Dios «ruray» nishancunata. Cam nasyunchöpis fiyupa almiraypajcunata ruraran.

²⁸Tayta Dios camacächiran fiyupa chacacäcunanpaj. Chaypis Egipto runacunaga Dios nishanta mana wiyacuranchu.

²⁹Tayta Diosga mayu yacucunatapis yawarman ticrachiran. Chaynöpami pescäducunapis wañuran.

³⁰Chay nasyunchöga intëruchömi säputa yurichiran. Asta raypa wasinmanpis säpuga yaycuran.

³¹Dios rimarcuptin intëru Egipto nasyuncho gashyaricuriran upucruywan gayish.

³²Tamyapa ruquin runtu tamyata tamyachiran. Nina ratariran chay particho.

³³Chacracho caycaj übascunata ïguscunata illgächiran. Llapan yöracunatapis Egiptucho cajtaga illgächiran.

³⁴Dios rimarcuptin chüpacacunapis aypalla yuricaramuran. Yupaytapis mana atipaypaj caran.

³⁵Ushacurcuran intëru jircacho caj guewacunata, allpacho wiñamoj cajtaga llapanta.

³⁶Egipto runacunapa guechpa wamrancunatapis Tayta Dios wañuchiran.

³⁷Nircur acrashan runacunata Tayta Dios jorgamuran gorintawan guellaynintawan. Chay famillyacunachöga manami mayganpis gueshyaranchu.

³⁸Egipto runacunaga Israelcunata manchacuran. Chaymi aywacojta ricarga cushicuran.

³⁹Tayta Dios pucutayta mashtacächiran chapänanpaj. Chacaypana achquiparan nina rataycajwan.

⁴⁰Micuyta mañacuptin codorniz äbicunata yurichiparan. Syëlupita mashtamushan tantawan sacsachiran.

⁴¹Gagata shillirachiran. Chaypitana yacu llojshimuran chunyajpa mayuno aywananpaj.

⁴²Chayno ruraran sirbejnin Abrahamwan parlacushanta yarparmi.

⁴³Chaynömi acrashan runacunata cushicachir gaparpaycajta jorgamuran.

⁴⁴Nircur goycuran juc-lä nasyun runacunapa chacranta, juc-lä nasyun runacuna arushan micuyta.

⁴⁵Chaynöga ruraran Tayta Diospa laynincunata, mandamintuncunata wiyacur cumlinanpämi. ¡Aleluya! ¡TAYTA DIOSGA alabasha cachun!