Read Tayta Diosninchi Isquirbichishan Salmos 106 Bible Online

Salmos 106 - Tayta Diosninchi Isquirbichishan bible

Salmos 106

¹¡Aleluya! ¡TAYTA DIOSGA alabasha cachun! TAYTA DIOSTA agradësicuy-llapa amatar alli cashanpita. Pay cuyacoj cashanga imaycamapis chaynöllami.

²¿Piraj TAYTA DIOS milagruta rurashancunata willacuyta camäpacunman? ¿Piraj alabanman Tayta Diosta alabanapaj cashanmannöga?

³Rasun cajllata, alli cajllata ruraj cajcunaga cushishami cawanga.

⁴Nogata yarpäramanqui TAYTA DIOS, acrashayqui runacunata yanapashayqui öra. Yarpaycamanqui ari salbanayquipaj shamushpayquipis.

⁵Chaynöpami noga ricashaj acrashayqui runacuna alli goyajta. Chayta ricarmi noga cushicushaj acrashayqui runacunawan iwal.

⁶Nogacunaga juchatami rurashcä. Mana allitami rurashcä. Fiyu runacunami cashcä unay caj taytäcunanöpis.

⁷Unay caj awilöcuna Egiptucho cashpan manami tantiyacuranchu fiyupa almiraypajcunata rurashayquita. Fiyupa cuyacoj cashayquitami gongaycäriran. Nircur Puca Lamar cantunchömi gampa contrayqui ricacuran.

⁸Chaypis Tayta Diosga salbaran munayniyoj cashanta musyananpaj, payta alabananpaj, jutinta rispitananpaj.

⁹Tayta Diosga Puca Lamarta piñacuran. Chaura chaquiman ticraran. Lamar chaquishanpami päsachiran chunyaj chaqui jircapano.

¹⁰Chaynömi salbaran contrancunapita, chiquejcunapa munayninpita.

¹¹Chiquejcunataga yacu ñiticurcuran. Chaura ni jucnayllapis manami quëdaranchu cawaycäga.

¹²Chayrämi riguiran imano rurananpäpis Tayta Dios aunishanta. Chaura alabansacunawan alabaran.

¹³Ichanga Tayta Dios imata rurashancunatapis runacunaga rätu gongaycäriran. Pay willapashancunata manami cäsuranchu.

¹⁴Chay chunyaj chaqui jircachömi Tayta Diostaga munashanta rurachiyta munaran.

¹⁵Chaymi Tayta Diosga ruraparan paycuna munashanta. Ichanga paycunacho yurichiran wañuchicoj gueshyata.

¹⁶Chaynöpami chunyajcho tolduncunacho tiyarcaycashancho Moisespaj rabyaran, TAYTA DIOS acrashan Aaronpäpis.

¹⁷Chaura allpa quichacäcur Datanta ultacurcuran. Chayno Abiramta gatirajcunatapis micucurcuran.

¹⁸Paycunachöga nina ratariran. Fiyucunataga llapanta nina ratarir ushacurcuran.

¹⁹Horeb jircacho ruracarcäriran juc besërata. Chayga caycaran goripita jundiypa rurashan ïdulu. Chayta adurar gongurpacuran.

²⁰Fiyupa munayniyoj Tayta Diosta adurananpa ruquin adurarcaycaran guewa micoj buyita-niraj rurashanta.

²¹Paycunaga gongaycäriran salbajnin Tayta Dios Egiptucho munayninwan milagrucunata rurashanta.

²²Paymi milagrucunata ruraran chay Cam nasyuncho. Chayno Puca Lamarchöpis fiyupa almiraypajcunata ruraran.

²³Tayta Diosga runacunata illgarachinanpämi caycaran. Ichanga acrashan Moisesmi ruwacur allchacächiran Tayta Dios rabyasha caycajta. Chaynöpami mana illgächirannachu.

²⁴Chaypita guepataga cuyayllapaj nasyunta manacajman churaran. Tayta Dios aunishanta manami riguiranchu.

²⁵Tiyaycashancunacho TAYTA DIOSPA washanta parlaran. Pay nishantaga mana wiyacuranchu.

²⁶Chaymi Tayta Diosga juraran chunyajcho llapan wañunanpaj.

²⁷Juraran paycunapita mirajcunapis wañunanpaj, juc-lä nasyuncunaman gargurinanpäpis.

²⁸Paycunaga Baal-peorta sirbiran. Mana cawaj dioscunapaj churashanta micuran.

²⁹Mana allita rurashpan Tayta Diosta rabyachiran. Chaypitami paycunacho gueshya yuricuriran.

³⁰Chayno gueshya caycaptin Fineesga juchayojta wañuchiran. Chayrämi gueshya jamaran.

³¹Chayno rurashanpitami Tayta Diosga camacächiran payta imaycamapis yarpänanpaj.

³²Chaypitapis Meriba yacu ñaupancho Tayta Diosta yapay rabyachiran. Paycuna chayno rabyachishanmi Moisespäga mana alli caran.

³³Moisestaga fiyupami rabyachiran. Chaymi payga rabyashpan imatapis rimaran.

³⁴Wañuchinanpaj TAYTA DIOS nishan runacunatapis paycunaga manami wañuchiranchu.

³⁵Chaypa ruquenga Tayta Diosta mana rispitajcunawan majachacaran. Nircur chay runacunapa custumrinta yachacuran.

³⁶Tayta Diosta mana rispitajcuna rurashan ïdulucunata aduraran. Chayno rurashancunami achäqui caran paycuna mana alliman chayananpaj.

³⁷Paycunaga wamrancunata ollguta warmitapis rupachiran dyablucunapaj.

³⁸Paycunaga iticunapa yawarninta mashtaran. Chayga caran ollgu warmi wamrancunapa yawarninmi. Cananeo runacunapa diosnincunapämi wamrancunata rupachiran. Chaynöpami cay pachacho yawar mashtararan.

³⁹Paycuna mana allita rurarmi juchayojyaran. Chaynöpami ganra melanaypaj ricacuran.

⁴⁰TAYTA DIOSGA acrashan runacunapaj fiyupa rabyacurcuran. Chay runacunataga fiyupa melanäcuran.

⁴¹Payta mana rispitajcunapa munayninman cachaycuran. Chiquinacushancunanami paycunataga maquincho charararan.

⁴²Chiquinacushancunaga fiyupa ñacachiran. Munaynincho chararashpanna pasaypa pengacachiran.

⁴³Tayta Diosga achca cutimi salbaran. Tayta Dios imachöpis yanapänanpaj caycashantapis quiquincunami pirdichiran. Chaynöpami sïguir juchata rurashpan mana alliman chayaran.

⁴⁴Chayno captinpis llaquicuycajta ricar, gaparpaycajta wiyar

⁴⁵Tayta Diosga yarpäriran paycunawan conträtuta rurar parlacushanta. Chaymi yapay yanaparan. Chaynöga yanaparan fiyupa cuyacoj cashpanmi.

⁴⁶Chaymi camacächiran paycunata maquincho chararaycajcunapis allina ricananpaj.

⁴⁷¡TAYTA DIOS salbaycamay ari! ¡Llapan nasyuncunacho carcaycajtapis shuntaycamay llapanë gamta agradësicunäpaj, cushisha alabanäcunapaj!

⁴⁸¡Israelcuna rispitashan TAYTA DIOSGA imaycamapis alabasha cachun! ¡Llapanpis «Amén» nichun! ¡Aleluya! ¡TAYTA DIOSGA alabasha cachun!